အီတလီ စီးရီးအေရဲ့ လက်ရှိ ချန်ပီယံ အင်တာမီလန်အသင်းဟာ အသင်းရဲ့ အဓိက တိုက်စစ်မှူး လူကာကူကို ချယ်လ်ဆီးအသင်းထံ ရောင်းချဖို့ သဘောတူခဲ့ပြီးနောက် လူကာကူရဲ့ နေရာအတွက် အစားထိုးနိုင်မယ့် တိုက်စစ်မှူး တဦးကို စတင် ရှာဖွေနေပါတယ်။

လက်ရှိမှာတော့ အင်တာမီလန်အသင်းဟာ အတ္တလန်တာအသင်းရဲ့ တိုက်စစ်မှူး ဇာပါတာကို ခေါ်ယူဖို့ စိတ်ဝင်စားနေသလို မန်ချက်စတာ ယူနိုက်တက်အသင်းမှာ ဝေဖန်မှုတွေ ခံနေရတဲ့ ပြင်သစ် တိုက်စစ်မှူး မာရှယ်ကိုလည်း ခေါ်ယူဖို့ မျက်စိကျနေကြောင်း အီတလီ အခြေစိုက် သတင်းဌာနတွေက ယနေ့မနက်မှာပဲ ဖော်ပြသွားကြပါတယ်။

Photo Credit: Tutto Sports

အင်တာမီလန်အသင်းဟာ အသင်းရဲ့ ဘဏ္ဍာရေး အကြပ်အတည်းကြောင့် ယခုနှစ် နွေဈေးကွက် အတွင်းမှာ အသင်းရဲ့ အဓိက ကစားသမား နှစ်ဦး ဖြစ်တဲ့ ဟာခီမီနဲ့ လူကာကူတို့ကို ရောင်းထုတ်ခဲ့ရပေမယ့် အသင်းကို ပြန်လည် အင်အားဖြည့်တင်းဖို့ စီစဉ်နေပြီး မာရှယ်ဟာ သူတို့အသင်းရဲ့ ထိပ်သီး ပစ်မှတ် ကစားသမားပဲ ဖြစ်ပါတယ်။

နာမည်ကြီး သတင်းဌာန တခု ဖြစ်တဲ့ Mirror သတင်းဌာနရဲ့ ဖော်ပြချက်အရ အင်တာမီလန်အသင်းဟာ ယူနိုက်တက် တိုက်စစ်မှူး မာရှယ်ကို ကနဦး အငှား + ရာသီကုန်မှာ အပြီးသတ် ခေါ်ယူခွင့်နဲ့ ခေါ်ယူချင်နေပြီး မန်ချက်စတာ ယူနိုက်တက်အသင်းကလည်း သင့်တော်တဲ့ ကမ်းလှမ်းမှု ရလာရင် မာရှယ်ကို ရောင်းထုတ်ဖို့ စဉ်းစားနိုင်ကြောင်း သိရပါတယ်။

Photo Credit: Tutto Sports

အင်တာမီလန်အသင်းဟာ မာရှယ်ကို ကနဦး အငှား + ရာသီကုန်မှာ ပြောင်းရွှေ့ကြေး ယူရို ၅၀သန်း ပေးချေကာ အပြီးသတ် ခေါ်ယူခွင့် ဆိုတဲ့ ကမ်းလှမ်းမှု ပြုလုပ်ဖို့ စီစဉ်နေကြောင်း သိထားရပြီး မန်ချက်စတာ ယူနိုက်တက်အသင်း ကတော့ မာရှယ်အတွက် တရာသီ အငှားကြေး ယူရို ၁၀သန်း အထိ လိုချင်နေသလို ရာသီကုန်မှာလည်း ယူရို ၅၀သန်းနဲ့ မဖြစ်မနေ အပြီးသတ် ခေါ်ယူရမယ့် အချက်ကို ရမှသာ မာရှယ်ကို လက်လွှတ်ဖွယ် ရှိနေပါတယ်။

အသက် ၂၅နှစ် အရွယ် ပြင်သစ် တိုက်စစ်မှူး မာရှယ်ဟာ အရည်အသွေးကောင်းတွေကို ပိုင်ဆိုင်ထားသူ တဦး ဖြစ်ပေမယ့် ကြိုးကြိုးစားစား အားထုတ် ကစားလေ့ မရှိတာကြောင့် အမြဲလိုလို ဝေဖန်မှုတွေကို ခံနေရသူ တဦး ဖြစ်ပြီး အကယ်၍ အင်တာမီလန်အသင်းကသာ သူ့ကို စိတ်ကျေနပ်စေမယ့် ကမ်းလှမ်းမှု ပြုလုပ်ရင် အီတလီနိုင်ငံဆီ ပြောင်းရွှေ့နိုင်ကြောင်း မန်ချက်စတာ ညနေခင်း သတင်းဌာနကလည်း ဆိုထားပါတယ်။