လာမာစီယာရဲ့ ထုတ်ကုန်တစ်ခုဖြစ်တဲ့ လူငယ်ကြယ်ပွင့် လာမင်း ယာမဲလ်က အသင်းရဲ့ သက်တမ်းအရင့်ဆုံး ကစားသမားနဲ့ သူ့ရဲ့ တိုက်စစ်တွဲဖက်ဖြစ်တဲ့ ရောဘတ် လီဝန်ဒေါစကီးနဲ့ ပတ်သက်ပြီး သူ့ရဲ့ ခံစားချက်တွေကို ပွင့်လင်းစွာ ပြောပြခဲ့ပါတယ်။ သူတို့နှစ်ဦးကြားမှာ အမြဲတမ်း အဆင်မပြေမှုတွေ ရှိခဲ့ဖူးကြောင်း ဝန်ခံခဲ့ပါတယ်။
ဆီဗီလာနဲ့ပွဲစဉ်မှာ လီဝန်ဒေါစကီးဟာ ယာမဲလ်ကို ပြစ်တင်ဝေဖန်နေတာကို ပရိသတ်တွေ မြင်တွေ့ခဲ့ရပါတယ်။ အကြောင်းကတော့ လူငယ်ကစားသမားလေးဟာ ဂိုးသွင်းခွင့်ကောင်းတစ်ခုကို လွဲချော်ခဲ့လို့ပါ။ တိုက်စစ်မှူး လီဝန်ဒေါစကီးက ဂိုးသွင်းနိုင်တဲ့ အနေအထားမှာ ရှိနေပေမယ့် ယာမဲလ်က ကိုယ်တိုင် ဂိုးသွင်းဖို့ ကြိုးစားခဲ့ပြီး ဘားတန်းကို ထိမှန်ခဲ့တာကြောင့် လီဝန်ဒေါစကီး စိတ်ပျက်သွားခဲ့တာပါ။ လီဝန်ဒေါစကီးဟာ ယာမဲလ်ကို လက်ဟန်ခြေဟန်နဲ့ မကျေနပ်ကြောင်း ပြသခဲ့ပါတယ်။
Photo Credit : Barca Blaugranes
အသက် ၁၇ နှစ်အရွယ် ယာမဲလ်က အခုတော့ အခြေအနေအားလုံး အဆင်ပြေသွားပြီလို့ အတည်ပြု ပြောကြားခဲ့ပါတယ်။
“အရမ်းကောင်းပါတယ်။ ဒီနှစ်မှာ ကျွန်တော်တို့ အားလုံး အဆင်ပြေပါတယ်။” လို့ မွန်ဒို ဒီပို့တီဗိုက လီဝန်ဒေါ့စကီးနဲ့ သူ့ရဲ့ ဆက်ဆံရေးအကြောင်း မေးမြန်းချိန်မှာ ယာမဲလ်က ပြောပါတယ်။
“ပြီးခဲ့တဲ့နှစ်က အသင်းရော၊ တစ်ဦးချင်းအနေနဲ့ပါ အခြေအနေတွေ သိပ်မကောင်းခဲ့တာတော့ မှန်ပါတယ်။ ချန်ပီယံလိဂ်နဲ့ အခြားအရာတွေ အနိုင်ရရှိခဲ့တဲ့ ရောဘတ်လိုမျိုး ဝါရင့်ကစားသမားတွေဟာ အနည်းငယ် ပင်ပန်းနေကြပါတယ်။ ကျွန်တော်တို့လို ငယ်ရွယ်တဲ့ ကစားသမားတွေက စွမ်းအင်တွေ ပိုလျှံနေပါတယ်။
Photo Credit : SportsBoom
“ဒါက သာမာန်ပါပဲ။ ဒီလိုအရာတွေ ဖြစ်တတ်ပါတယ်။ ဒီနှစ်မှာ ကျွန်တော်တို့ အရမ်းကောင်းကောင်း လုပ်ဆောင်နေတာကို ရှင်းရှင်းလင်းလင်း မြင်နိုင်ပါတယ်။ ရာဖာရော၊ ရောဘတ်ရော ကျွန်တော်နဲ့ရော၊ ကျွန်တော်က ရာဖာနဲ့ ရောဘတ်နဲ့ရော ကျွန်တော်တို့ အဆင်ပြေပါတယ်။ ဂိုးတွေ ဆက်ပြီး သွင်းယူချင်ပါတယ်။”
ဒီကစားသမား နှစ်ဦးစလုံးဟာ ဖေဖော်ဝါရီ ၂၂ ရက် ဒီနေ့မှာ လာလီဂါပွဲစဉ်အဖြစ် လာ့စ် ပါးမက်စ်ကို ရင်ဆိုင်ရချိန်မှာ ကွင်းထဲမှာ သူတို့နှစ်ယောက်ရဲ့ တိုက်စစ်အတွဲအဖက်ကောင်းကို မျှော်လင့်နေကြပြီး လာမယ့် အင်္ဂါနေ့မှာ အက်သလက်တီကို မက်ဒရစ်နဲ့ ကိုပါဒယ်ရေး ဆီမီးဖိုင်နယ် ပထမအကျော့ပွဲစဉ်ကိုလည်း ဆက်လက် ယှဉ်ပြိုင်သွားရမှာ ဖြစ်ပါတယ်။
