မန်ချက်စတာ ယူနိုက်တက်အသင်းဟာ ဘာစီလိုနာအသင်းရဲ့ ကွင်းလယ်လူ ဖာမင် လိုပက်ဇ်ကို ခေါ်ယူဖို့အတွက် ပေါင်(၆၁)သန်းနဲ့ ကမ်းလှမ်းဖို့ ပြင်ဆင်နေကြောင်း သတင်းများက ဖော်ပြပါတယ်။ အသက်(၂၂)နှစ်အရွယ် စပိန်ကစားသမားဟာ ပြီးခဲ့တဲ့ ယူရို ၂၀၂၄ ပြိုင်ပွဲမှာ ချန်ပီယံဆုရခဲ့တဲ့ စပိန်အသင်းရဲ့ အဓိက ကစားသမားတစ်ဦးဖြစ်ပါတယ်။
ဖာမင် လိုပက်ဇ်ဟာ ဘာစီလိုနာအသင်းရဲ့ နာမည်ကျော် လာမာစီယာ အကယ်ဒမီထွက် ကစားသမားတစ်ဦးဖြစ်ပြီး ၂၀၂၃ခုနှစ်ကတည်းက အသင်းကြီးမှာ ပါဝင်ကစားခွင့် ရရှိနေခဲ့တာပါ။ လိုပက်ဇ်ဟာ ဘာစီလိုနာနဲ့အတူ လာလီဂါဖလားနဲ့ ကိုပါဒယ်ရေးဖလားတို့ကိုလည်း ရရှိထားပါတယ်။
Photo Credit : Goal
ဘာစီလိုနာမှာ ပက်ဒရီ၊ ဂါဗီ၊ ဒါနီ အော်လ်မိုနဲ့ ဖရန်ကီ ဒီဂျောင်တို့လို ထိပ်တန်းကစားသမားတွေ အများကြီးရှိနေတာကြောင့် ဖာမင်ဟာ ပွဲထွက်ကစားသမားနေရာကို အမြဲတမ်းရရှိဖို့ ရုန်းကန်နေရပါတယ်။ ဒီအချက်ကို ယူနိုက်တက်အသင်းက အခွင့်ကောင်းယူပြီး ခေါ်ယူဖို့ ကြိုးစားနေတာဖြစ်ပါတယ်။
ပြီးခဲ့တဲ့ နွေရာသီကတည်းက ယူနိုက်တက်ဟာ လိုပက်ဇ်ကို ခေါ်ယူဖို့ စိတ်ဝင်စားခဲ့ဖူးတယ်လို့လည်း သတင်းတွေက ဆိုပါတယ်။ ယူနိုက်တက်အသင်းဟာ ဒီနွေရာသီမှာ မာသီးယပ်စ် ကူညာနဲ့ ဘရိုင်ယန် အမ်ဘူမိုတို့ကို ခေါ်ယူပြီးဖြစ်ပေမဲ့ ကွင်းလယ်၊ တိုက်စစ်နဲ့ ဂိုးသမားနေရာတွေအတွက် နောက်ထပ် ကစားသမားတွေ ခေါ်ယူဖြည့်တင်းနိုင်ဖို့ကလည်း လိုအပ်နေပါတယ်။
Photo Credit : Barca Universal
ဘာစီလိုနာအသင်းနဲ့ ဖာမင် လိုပက်ဇ်တို့ဟာ စာချုပ်သက်တမ်းတိုးဖို့ ဆန္ဒရှိနေပေမဲ့ ယူနိုက်တက်က ပေါင်(၆၁)သန်းနဲ့ ကမ်းလှမ်းပြီး ဘာစီလိုနာရဲ့ ငွေကြေးအကျပ်အတည်းကို ဖြေရှင်းပေးဖို့ ကြိုးစားမှာဖြစ်ပါတယ်။ ဒါ့အပြင် လိုပက်ဇ်ရဲ့ လစာကိုလည်း နှစ်ဆတိုးပေးဖို့ ကမ်းလှမ်းပြီး ကစားသမားကို ဆွဲဆောင်သွားမယ်လို့ သိရပါတယ်။
ဒါပေမဲ့ မန်ယူဟာ ဒီနွေရာသီမှာ ကူညာနဲ့ အမ်ဘူမိုတို့အတွက် ပေါင်သန်း(၁၃၀)လောက် သုံးစွဲပြီးဖြစ်တာကြောင့် ကျန်ရှိနေတဲ့ အသုံးစရိတ်တွေကို တခြားနေရာတွေမှာ သုံးစွဲဖို့လည်း ရှိနိုင်ပါတယ်။ ဖာမင် လိုပက်ဇ် ကို ဘာစီလိုနာ ကစားသမားဟောင်း ပက်ဒရို ရိုဒရီဂက်ဇ်က “အထင်အမြင်သေးခံထားရတဲ့ ကွင်းလယ်အလုပ်သမား” လို့ ဖော်ပြဖူးပါတယ်။ ဒါကြောင့် ဖာမင်ဟာ အခြားနေရာတွေမှာလည်း ခြေစွမ်းပြနိုင်မယ်လို့ ယူဆရပါတယ်။ ဒါပေမဲ့ ယူနိုက်တက်နည်းပြ ရူဘင် အမော်ရင် ကတော့ အသင်းအတွက် လိုအပ်တဲ့နေရာတွေကို ပိုမိုဦးစားပေး ခေါ်ယူသွားဖို့ ရှိနေပါတယ်။
