မန်ချက်စတာ ယူနိုက်တက်အသင်းဟာ အသင်းရဲ့ ပင်တိုင်ဂိုးသမား အန်ဒရေ အိုနာနာကို ဒီနွေဈေးကွက်အတွင်းမှာပဲ ဆော်ဒီလိဂ်က ကလပ်အသင်းတွေဆီကို ရောင်းချပြီး သူ့နေရာအတွက် အရည်အသွေးမြင့် ဂိုးသမားတစ်ဦးကို ပြန်လည် အစားထိုး ခေါ်ယူသွားဖို့ ရှိနေတယ်လို့ သိရပါတယ်။
အသက် (၂၈)နှစ်အရွယ် ကင်မရွန်း လက်ရွေးစင် ဂိုးသမား အိုနာနာဟာ ၂၀၂၃ နွေကမှ အင်တာမီလန်ကနေ ယူနိုက်တက်အသင်းဆီ ရောက်လာခဲ့တာဖြစ်ပြီး လက်ရှိမှာတော့ ယူန်ိုက်တက်အတွက် တစ်ရာသီခွဲအတွင်း ပြိုင်ပွဲစုံ (၉၁)ပွဲအထိ ကစားထားခဲ့ပါတယ်။
Photo Credit : TNT Sports
အိုနာနာက ယူနိုက်တက်ဆီ ရောက်ရှိချိန်ကတည်းက အသင်းမှာ ပင်တိုင်ဂိုးသမားအဖြစ် ပွဲအများအပြား ပါဝင်နေရပေမယ့် အမှားအယွင်းတွေလည်း များလွန်းနေတာကြောင့် ယူနိုက်တက်ဘက်က ၂၀၂၅နွေမှာပဲ အိုနာနာကို ဆော်ဒီလိဂ်ဆီ ရောင်းချလိုက်ဖို့ စီစဉ်လာခဲ့တယ်လို့ The Sun ကနေ ဖော်ပြလာပါတယ်။
ယူနိုက်တက်က အိုနာနာအပြင် အရန်ဂိုးသမား ဘယင်ဒါကိုလည်း လက်လွတ်သွားရဖို့ ရှိနေတာကြောင့် ဂိုးသမားသစ် (၂)ဦးလောက်အထိ ပြန်လည် အားဖြည့်သွားရဖွယ် ရှိနေပြီး လတ်တလောမှာတော့ ရွိုင်ရယ် အန့်ဝပ်က ဘယ်လ်ဂျီယံ ဂိုးသမား ဆန်နီ လာမန်စ်နဲ့ လိုင်လီအသင်းက လူးကပ်စ် ချီဗယ်လီယာတို့ကို မျက်စိကျနေပါတယ်။
Photo Credit : Goal
အသက်(၂၂)နှစ်သာ ရှိသေးတဲ့ ဂိုးသမား လာမန်စ်ဟာ အခု နိုင်ငံတကာ ရက်သတ္တပတ်ကာလမှ ဘယ်လ်ဂျီယံအသင်းရဲ့ ကစားသမားစာရင်းမှာ ပထမဆုံးအကြိမ်အဖြစ် ရွေးချယ်ခံလာရသူဖြစ်ပြီး အရပ်(၆)ပေ (၄)လက်မအထိ မြင့်မားတဲ့ ဂိုးသမားအတွက် ယူနိုက်တက်က ပြောင်းရွှေ့ကြေးအဖြစ် ပေါင်သန်း(၃၀)အထိ အသုံးပြုရနိုင်ပါတယ်။
ယူနိုက်တက်ရဲ့ ပစ်မှတ်ထဲမှာ ပါဝင်နေတဲ့ အသက်(၂၃)နှစ်အရွယ် ပြင်သစ် ဂိုးသမား ချီဗယ်လီယာကတော့ ဥရောပ ထိပ်တန်းကလပ်အသင်း တော်တော်များများရဲ့ စိတ်ဝင်စားခြင်းခံနေရသူလည်း ဖြစ်သလို ဒီဂိုးသမားအတွက် ပြောင်းရွှေ့ကြေးဟာလည်း မြင့်မားဖွယ် ရှိနိုင်ပါတယ်။
