အင်္ဂလန်နည်းပြသစ် သောမတ်စ် တူဟယ်လ်ဟာ ဝင်ဘလေကွင်းမှာ အယ်လ်ဘေးနီးယားအသင်းကို (၂)ဂိုး ဂိုးမရှိနဲ့ အနိုင်ရတဲ့ ကမ္ဘာ့ဖလား ခြေစစ်ပွဲစဉ်မှာ သူ့အသင်းရဲ့ စွမ်းဆောင်ပုံနဲ့ ပတ်သက်ပြီး အရမ်းကြီး ကျေနပ်အားရမှု မရှိကြောင်းကို ထုတ်ဖော် ပြောဆိုသွားခဲ့ပါတယ်။
အင်္ဂလန်အသင်းဟာ ၂၀၂၆ ကမ္ဘာ့ဖလားခြေစစ်ပွဲ ဥရောပဇုန်အတွက် ပထမဆုံးပွဲစဉ်အဖြစ် အယ်လ်ဘေးနီးယားအသင်းနဲ့ ရင်ဆိုင်ခဲ့ရပြီး ဒီပွဲက အင်္ဂလန်နည်းပြ တူဟယ်လ်အတွက်လည်း သူရဲ့ အင်္ဂလန်နည်းပြဘဝ ပွဲဦးထွက် ဖြစ်ခဲ့သလို မိုင်းလ်စ် လူးဝစ် စကယ်လီ ၊ ဟယ်ရီကိန်းတို့ရဲ့ ဂိုးတွေနဲ့ နိုင်ပွဲရသွားခဲ့ပါတယ်။
Photo Credit : GiveMeSports
နည်းပြတူဟယ်လ်ရဲ့ လက်အောက်မှာ ပထမဆုံးအကြိမ် ကစားခဲ့ရတဲ့ အင်္ဂလန်အသင်းဟာ ပွဲချိန် ၉၀ မိနစ်အတွင်း အယ်လ်ဘေးနီးယားဘက်ကို ဂိုးကန်သွင်းမှု (၁၂)ကြိမ်အထိ လုပ်ဆောင်ခဲ့ပြီး အယ်လ်ဘေးနီးယားကတော့ တစ်ပွဲလုံးမှာ (၃)ကြိမ်သာ ဂိုးပေါက်ခြိမ်းခြောက်နိုင်ခဲ့ပါတယ်။ ဒါပေမယ့် ဂျာမန်လူမျိုး နည်းပြကတော့ သူ့ရဲ့ အင်္ဂလန်ကစားသမားတွေဆီက ပိုကောင်းတဲ့ စွမ်းဆောင်ရည်ကို မျှော်လင့်တယ်လို့ ဆိုပါတယ်။
“ကျွန်တော်တို့ ပိုကောင်းအောင် လုပ်နိုင်ပါသေးတယ်။ ပိုကောင်းအောင် လုပ်ရပါမယ်။ ကျွန်တော်တို့ ကောင်းကောင်းစခဲ့တယ်။ ဘောလုံးကို (၁၀၀)ရာခိုင်နှုန်းထိန်းချုပ်ပြီး ပေးပို့မှုတွေများများနဲ့ စွမ်းအင်အပြည့်နဲ့ (၇)-(၈)မိနစ်လောက် ကစားနိုင်ခဲ့ပါတယ်။ ပြိုင်ဘက်က အနိမ့်ပိုင်းကနေ ခံစစ်ကစားလို့ ချိုးဖျက်ဖို့ခက်ပါတယ်။ ယူရိုပြိုင်ပွဲမှာ သူတို့က ဂိုးပေါက်ခြိမ်းခြောက်ခံရတာ မရှိအောင်ထိန်းနိုင်ခဲ့ပါတယ်။”
Photo Credit : France24
“ဒုတိယပိုင်းမှာ ကျွန်တော်တို့ အလွန်နှေးကွေးတယ်လို့ ခံစားရပြီး အထူးအားဖြင့် နောက်ခံလူတွေကို ကျော်ပြီး ပြေးလွှားမှုတွေ မလုံလောက်ပါဘူး” လို့ ITV ကို သူက ပြောကြားခဲ့ပါတယ်။ ဒီပွဲမှာမှ အင်္ဂလန် စီနီယာအသင်းအတွက် ကစားခွင့်ရခဲ့သူ လူးဝစ် စကယ်လီနဲ့ ပတ်သက်ပြီးတော့လည်း တူဟယ်လ်က “အံ့သြဖွယ်ကစားသမားပါ။ အံ့သြဖွယ် ကိုယ်ရည်ကိုယ်သွေးပါ။ သူ အသင်းနဲ့ ပူးပေါင်းကတည်းက သူ့ကို ချစ်ခင်နှစ်သက်ဖို့ သာမန်ကိစ္စတစ်ခုပါပဲဆိုတာကို ချက်ချင်းပြသခဲ့ပါတယ်။”
“သူ အဲဒီလောက်ချီးကျူးခံရဖို့ ထိုက်တန်ပါတယ်” လို့ လူးဝစ်-စကဲလီကို ရည်ညွှန်းပြီး သူက ပြောကြားခဲ့ပါတယ်။ ဆက်လက်ပြီး ရပ်ရှ်ဖို့ဒ် ၊ ဖိုဒန်တို့နဲ့ ပတ်သက်ပြီးတော့လည်း “ဒီနေရာတွေမှာ ပိုပြီး သက်ရောက်မှုရှိဖို့ မျှော်လင့်ပါတယ်။ ဘောလုံးကို ပိုပြီး လိမ်ခေါက်နိုင်ဖို့နဲ့ ဂိုးဧရိယာအတွင်းကို ပိုပြီး ရဲရဲတင်းတင်း ပြေးဝင်နိုင်ဖို့ပါ။ အဲဒါတွေ လိုအပ်နေပါတယ်။ နောက်ခံလူတွေရဲ့ နောက်ကို ပြေးလွှားမှုနည်းနည်းလေးတွေကနေ ဂိုးသွင်းခွင့်တွေ ရလာမှာပါ။ သူတို့ လုပ်နိုင်သလောက် အဆုံးအဖြတ်ပေးနိုင်စွမ်း မရှိခဲ့ပါဘူး” လို့ တူဟယ်လ်က ထပ်လောင်း ပြောခဲ့ပါတယ်။
