မနေ့ညက ဝင်ဘလေကွင်းမှာ ကစားသွားခဲ့တဲ့ အင်္ဂလန်အသင်းနဲ့ လတ်ဗီယားအသင်းတို့ရဲ့ ၂၀၂၆ ကမ္ဘာ့ဖလားပြိုင်ပွဲ ဥရောပဇုန် ခြေစစ်ပွဲစဉ်မှာ အိမ်ရှင်အင်္ဂလန်ဟာ (၃)ဂိုး ဂိုးမရှိနဲ့ ဂိုးပြတ်အနိုင်ရခဲ့ပေမယ့်လည်း အနည်းငယ် ရုန်းကန်ခဲ့ရသလို လွယ်ကူတဲ့ နိုင်ပွဲတော့ မဖြစ်ခဲ့ဘူးလို့ အင်္ဂလန်နည်းပြ သောမတ်စ် တူဟယ်လ်က ဝန်ခံပြောဆိုသွားခဲ့ပါတယ်။
အင်္ဂလန်က နည်းပြတူဟယ်လ်လက်ထက် အယ်လ်ဘေးနီးယားနဲ့ လတ်ဗီးယား (၂)သင်းတို့ကို ကမ္ဘာ့ဖလား ခြေစစ်ပွဲမှာ clean sheets နိုင်ပွဲတွေနဲ့ အနိုင်ရခဲ့တာကြောင့် ဒါက ကျေနပ်စရာ ရလဒ်လို့ ဆိုနိုင်ပေမယ့်လည်း အသင်းရဲ့ စွမ်းဆောင်ရည်ပိုင်းမှာတော့ အားနည်းချက်တွေ ရှိနေသေးပြီး ပိုကောင်းတဲ့ ပြိုင်ဘက်နဲ့သာဆို ပိုခက်ခဲနိုင်ပါတယ်။
Photo Credit : Goal
အခုလည်း လတ်ဗီယားလို အသင်းနဲ့ ပွဲမှာတောင် အင်္ဂလန်က ပထမပိုင်းမှာ ဂိုးရဖို့ အတော်လေး ခက်ခဲခဲ့ရသလို ဒုတိယပိုင်း အစလောက်မှာလည်း ရုန်းကန်ခဲ့ရပါသေးတယ်။ ပထမပိုင်းမှာ ညာနောက်ခံလူ ရီးစ်ဂျိမ်းစ်ရဲ့ ဖရီးကစ်ဂိုးကြောင့် ဦးဆောင်ဂိုး ရခဲ့တာဖြစ်ပြီး ဒုတိယပိုင်းမှာတော့ အသင်းခေါင်းဆောင် ဟယ်ရီကိန်းနဲ့ လူစားဝင် ကစားသမား အက်ဇီတို့ရဲ့ ဂိုးတွေနဲ့ ဂိုးပြတ်နိုင်သွားခဲ့တာပဲ ဖြစ်ပါတယ်။
ဒီပွဲနဲ့ ပတ်သက်ပြီးတော့ အင်္ဂလန်နည်းပြ တူဟယ်လ်က “ဒီပွဲက လွယ်တာမဟုတ်ဘူး။ ကျွန်တော်တို့ ကောင်းတဲ့ အချက်တွေ အများကြီး မြင်ခဲ့ရပြီး အခွင့်အရေးကောင်းတွေလည်း ဖန်တီးနိုင်ခဲ့တယ်။ ဖရီးကစ်နဲ့မှ ပွဲကို စဖွင့်နိုင်ခဲ့တာပါ။ ကစားသမားတွေရဲ့ စိတ်ဓာတ် အင်အားနဲ့ ဆန္ဒတွေကို ကျွန်တော် သဘောကျမိပါတယ်။ ကျွန်တော်တို့ အဲဒီအဆင့်ကို ရောက်သွားမှာပါ။”
Photo Credit : Goal
“ဒါပေမယ့် ဒုတိယပိုင်း စတဲ့အခါ ကျွန်တော်တို့ ပွဲကို နှေးသွားအောင် လုပ်မိပြီး လှုပ်ရှားမှုလည်း နည်းသွားတယ်။ ဒါက အဓိပ္ပာယ်မရှိဘူး။ ဒုတိယဂိုးကတော့ ပိုကောင်းခဲ့တယ်။ ကျွန်တော်တို့ရဲ့ နံပါတ် ၆ နေရာက ကစားသမားတစ်ယောက်က အရှိန်မြှင့်ပြခဲ့တယ်။ ကျွန်တော်တို့ အားလုံးကို ဒီလို နောက်ကျ အရှိန်မြှင့်မှုတွေ လုပ်ဖို့ အားပေးထားပေမယ့် ဂိုးမရခင်အထိ အနည်းငယ် ရုန်းကန်ခဲ့ရတယ်။” လို့ ပြောခဲ့ပါတယ်။
အင်္ဂလန်အနေနဲ့ လာမယ့် ဇွန်လမှသာ တတိယမြောက် ကမ္ဘာ့ဖလား ခြေစစ်ပွဲအဖြစ် အန်ဒိုရာအသင်းနဲ့ ကစားရဦးမှာဖြစ်ပြီး အဲ့ဒီပွဲပြီးရင်တော့ အာဖရိက အင်အားကြီး ကင်မရွန်းအသင်းနဲ့ နိုင်ငံတကာ ခြေစမ်းပွဲကို ကစားရမှာ ဖြစ်ပါတယ်။
