အာဆင်နယ်အသင်းရဲ့ နာမည်ကြီး ကစားသမားသစ်ခေါ်ယူမှုဖြစ်တဲ့ အီဘီရီချီ အက်ဇေး ရောက်ရှိလာခြင်းဟာ သူတို့ရဲ့ ပရီးမီးယားလိဂ်ဖလား ရရှိရေးအတွက် လိုအပ်နေတဲ့ နောက်ဆုံးအစိတ်အပိုင်းတစ်ခု ဖြစ်ချင်မှဖြစ်လိမ့်မယ်လို့ ခရစ္စတယ် ပဲလေ့စ် နောက်ခံလူဟောင်း ဂျိမ်းစ် တွန်ကင်စ်က သတိပေးပြောကြားလိုက်ပါတယ်။

တွန်ကင်စ်က အာဆင်နယ်အသင်းအနေနဲ့ ဒုတိယနေရာကနေ ပထမနေရာကို တက်လှမ်းနိုင်ဖို့အတွက် အက်ဇေးတစ်ယောက်တည်းရဲ့ ခြေစွမ်းထက် ပိုမိုလိုအပ်လိမ့်ဦးမယ်လို့ သုံးသပ်ခဲ့တာပါ။ အာဆင်နယ်ဟာ မြောက်လန်ဒန်ပြိုင်ဘက် တော့တင်ဟမ် ဟော့စပါး ခေါ်ယူမယ်လို့ သေချာနေခဲ့တဲ့ အက်ဇေးရဲ့အပြောင်းအရွှေ့ကို ကြားဖြတ်လုယူနိုင်ခဲ့တာကြောင့် ဘောလုံးလောကကို အံ့အားသင့်စေခဲ့ပြီး ပရိသတ်အများအပြားကလည်း သူ့ကို အာတီတာရဲ့ ဖလားမျှော်မှန်းချက်အတွက် လိုအပ်နေတဲ့ နောက်ဆုံးအစိတ်အပိုင်းအဖြစ် သတ်မှတ်ခဲ့ကြပါတယ်။

Photo Credit : Goal

ပြီးခဲ့တဲ့ (၃)နှစ်ဆက်တိုက် ဒုတိယနေရာနဲ့သာ ကျေနပ်ခဲ့ရတဲ့ အာဆင်နယ်ဟာ ဒီရာသီမှာပါ ဒုတိယထပ်ရခဲ့မယ်ဆိုရင် (၄)နှစ်ဆက်တိုက် ဒုတိယရတဲ့ ပထမဆုံးအသင်းအဖြစ် မှတ်တမ်းဝင်မှာ ဖြစ်ပါတယ်။ Boyle Sports နဲ့ တွေ့ဆုံရာမှာ တွန်ကင်စ်က “သူ အာဆင်နယ်ကိုရောက်သွားပြီ။ သူက အာဆင်နယ်အတွက် ကောင်းမွန်တဲ့ ကစားသမားတစ်ယောက် ဖြစ်လာမှာ သေချာပါတယ်။ ဒါပေမဲ့ အခုချိန်မှာ လိဂ်ဖလားရဖို့အတွက် သူ့တစ်ယောက်တည်းနဲ့တော့ မလုံလောက်ဘူးလို့ ကျွန်တော်ထင်တယ်။”

“သူ့အနေနဲ့ ကစားဟန်အသစ် အသင်းအသစ် ဖိအားအသစ်တွေနဲ့ အသားကျဖို့ ပွဲအနည်းငယ်လောက် လိုအပ်ပါလိမ့်မယ်။ ခရစ္စတယ် ပဲလေ့စ်မှာတော့ သူက အဓိက ကစားသမားကြီးတစ်ယောက် ဖြစ်ခဲ့တယ်။ အခုတော့ သူက အာဆင်နယ်မှာ နံပါတ်တစ်ကစားသမား မဟုတ်တော့ဘူး။ ပြီးခဲ့တဲ့ရာသီက လူတိုင်းက သူ့ဆီကနေ ဂိုးတွေ အရာအားလုံးကို မျှော်လင့်ခဲ့ကြတယ်။”

Photo Credit : Goal

“ဒီနှစ်မှာ သူ ချန်ပီယံလိဂ်လည်း ကစားရမယ်။ ပွဲတွေအများကြီး ပိုကစားရမယ်။ ဒါက သူ့အပေါ်မှာ ဒဏ်ပိလာနိုင်ပါတယ်။ အာဆင်နယ်က ဒီနှစ်မှာ ကြီးမားတဲ့ ခြိမ်းခြောက်မှုတစ်ခု ဖြစ်လာမှာပါ။ သူတို့ ထိပ်ဆုံးနှစ်သင်းထဲ ဝင်နိုင်တယ်။ ဒါပေမဲ့ နောက်ဆုံးစည်းကို ကျော်ဖြတ်နိုင်မလားဆိုတာကိုတော့ စောင့်ကြည့်ရမှာပါပဲ။” လို့ တွန်ကင်စ်က သုံးသပ်ခဲ့ပါတယ်။

အာဆင်နယ်အသင်းဟာ အိမ်ကွင်း အမ်းမရိတ်စ်မှာ ခံစစ်ပိတ်ကစားတဲ့ အသင်းတွေကို ထိုးဖောက်ဖို့ မကြာခဏ ရုန်းကန်ခဲ့ရပြီး ကိုင်း ဟားဗက်ဇ်ရဲ့ ဒဏ်ရာပြဿနာနဲ့အတူ ပရီးမီးယားလိဂ်မှာ သက်သေပြပြီးသား အက်ဇေးရဲ့ တီထွင်ဖန်တီးနိုင်စွမ်းဟာ အဆိုပါ ခံစစ်တွေကို ထိုးဖောက်ဖို့ အဓိကတာဝန်ယူရမှာ ဖြစ်ပါတယ်။