တော့တင်ဟမ် ဟော့စပါးအသင်းရဲ့နည်းပြဖြစ်သူ သောမတ်စ် ဖရန့်ခ်က ဘုန်းမောက်အသင်းကို အိမ်ကွင်းမှာ ၀-၁ နဲ့ ရှုံးနိမ့်ခဲ့တဲ့ရလဒ်ဟာ အံ့ဩစရာမဟုတ်ဘူးလို့ စိတ်ပျက်စွာ ဝန်ခံပြောကြားလိုက်ပါတယ်။

ပွဲအစောပိုင်းမှာ အီဗန်နေးလ်ဆင် သွင်းယူခဲ့တဲ့ တစ်လုံးတည်းသောဂိုးဟာ ပွဲရဲ့အဖြေဖြစ်ခဲ့ပြီး စပါးအသင်းအနေနဲ့ ချေပဂိုးပြန်လည်ရရှိဖို့ ရုန်းကန်ခဲ့ရပါတယ်။ ရာသီအဖွင့် ပထမဆုံးနှစ်ပွဲမှာ ဘန်လေနဲ့ မန်စီးတီးတို့ကို အနိုင်ရပြီး နိုင်ပွဲဆက်နေခဲ့တဲ့ စပါးတို့ရဲ့အရှိန်အဟုန်ဟာ ဒီရှုံးပွဲကြောင့် ရပ်တန့်သွားခဲ့ရပါတယ်။ပြီးခဲ့တဲ့ နှစ်ပတ်အတွင်း ခြေစွမ်းပြကစားနိုင်ခဲ့ပေမယ့် စနေနေ့က စပါးအသင်းရဲ့ ခြေစွမ်းကတော့ အများကြီးလိုအပ်နေခဲ့ပြီး ပွဲတစ်လျှောက်လုံးမှာ ဂိုးပေါက်တည့်မှု တစ်ကြိမ်သာ ပြုလုပ်နိုင်ခဲ့ပါတယ်။

Photo Credit : NBC Sports

“ရိုးရိုးသားသားပြောရရင် ဒါက အံ့ဩစရာမဟုတ်ပါဘူး။ ဒါပေမဲ့ ကျွန်တော်မျှော်လင့်ထားတဲ့ ရလဒ်လည်း မဟုတ်ပါဘူး။ ဒီထက်ပိုကောင်းဖို့ မျှော်လင့်ခဲ့တယ်။ ကျွန်တော်တို့ ဘုန်းမောက်လို အသင်းကောင်းတစ်သင်းနဲ့ ရင်ဆိုင်ခဲ့ရတာပါ။ သူတို့ရဲ့ နောက်တန်းကျောဘက်ကို ကျော်လာတဲ့ ဘောလုံးတွေနဲ့ ဒုတိယဘောလုံးလုပွဲတွေကို ကျွန်တော်တို့ ကောင်းကောင်းမကိုင်တွယ်နိုင်ခဲ့ဘူး” လို့ ဖရန့်ခ်က ဆိုပါတယ်။

“ဘောလုံးမှာ အရာရာက မြန်မြန်ဆန်ဆန် ဖြစ်ပျက်သွားတတ်တယ်။ ကောင်းတဲ့အပိုင်းလေးတွေ ရှိခဲ့ပေမယ့် အလုံးစုံခြုံကြည့်ရင်တော့ ဒါက ခြေစွမ်းကောင်းတဲ့ ပွဲတစ်ပွဲမဟုတ်ခဲ့ပါဘူး။ တည်ငြိမ်မှုရှိပြီး ရာသီတစ်လျှောက်လုံး ခြေစွမ်းကို ထိန်းထားနိုင်ဖို့က အရေးကြီးဆုံးပါပဲ။”

Photo Credit : Sky Sports

စပါးအသင်းရဲ့ ကစားသမားသစ် ဇာဗီ ဆိုင်မွန်စ်ကတော့ ဒီပွဲစဉ်ကို ပွဲကြည့်စင်ပေါ်ကနေ လာရောက်ကြည့်ရှုခဲ့ပါတယ်။ စပါးအသင်းဟာ နိုင်ငံတကာပွဲစဉ်တွေအတွက် ရာသီရပ်နားပြီး နှစ်ပတ်အကြာမှာ ဝက်စ်ဟမ်းနဲ့ ပြန်လည်ကစားရမယ့်ပွဲမှာတော့ ဒတ်ချ်လက်ရွေးစင်ကစားသမားက သူတို့ရဲ့တိုက်စစ်ကို ပြန်လည်သွက်လက်လာအောင် ကူညီပေးနိုင်လိမ့်မယ်လို့ မျှော်လင့်နေရပါတယ်။

ဆိုင်မွန်စ် ရောက်ရှိလာခြင်းနဲ့ ပတ်သက်ပြီး ဖရန့်ခ်က “သူက ကျွန်တော်တို့အတွက် ကြီးမားတဲ့ အင်အားဖြည့်တင်းမှုတစ်ခုပါ။ ကျွန်တော်တို့ အသင်းကို တိုးတက်စေနိုင်မယ့် ကစားသမားတွေကိုပဲ အမြဲရှာဖွေနေတာပါ” လို့ ပြောကြားခဲ့ပါတယ်။ တစ်ဖက်မှာတော့ ဘုန်းမောက်အသင်းဟာ ပရီးမီးယားလိဂ်မှာ နှစ်ပွဲဆက်တိုက် နိုင်ပွဲရရှိခဲ့ပြီး ရာသီရဲ့ ပထမဆုံးအဝေးကွင်းနိုင်ပွဲလည်း ဖြစ်ခဲ့တာကြောင့် နည်းပြ အန်ဒိုနီ အီရာအိုလာကတော့ သူ့အသင်းရဲ့ခြေစွမ်းအပေါ် အလွန်ကျေနပ်ပျော်ရွှင်နေခဲ့ပါတယ်။