လေဗာကူဆင်အသင်းနည်းပြ အဲရစ် တန်ဟက်ဂ်က သူ့ရဲ့ကစားသမားတွေဟာ ၂၀၂၅-၂၆ ရာသီသစ်အတွက် အဆင်သင့်မဖြစ်သေးကြောင်း ပြင်းပြင်းထန်ထန် ဝေဖန်ပြောဆိုလိုက်ပြီး သူတို့ရဲ့ခြေစွမ်းအပေါ် တာဝန်ယူစိတ်ရှိကြဖို့ တိုက်တွန်းလိုက်ပါတယ်။
တန်ဟက်ဂ်အတွက် လေဗာကူဆင်ရဲ့ မျှော်လင့်ထားသလောက် မကောင်းတဲ့ အဖွင့်ရာသီဟာ စနေနေ့က ဝါဒါဘရီမင်နဲ့ပွဲစဉ်မှာ ဆက်လက်ဖြစ်ပွားခဲ့ပြီး သူ့အသင်းဟာ နှစ်ဂိုးပြတ်ဦးဆောင်နေတဲ့ အခြေအနေကနေ ၃-၃ ဂိုး သရေရလဒ်နဲ့သာ ကျေနပ်ခဲ့ရပါတယ်။
Photo Credit : FotMob
ပက်ထရစ် ရှစ်ခ်ရဲ့ ပင်နယ်တီဂိုးကြောင့် လေဗာကူဆင်ဟာ နှစ်ဂိုးပြတ်ဦးဆောင်မှုကို ပြန်လည်ရရှိခဲ့ပေမယ့် ပွဲပြီးခါနီးအချိန်ပိုင်းတွေမှာ အိုင်ဆက် ရှမစ်နဲ့ ကာရင်မ် ကူလီဘာလီတို့ရဲ့ သွင်းဂိုးတွေကြောင့် ဝါဒါဘရီမင်အသင်းက ချေပဂိုးတွေပြန်လည်သွင်းယူသွားခဲ့တာ ဖြစ်ပါတယ်။ ဒီရလဒ်ကြောင့် လေဗာကူဆင်ဟာ ဘွန်ဒက်စ်လီဂါအဖွင့်ပွဲစဉ် နှစ်ပွဲကစားအပြီးမှာ ရမှတ် တစ်မှတ်သာ ရရှိထားပါသေးတယ်။
မန်ချက်စတာ ယူနိုက်တက် နည်းပြဟောင်း တန်ဟက်ဂ်က သူ့အသင်းရဲ့ပြဿနာဟာ ကြံ့ခိုင်မှုပိုင်းဆိုင်ရာ အားနည်းချက်ကြောင့်ဖြစ်တယ်လို့ ဆိုခဲ့ပါတယ်။ “ကစားသမားတွေ အဆင်သင့်မဖြစ်သေးဘူး။ ကျွန်တော်တို့မှာ အသင်းသစ်တစ်သင်းရှိတယ်၊ ဒါပေမဲ့ ကစားသမားတချို့က ပွဲကစားဖို့ လုံလောက်တဲ့ ကြံ့ခိုင်မှု လုံးဝမရှိသေးဘူး။ ပွဲရဲ့နောက်ဆုံးအချိန်ပိုင်းမှာ အသင်းက လုံးဝ အလုပ်မလုပ်ခဲ့ဘူး။”
Photo Credit : FotMob
“ဒါက အရှိတရားပါပဲ။ သူတို့အနေနဲ့ ပိုမိုပြင်းထန်တဲ့ အားထုတ်မှုတွေ ယူဆောင်လာဖို့နဲ့ ကျွန်တော့်ရဲ့ စံနှုန်းတွေကို ပြည့်မီဖို့အတွက် ဒီထက်ပိုပြီး ကြံ့ခိုင်မှုကောင်းအောင် လုပ်ဖို့လိုတယ်။ နိုင်ငံတကာပွဲစဉ်များအတွက် အားလပ်ရက်ပြီးရင် ကျွန်တော်တို့ တကယ့်ပြိုင်ဆိုင်မှုတွေနဲ့ ရင်ဆိုင်ရတော့မှာဖြစ်ပြီး အသင်းတစ်သင်းအနေနဲ့ ခြေစွမ်းပြဖို့ လိုအပ်ပါတယ်။ ဒါဟာ တာဝန်ယူစိတ်နဲ့ တစ်ဦးချင်းခြေစွမ်းကောင်းတွေ ပြသခြင်းကနေ စတင်ရမှာပါ။ ပြီးတော့ သူတို့က အတူတကွ ပူးပေါင်းလုပ်ဆောင်လိုစိတ်ရှိတယ်ဆိုတာကို ကျွန်တော့်ကို သက်သေပြရပါမယ်” လို့ တန်ဟက်က ပြောကြားခဲ့ပါတယ်။
လေဗာကူဆင်အသင်းဟာ နိုင်ငံတကာပွဲစဉ်များအပြီးမှာ ခြေစွမ်းတက်နေတဲ့ ဖရန့်ဖတ်အသင်းနဲ့ ဘွန်ဒက်စ်လီဂါပွဲစဉ် ကစားရမှာဖြစ်ပြီး အဲ့ဒီနောက်မှာတော့ ကိုပင်ဟေဂင်အသင်းနဲ့ သူတို့ရဲ့ ပထမဆုံး ချန်ပီယံလိဂ်ပွဲစဉ်ကို ရင်ဆိုင်ရမှာ ဖြစ်ပါတယ်။
