မန်ချက်စတာ ယူနိုက်တက်အသင်းရဲ့ အသင်းကြီး ကစားသမားတချို့ဟာ အသင်းရဲ့ တတိယဦးစားပေးဂိုးသမား တွမ် ဟီတန်ကို ပွဲထွက်ကစားခွင့်ပေးဖို့ အချိန်တန်ပြီလို့ ယုံကြည်နေကြကြောင်း သတင်းများထွက်ပေါ်လာပါတယ်။

The Sun သတင်းစာရဲ့ ဖော်ပြချက်အရ အသင်းကြီးကစားသမားတချို့က တွမ် ဟီတန်ဟာ လေ့ကျင့်ရေးကွင်းမှာ အန်ဒရေ အိုနာနာနဲ့ အယ်လ်တေး ဘာယင်ဒါတို့ထက် ခြေစွမ်းပိုမိုကောင်းမွန်တယ်လို့ ယူဆနေကြပါတယ်။ ဒါကြောင့် နည်းပြ ရူဘင် အမိုရင်အနေနဲ့ စွန့်စားပြီး အသက် (၃၉)နှစ်အရွယ် ဝါရင့်ဂိုးသမားကြီးကို ပွဲတွေမှာ သက်သေပြခွင့်ပေးသင့်ပြီလို့ အဆိုပါကစားသမားတွေက တောင်းဆိုနေကြတာ ဖြစ်ပါတယ်။

Photo Credit : Goal

အိုနာနာနဲ့ ဘာယင်ဒါတို့အပေါ် စိတ်မသက်မသာဖြစ်မှုတွေက အစောပိုင်းကတည်းက စတင်ခဲ့တာပါ။ရာသီအဖွင့်ပွဲစဉ်မှာ ပွဲထွက်ခဲ့တဲ့ အယ်လ်တေး ဘာယင်ဒါဟာ အာဆင်နယ်ကို ရှုံးနိမ့်စေခဲ့တဲ့ တန်ဖိုးကြီးအမှားတစ်ခုကို ကျူးလွန်ခဲ့ပါတယ်။

ပြီးခဲ့တဲ့ ကာရာဘောင်းဖလားပွဲစဉ်မှာ ပွဲထွက်ခွင့်ပြန်ရခဲ့တဲ့ အန်ဒရေ အိုနာနာကလည်း ဂရမ်စဘီအသင်းကို အရှက်တကွဲရှုံးနိမ့်ခဲ့တဲ့ပွဲမှာ ကြောက်မက်ဖွယ် လက်စွမ်းကိုသာ ပြသနိုင်ခဲ့ပါတယ်။ ၂၀၂၁ ခုနှစ်မှာ အိုးလ်ထရက်ဖို့ဒ်ကို တတိယ ဦးစားပေးဂိုးသမားအဖြစ် ပြန်လည်ရောက်ရှိလာခဲ့တဲ့ တွမ် ဟီတန်ဟာ အသင်းကြီးအတွက် တရားဝင်ပွဲစဉ် မကစားခဲ့ရတာ နှစ်နှစ်ခွဲကျော် ရှိနေပြီဖြစ်ပါတယ်။ သူနောက်ဆုံး ပုံမှန်ပွဲထွက်ခွင့်ရခဲ့တာက ၂၀၁၉-၂၀ ရာသီက အက်စတွန် ဗီလာအသင်းမှာ ကစားခဲ့စဉ်က ဖြစ်ပါတယ်။ ဒါပေမဲ့ သူဟာ ယူနိုက်တက်အသင်းသားတွေကြားမှာ လူချစ်လူခင်များပြီး ကလပ်အသင်းကပါ လေးစားချစ်ခင်ရတဲ့ ကစားသမားတစ်ဦး ဖြစ်ပါတယ်။

Photo Credit : Goal

ယူနိုက်တက်အသင်းဟာ အပြောင်းအရွှေ့နောက်ဆုံးရက်မတိုင်မီ ဂိုးသမားသစ်တစ်ဦးကို ဈေးကွက်ထဲမှာ အသည်းအသန် ရှာဖွေနေပြီး ဆန်နီ လမ်းမန်းစ်နဲ့ ဆွေးနွေးမှုတွေ ပြုလုပ်နေသလို အမီလီယာနို မာတီနက်ဇ်ကိုလည်း အရံပစ်မှတ်အဖြစ် ထားရှိထားပါတယ်။ ဟီတန်ကို ပွဲထုတ်ပေးဖို့ တောင်းဆိုမှုတွေဟာ အပြောင်းအရွှေ့ဈေးကွက်မပိတ်မီ ဂိုးသမားသစ်တစ်ဦးမှ မရောက်ရှိလာခဲ့ရင်သာ ဖြစ်လာနိုင်ဖွယ် ရှိနေပါတယ်။ ယူနိုက်တက်အသင်းဟာ စက်တင်ဘာလ နိုင်ငံတကာပွဲစဉ်များအတွက် အားလပ်ရက်အပြီးမှာမှ ပွဲစဉ်ပြန်လည်ကစားရမှာဖြစ်ပြီး အဲ့ဒီပွဲကလည်း အလွန်ခက်ခဲတဲ့ပွဲတစ်ပွဲ ဖြစ်နေပါတယ်။

သူတို့ရဲ့နောက်ထပ်ပွဲစဉ်က စက်တင်ဘာလ ၁၄ ရက်နေ့မှာ ယှဉ်ပြိုင်ရမယ့် မန်ချက်စတာဒါဘီပွဲစဉ်ဖြစ်ပြီး ပြိုင်ဘက် မန်စီးတီးရဲ့ အီတီဟတ်ကွင်းမှာ သွားရောက်ကစားရမှာပါ။ ဒါကြောင့် အဆိုပါပွဲစဉ်မှာ ဘယ်သူပဲ ဂိုးသမားအဖြစ် ပါဝင်လာပါစေ (ဟီတန်ဖြစ်စေ၊ ကစားသမားသစ်ဖြစ်စေ) သူတို့အတွက် တကယ့်ကို ပြင်းထန်တဲ့ စမ်းသပ်မှုတစ်ခု ဖြစ်လာမှာ သေချာပါတယ်။