လီဗာပူးလ်နည်းပြ အာနေး စလော့က အသင်းအနေနဲ့ အခုလို အနေအထားကနေမှ ပရီးမီးယားလိဂ် အမှတ်ပေး ချန်ပီယံဆုဖလားကြီးကို အာဆင်နယ်အသင်းဆီ လက်လွှတ်လိုက်ရမယ်ဆိုရင် ဒီအခြေအနေကြီးက နှစ်ပေါင်းများစွာ ခြောက်လှန့်နေလိမ့်မယ်လို့ အသင်းသားတွေကို သတိပေး ပြောဆိုလိုက်ပါတယ်။
စလော့ရဲ့ လီဗာပူးလ်အသင်းဟာ ဘောလုံးရာသီ ကုန်ဆုံးဖို့ လိဂ်ပွဲ (၉)ပွဲလောက် ကျန်ရှိနေချိန်မှာပဲ အမှတ်ပေးဇယားထိပ်ကနေ (၁၂)မှတ်အသာနဲ့ ဦးဆောင်နေပေမယ့် နိုင်ငံတကာ ရက်သတ္တပတ် မတိုင်ခင်မှာပဲ ပီအက်စ်ဂျီ နယူးကာဆယ်တို့ကို ဆက်တိုက် ရှုံးနိမ့်ပြီး ချန်ပီယံလိဂ်ကနေ ထွက်ခွာခဲ့ရသလို ကာရာဘောင်း လိဂ်ဖလားကိုလည်း လက်လွတ်ခဲ့ရပါတယ်။
Photo Credit : Metro
အခုဆိုရင် လီဗာပူးလ်က ဒီရာသီမှာ တစ်လုံးတည်းသော ဖလားမျှော်လင့်ချက်အဖြစ် ပရီးမီးယားလိဂ်ဖလားသာ ကျန်ရှိနေတော့ပြီး အဆင့်(၂)က အာဆင်နယ်ထက် (၁၂)မှတ်တောင် သာလွန်နေတဲ့ အခြေအနေနဲ့ ဒီဖလားကို သေချာပေါက် ရယူနိုင်ခြေ ရှိနေပေမယ့်လည်း မမျှော်လင့်ဘဲ လက်လွတ်လိုက်ရတဲ့ အခြေအနေပါ ဖြစ်နိုင်ကြောင်းကို စလော့က သတိပေး ပြောဆိုလိုက်ပါတယ်။
“အဲဒါ ဘယ်လို အလုပ်လုပ်တယ်ဆိုတာ ကျွန်တော်သိပါတယ်။ နည်းပြ ဒါမှမဟုတ် ကစားသမားအနေနဲ့ ဆုဖလားတွေကို မရယူနိုင်ခဲ့ရင် နှစ်ပေါင်းများစွာ ခြောက်လှန့်ခံရနိုင်ပါတယ်။ လူတွေ မှတ်မိစေဖို့ နည်းလမ်းအမျိုးမျိုး ရှိပါတယ်။ ၁၉၇၄ ကမ္ဘာ့ဖလားတုန်းက ဟော်လန်အသင်းကို ကြည့်ပါ။ လူတိုင်းက အဲဒီ ကမ္ဘာ့ဖလားကို ဟော်လန် အနိုင်ရတယ်လို့ မြင်ခဲ့ကြတယ်။ ဒါပေမယ့် သူတို့ ဖလားကို အိမ်ပြန် မယူနိုင်ခဲ့ပါဘူး။ ဒါဟာ သူတို့ရဲ့ ကစားဟန်ကြောင့်ပါ။”
Photo Credit : DAZN
“တကယ်တော့ ကျွန်တော် ပွဲတွေ အများကြီး အနိုင်ရချင်တာပေါ့။ ဒါပေမယ့် လူတွေရဲ့ မှတ်ဉာဏ်ထဲမှာလည်း ကျန်ရစ်ချင်ပါတယ်။ ကျွန်တော့်အမြင်မှာ ဒါကလည်း ဖလားတစ်လုံးပါပဲ။ လူတွေက ကျွန်တော့်ကို တိုက်စစ်ကစားဟန်ကို အမြဲတွေးတဲ့ နည်းပြဆိုပြီး ဖော်ပြတာကို ကျွန်တော် သဘောကျပါတယ်။ တိုက်စစ်ကို ဆက်ထိန်းထားသရွေ့အနိုင်ရဖို့ အခွင့်အရေးတွေ ပိုတိုးလာပါတယ်။”
“အသင်းနဲ့အတူ စွန့်စားမှုတွေ အများကြီးယူပါ။ ဘာကြောင့်လဲဆိုတော့ ဒါက ကြောက်ရွံ့မှုတွေနဲ့ ဆုံးဖြတ်ချက်တွေ ချတာထက် ပိုပြီး အကျိုးကျေးဇူးတွေ ရလာစေမှာပါ။ နောက်ပိုင်းမှာ ပွဲတွေ ရှုံးနိမ့်ဦးမှာပါ ဒါကတော့ သေချာပါတယ်။ ဒါပေမယ့် ခံစစ်အတွေးအခေါ်နဲ့ ကစားလို့ကတော့ ဘယ်တော့မှ ရှုံးနိမ့်မှာ မဟုတ်ပါဘူး။” လို့ စလော့က ရှင်းလင်း ပြောဆိုသွားခဲ့ပါတယ်။
