ဒိန်းမတ်နဲ့ ပေါ်တူဂီအသင်းတို့ရဲ့ UEFA Nations League ပြိုင်ပွဲ ကွာတားဖိုင်နယ် ပကျော့ပွဲစဉ်မှာ ရှုံးပွဲတွေ့ထားခဲ့ရပေမယ့် ပေါ်တူဂီမှာ ပြန်ကစားမယ့် ဒုကျော့ပွဲမှာတော့ နိုင်ပွဲပြန်ရအောင် ကြိုးစားသွားမယ်လို့ ပေါ်တူဂီ စူပါစတားကြီး အသင်းခေါင်းဆောင် ခရစ္စတီယာနို ရော်နယ်လ်ဒိုက ကြုံးဝါးလိုက်ပါတယ်။
ပြီးခဲ့တဲ့ ရက်ပိုင်းက ဒိန်းမတ်မှာ ကစားသွားခဲ့တဲ့ ပွဲစဉ်မှာ ဒိန်းမတ်က လူစားဝင် တိုက်စစ်ကစားသမား ရက်စ်မတ် ဟွိုင်လန်းရဲ့ တစ်လုံးတည်းသော သွင်းဂိုးနဲ့ နိုင်ပွဲရခဲ့ပြီး အဲ့ဒီပွဲစဉ်မှာ ပေါ်တူဂီအသင်းရဲ့ စွမ်းဆောင်ရည်တွေက အတော်လေး အားနည်းခဲ့သလို ဒါကို ရော်နယ်လ်ဒိုကိုယ်တိုင်ပါ ဝန်ခံသွားခဲ့ပါတယ်။
Photo Credit : Goal
အသက်(၄၀)အရွယ် ပေါ်တူဂီ အသင်းခေါင်းဆောင်က ပထမအကျော့မှာ သူတို့အသင်းဟာ သေချာကစားနိုင်ခြင်း မရှိကြောင်း ဝန်ခံသွားခဲ့သလို ဒုကျော့ပွဲအတွက် အသင်းဖော်တွေကို လှုံဆော်စကားဆိုလိုက်ပါတယ်။ “လေထုက ပိုပြီး တင်းမာနေပါတယ်။ ဒါကို ကျွန်တော် ဖုံးကွယ်မထားပါဘူး။ ကျွန်တော်တို့ အနိုင်ရဖို့ လိုအပ်နေတာကြောင့် အခုဟာ ပိုတင်းမာတဲ့ အချိန်ပါ။”
“ဒါပေမယ့် ဒါဟာ ဘောလုံးရဲ့ လှပမှုပါပဲ။ မနက်ဖြန်မှာ ပရိသတ်တွေကို ကျွန်တော်တို့နဲ့အတူ ရှိနေဖို့ တောင်းဆိုပါတယ်။ သူတို့ရဲ့ ခွန်အားကို ကျွန်တော်တို့ဆီ ပို့ပေးဖို့ပါ။ ဘာလို့ဆို ကျွန်တော်တို့ အကောင်းဆုံး ကြိုးစားကြမှာမို့ပါ။ ဒါက ကျွန်တော့်ရဲ့ မျှော်လင့်ချက်ပါ။ မနက်ဖြန်ဟာ လူတိုင်းအတွက် လှပတဲ့ နေ့တစ်နေ့ ဖြစ်စေပါလိမ့်မယ်။”
Photo Credit : Eurosport
“တခြား ရွေးချယ်စရာ မရှိပါဘူး။ ဒီသင်္ကေတကို ဂုဏ်ယူစွာ ကိုယ်စားပြုတဲ့ ဘယ်သူမဆို ဒီလို ရည်မှန်းချက် ရှိရမှာပါ။ ကျွန်တော် မိနစ်(၉၀)မှာ ပွဲတွေ ရှုံးခဲ့ဖူးပါတယ်။ ဒါပေမယ့် ပထမပိုင်းမှာ တစ်ခါမှ မရှုံးခဲ့ပါဘူး။ မနက်ဖြန်က ဒုတိယပိုင်းပါ။ ဒီလို ပွဲမျိုးတွေ ဆိုးရွားတဲ့ နေ့တွေဆိုတာ ရှိတတ်ပါတယ်။ ကျွန်တော် လုံးဝ မကစားခဲ့ရသလိုအသင်းကလည်း လုံးဝ မကစားခဲ့ရပါဘူး။”
“ဒါပေမယ့် ဒါဟာ ဘဝရဲ့ တစ်စိတ်တစ်ပိုင်းပါပဲ။ မနက်ဖြန်မှာ ကျွန်တော် အယ်ဗလတ်ဒီ အားကစားကွင်းကနေ ခေါင်းမော့ပြီး ထွက်ခွာချင်ပါတယ်။ ပေါ်တူဂီလူမျိုး အားလုံး ကျွန်တော်တို့ဘက်မှာ အားပေးနေကြမယ် ဆိုရင်ပေါ့။” လို့ ပြောဆိုသွားခဲ့ပါတယ်။
