ဘရာဇီးလ် ဘောလုံးလောကရဲ့ ဂန္တဝင် တိုက်စစ်ကစားသမားဟောင်းကြီး ရော်နယ်ဒို နာဇာရီယိုက လက်ရှိ ဘရာဇီးအသင်းရဲ့ စူပါစတား ကစားသမား နေမာကို ၂၀၂၆ ကမ္ဘာ့ဖလားပြိုင်ပွဲကြီးနဲ့ ပတ်သက်ပြီး သတိပေးစကားနဲ့ အကြံပြုချက်စကားတွေ ပြောဆိုသွားခဲ့ပါတယ်။
နေမာဟာ အယ်လ်ဟီလာအသင်းမှာ ကစားတဲ့ အချိန်တိုလေးအတွင်း ဒဏ်ရာနဲ့ ကြံ့ခိုင်မှု ပြဿနာတွေကြောင့် ရုန်းကန်ခဲ့ရပြီး ဘရာဇီးအသင်းအတွက် ကစားပေးနိုင်ဖို့အတွက်ကိုပါ သံသယဖြစ်စရာ ဖြစ်စေခဲ့ပါတယ်။ ဘရာဇီးအသင်းရဲ့ ဂိုးအများဆုံးသွင်းထားသူ နေမာဟာ ၂၀၂၃ အောက်တိုဘာလကတည်းကနေ အခုထိ ဘရာဇီးလ် ဂျာစီကို ဝတ်ဆင်ကစားနိုင်ခဲ့ခြင်း မရှိသေးပါဘူး။
Photo Credit : BeSoccer
အခုလည်း နောက်ထပ် ဒဏ်ရာတစ်ခုကြောင့် နေမာက ဒီလထဲမှာ ဘရာဇီးလ်အတွက် ပြန်ကစားဖို့ စီစဉ်ထားရာကနေ ရွှေ့ဆိုင်းခဲ့ရပါသေးတယ်။ ဒီပုံစံအရဆိုရင် နေမာက လာမယ့်နှစ် ကမ္ဘာ့ဖလားပြိုင်ပွဲမှာ ဘရာဇီးအသင်းရဲ့ လူစာရင်းမှာ သူ့နေရာအတွက် အာမခံချက် မရှိပေမယ့်လည်း ရော်နယ်လ်ဒိုကတော့ နေမာဟာ အဲဒီမှာ ရှိနေမယ်လို့ ယုံကြည်ကြောင်းနဲ့ သူ့ကိုယ်သူတော့ စွန့်လွှတ် အနစ်နာခံရမယ်လို့ ဆိုလိုက်ပါတယ်။
Charla Podcast မှာ ရော်နယ်လ်ဒိုက “နေမာဟာ နောက်ထပ် ကမ္ဘာ့ဖလားပြိုင်ပွဲကြီးမှာ ပါဝင်နိုင်မယ်လို့ ကျွန်တော် ယုံကြည်ပါတယ်။ နေမာမှာ အံ့သြဖွယ် ဘောလုံးပါရမီတွေ ရှိပါတယ်။ ဒါပေမယ့် သူကိုယ်တိုင် စွန့်လွှတ်အနစ်နာခံရပါလိမ့်မယ်။ ဒါဟာ သူ့အပေါ်မှာပဲ မူတည်ပါတယ်။”
Photo Credit : GiveMeSport
“အဲဒါဟာ တန်ဖိုးရှိတဲ့ စွန့်လွှတ်အနစ်နာခံမှုတစ်ခုပါ။ ကမ္ဘာ့ဖလားပြိုင်ပွဲက တစ်နှစ်ပဲ လိုပါတော့တယ်။ သူ အဲဒီကို ကောင်းမွန်တဲ့ အဆင့်နဲ့ ရောက်သွားမယ်ဆိုရင် ကျွန်တော်တို့မှာလည်း အခွင့်အရေးကောင်းတစ်ခု ရှိလာပါလိမ့်မယ်။ ဒါပေမယ့် သူ စွန့်လွှတ်ရပါမယ်။ စားသောက်မှု လေ့ကျင့်မှု အိပ်စက်မှုတွေကို သူ ဂရုစိုက်ရပါလိမ့်မယ်။ လို့ ပြောကြားခဲ့ပါတယ်။
လက်ရှိမှာ အသက်(၃၃)နှစ်အရွယ်တောင် ရောက်နေပြီဖြစ်တဲ့ နေမာဟာ ကစားသမားဘဝအတွင်း ဒဏ်ရာပြဿနာတွေ ကြံ့ခိုင်မှု အားနည်းခြင်းတွေက သူရဲ့ ဘောလုံးသမားဘဝအတွက် အကြီးမားဆုံး ထိုးနှက်ချက်တွေ ဖြစ်နေရပြီး အသင်းဟောင်း ဆန်းတို့စ်ဆီ ပြန်လည် ပြောင်းရွှေ့မှုကနေ ဘရာဇီးလ်အတွက် ကစားပေးခွင့်ရဖို့ပါ မျှော်လင့်နေတာလည်း ဖြစ်ပါတယ်။
