ပေါ်တူဂီ လက်ရွေးစင်အသင်းနည်းပြ ရောဘတ်တို မာတီနက်ဇ်က အသင်းရဲ့ အသင်းခေါင်းဆောင် ဝါရင့်ကစားသမားကြီး ခရစ္စတီယာနို ရော်နယ်လ်ဒို ပါဝင်ကစားသည်ဖြစ်စေ ပါဝင်ကစားခြင်း မရှိသည်ဖြစ်စေ သူတို့အသင်းကတော့ အတူတူပါပဲလို့ ဒိန်းမတ်နဲ့ နေးရှင်းစ်လိဂ် ကွာတားဖိုင်နယ်ပွဲအပြီးမှာ ပြောဆိုသွားခဲ့ပါတယ်။
အသက်(၄၀)အရွယ် ဘာလွန်းဒေါ(၅)ကြိမ်ဆုရှင် ရော်နယ်လ်ဒိုဟာ ပေါ်တူဂီနိုင်ငံ စပို့တင်းမှာ ကျင်းပခဲ့တဲ့ ပေါ်တူဂီနဲ့ ဒိန်းမတ်တို့ရဲ့ နေးရှင်းစ်လိဂ် ကွာတား ဒုကျော့ပွဲမှာ အသင်းကို ဦးဆောင်လာရင်း ပွဲအစပိုင်းမှာ ပင်နယ်တီ ကန်သွင်းခွင့် ရခဲ့ပေမယ့် ဒီအခွင့်အရေးကို အသုံးမချနိုင်ဘဲ ဖြစ်ခဲ့ပါတယ်။ ဒါပေမယ့် အသင်းအတွက် လိုအပ်တဲ့ သွင်းဂိုးတစ်ဂိုးကိုတော့ သွင်းယူနိုင်ခဲ့ပါသေးတယ်။
Photo Credit : Goal
ပကျော့ပွဲမှာ ဒိန်းမတ်က ဟွိုင်လန်းရဲ့ ဂိုးနဲ့ အနိုင်ရထားတာမို့ အခု ဒုကျော့ပွဲဟာ ပေါ်တူဂီအတွက် အတော်လေး အရေးကြီးခဲ့ပြီး ပွဲကလည်း အပြန်အလှန် သွင်းဂိုးတွေနဲ့ ကြည့်ကောင်းခဲ့ပါတယ်။ ရော်နယ်လ်ဒိုကလည်း ပင်နယ်တီ မဝင်ခဲ့ပေမယ့် အသင်းအတွက် အရေးပါတဲ့ ဂိုးတစ်ဂိုးကို သွင်းယူပေးခဲ့ပြီး ဒုတိယပိုင်းပြီးခါနီးမှာတော့ သူ့ကို နည်းပြမာတီနက်ဇ်က ဂွန်ကာလို ရာမို့စ်နဲ့ လူစားလဲခဲ့ပါတယ်။
ရော်နယ်လ်ဒိုနေရာမှာ ဝင်ကစားလာတဲ့ ရာမို့စ်က အသင်းအတွက် ပွဲသိမ်းဂိုးကို သွင်းယူခဲ့သလို မန်ဒက်စ်နေရာ ဝင်လာခဲ့တဲ့ ထရင်ကာအိုကလည်း ပေါ်တူဂီအတွက် အရမ်းအရေးပါတဲ့ ဂိုး(၂)ဂိုးကိုပါ သွင်းယူခဲ့ပါသေးတယ်။ ဒီဂိုးနဲ့ပဲ ပေါ်တူဂီက ဒုကျော့မှာ ဒိန်းမတ်ကို အနိုင်ယူပြီး ဆီမီးဖိုင်နယ်အဆင့်ဆီ တက်လှမ်းနိုင်ခဲ့ပါတယ်။
Photo Credit : Goal
ရော်နယ်လ်ဒိုကို လူစားလဲဖို့ ဆုံးဖြတ်ခဲ့တာနဲ့ ပတ်သက်ပြီး မေးမြန်းတဲ့အခါ မာတီနက်ဇ်က သတင်းထောက်တွေကို “အသင်းက လုံးဝ အတူတူပဲလို့ ကျွန်တော်မြင်ပါတယ်။ ခရစ္စတီယာနိုက ကောင်းကောင်းကစားခဲ့ပါတယ်။ ဂွန်ကာလိုလည်း ကောင်းကောင်းကစားခဲ့ပါတယ်။ သူတို့က မတူညီတဲ့ စရိုက်လက္ခဏာတွေရှိတဲ့ ကစားသမားတွေပါ။ ကျွန်တော်က ခြားနားမှု သိပ်မတွေ့ခဲ့ပါဘူး” လို့ ပြောကြားခဲ့ပါတယ်။
ရော်နယ်လ်ဒိုဟာ နိုင်ငံတကာပွဲတွေ ပါဝင်ကစားရင်း နိုင်ပွဲအများဆုံး ရရှိထားတဲ့ ဘောလုံးသမားဆိုတဲ့ ဂင်းနစ်ကမ္ဘာ့စံချိန်တစ်ခုကို ပိုင်ဆိုင်ခဲ့တာကြောင့် ဒိန်းမတ်နဲ့ပွဲမတိုင်ခင်မှာ သူ့ကို ဂင်းနစ်ကမ္ဘာ့စံချိန်အဖွဲ့ကနေ ဂုဏ်ပြုဆုပါ ချီးမြှင့်ခဲ့ပါသေးတယ်။ ရော်နယ်လ်ဒိုဟာ ပေါ်တူဂီအတွက် (၂၁၉)ပွဲ ပါဝင်ကစားခဲ့ရင်း နိုင်ပွဲပေါင်း (၁၃၆)ပွဲအထိ ရရှိထားခဲ့တာ ဖြစ်ပါတယ်။
