အမေရိကန် လက်ရွေးစင်အသင်းနည်းပြ မာရီစီယို ပိုချက်တီနိုက ကွန်ကာကပ်ဖ် Nations League ပြိုင်ပွဲရဲ့ တတိယနေရာလုပွဲမှာ ကနေဒါကို ရှုံးနိမ့်ခဲ့ပြီးနောက် ၂၀၂၆ ကမ္ဘာ့ဖလားပြိုင်ပွဲကြီးကို ဆင်နွဲဖို့အတွက် လက်ရှိ ခြေစွမ်းပိုင်းကနေ တိုးတက်လာဖို့ သူတို့အသင်းမှာ အချိန်လုံလောက်စွာ ရှိနေတယ်လို့ ယုံကြည်ကြောင်း ပြောကြားခဲ့ပါတယ်။
ဒီနေ့မနက်အစောပိုင်း ကယ်လီဖိုးနီးယားက SoFi ကွင်းမှာ ကစားသွားခဲ့တဲ့ CONCACAF Nations League တတိယနေရာလုပွဲမှာ ကနေဒါက အမေရိကန်ကို (၂)ဂိုး (၁)ဂိုးနဲ့ အနိုင်ရခဲ့ပြီး ဒါဟာ ၁၉၅၇ခုနှစ်နောက်ပိုင်း ပထမဆုံးအကြိမ်အဖြစ်နဲ့ အမေရိကန်က ကနေဒါအသင်းကို ရှုံးနိမ့်ခဲ့ရတာလည်း ဖြစ်သလို ပြိုင်ပွဲမှာလည်း စတုတ္ထနေရာသာ ရရှိခဲ့ပါတယ်။
Photo Credit : ESPN
ဒါ့အပြင် ဒီရှုံးပွဲဟာ အမေရိကန်နည်းပြ ပိုချက်တီနိုအတွက် အမေရိကန်နည်းပြအဖြစ် (၈)ပွဲ ကိုင်တွယ်ပြီးချိန် (၃)ပွဲမြောက်ရှုံးပွဲလည်း ဖြစ်ခဲ့ရသလို ဒီနိုင်ငံတကာ ရက်သတ္တပတ်အတွင်းမှာပဲ ပနားမားနဲ့ ကနေဒါအသင်းတွေကို ဆက်တိုက် ရှုံးနိမ့်ခဲ့ရပါတယ်။ ဒီလို အခြေအနေတွေနဲ့ ပတ်သက်ပြီး ပိုချက်တီနိုက “အခု ရှုံးတာက ပိုကောင်းပါတယ်။ ဘာလို့လဲဆိုတော့ ကျွန်တော်တို့မှာ အချိန်ရှိသေးတယ်လို့ ထင်လို့ပါ။ တစ်နှစ်အကြာမှာ ဒီလို အနေအထားမျိုး ရောက်မယ်ဆိုရင် သေချာပါတယ်။”
“အဲဒီအခါကျရင် ကျွန်တော် သင်တို့ကို ‘ဟူစတန်၊ ကျွန်တော်တို့မှာ ပြဿနာရှိတယ်၊ အကူအညီတောင်းပါတယ်။ အဆိုးမြင်မနေပါနဲ့။ စိတ်မကောင်းတဲ့ ခံစားချက်တွေ မထားပါနဲ့။ ကျွန်တော်တို့ အားလုံး စိတ်ပျက်နေကြတယ်။ ပရိသတ်တွေလည်း အနိုင်မရလိုက်တာကို စိတ်ပျက်တယ်ဆိုတာ ခံစားရမှာပါ။”
Photo Credit : FotMob
“ဒါပေမယ့် ကျွန်တော်က အဆိုးမြင်စိတ်တွေ ထားခွင့်ပေးမှာ မဟုတ်ပါဘူး။ ဘာလို့လဲဆိုတော့ ကျွန်တော်တို့မှာ ကောင်းတဲ့ ကစားသမားတွေ ရှိတယ်လို့ ယုံကြည်လို့ပါ။ ကျွန်တော်တို့ စွမ်းဆောင်နိုင်မယ့် နည်းလမ်းကို ရှာတွေ့မှာပါ။ သေချာတာက ကျွန်တော်တို့ ပိုမိုကောင်းမွန်တဲ့ ပုံစံနဲ့ ယှဉ်ပြိုင်သွားမှာပါ” လို့ ပြောဆိုလိုက်ပါတယ်။
ပိုချက်တီနိုရဲ့ အမေရိကန်အသင်းဟာ ၂၀၂၆ ကမ္ဘာ့ဖလားပြိုင်ပွဲကြီးကို ကနေဒါ မက္ကဆီကိုတို့နဲ့အတူ အိမ်ရှင်အဖြစ် (၃)နိုင်ငံ ပူးတွဲကျင်းပမှာဖြစ်ပြီး ဂျပန်နဲ့ တောင်ကိုရီးယားတို့ ပူးတွဲကျင်းပခဲ့တဲ့ ၂၀၀၂ ကမ္ဘာ့ဖလားမှာသာ ကွာတားဖိုင်နယ်အထိ အမြင့်ဆုံး တက်လှမ်းနိုင်ခဲ့ကာ ၂၀၂၂ ကာတာကမ္ဘာ့ဖလားမှာတော့ (၁၆)သင်းအဆင့်ထိသာ တက်လှမ်းဖြစ်ခဲ့ပါတယ်။
