အယ်လ်ဟီလာအသင်းနဲ့ စာချုပ်ဖျက်သိမ်းပြီး အသင်းဟောင်း ဆန်းတို့စ်ဆီ ပြန်လာခဲ့တဲ့ နေမာက ကလပ်အသင်းလက်မဲ့ ဖြစ်နေတဲ့ ကွင်းလယ်လူ ပေါလ် ပေါ့ဘာနဲ့ နောက်ခံကစားသမား ဆာဂျီယို ရာမို့စ်တို့အပြင် ချယ်လ်ဆီး ပီအက်စ်ဂျီ ကစားသမားဟောင်း သီယာဂို ဆေးလ်ဗားတို့ကိုပါ ဆန်းတို့စ်အသင်းဆီ ပြောင်းလာစေချင်နေတယ်လို့ သိရပါတယ်။

အသက်(၃၂)နှစ်အရွယ် ဘရာဇီးလ် စူပါစတား တိုက်စစ်ကစားသမား နေမာဟာ ဆန်းတို့စ်အသင်းမှာ သူရဲ့ ပရော်ဖက်ရှင်နယ် ကစားသမားဘဝကို စတင်ခဲ့တာဖြစ်ပြီး အသင်းနဲ့ နှစ်ပေါင်း(၅၀)လောက် ဝေးကွာနေရတဲ့ Copa Libertadores ဖလားကြီးကိုပါ ရယူပေးနိုင်ခဲ့ပါတယ်။

Photo Credit : Mundo Deportivo

နေမာက ဆန်းတို့စ်အတွက် ၂၀၀၉ခုနှစ်ကနေ ၂၀၁၃ခုနှစ်အထိ အသင်းအတွက် ပြိုင်ပွဲစုံ ပွဲစဉ်ပေါင်း (၂၂၅)ပွဲ ကစားပေးခဲ့ပြီး (၁၃၆)ဂိုးအထိလည်း သွင်းယူနိုင်ခဲ့ပါတယ်။ ၂၀၁၃မှာတော့ နေမာက ဆန်းတို့စ်ကနေ ဘာစီလိုနာအသင်းဆီ ပြောင်းရွှေ့ခဲ့ပြီး အဲ့ဒီကနေ ပီအက်စ်ဂျီဆီ ကမ္ဘာ့စံချိန်တင် ပြောင်းရွှေ့ကြေးနဲ့ ထပ်မံ ပြောင်းရွှေ့ခဲ့သလို ပီအက်စ်ဂျီမှာ (၆)ရာသီ ကျင်လည်ပြီးချိန် ဆော်ဒီကလပ် အယ်လ်ဟီလာဆီ ပြောင်းရွှေ့ခဲ့ပြန်ပါတယ်။

ဆော်ဒီထိပ်သီးကလပ် အယ်လ်ဟီလာဆီ ရောက်သွားခဲ့တဲ့ နေမာဟာ ဒဏ်ရာ ပြဿနာတွေကြောင့် အယ်လ်ဟီလာအတွက် ပြိုင်ပွဲစုံမှာ (၇)ပွဲသာ ကစားပေးခဲ့ရပြီး သွင်းဂိုးလည်း (၁)ဂိုးတည်းပဲ သွင်းယူနိုင်ခဲ့ပါတယ်။ ဒီလို အခြေအနေတွေကြောင့် အယ်လ်ဟီလာနဲ့ နေမာတို့က စာချုပ်သက်တမ်း မကုန်ဆုံးခင်မှာပဲ နှစ်ဦးသဘောတူ စာချုပ်ဖျက်သိမ်းခဲ့ပါတယ်။

Photo Credit : Football Transfer

အယ်လ်ဟီလာနဲ့ လက်တွဲဖြုတ်ပြီး တရားဝင် အသင်းလက်မဲ့ ကစားသမား ဖြစ်သွားတဲ့ နေမာက သူရဲ့ ပထမဆုံးကလပ်အသင်း ဆန်းတို့စ်ဆီကို (၆)လစာချုပ်နဲ့ ပြန်လည် ပြောင်းရွှေ့ခဲ့ပြီး အခု နေမာက ဆန်းတို့စ်အသင်းဆီ နောက်ထပ် ကမ္ဘာကျော် ဘောလုံးသမားကြီးတွေကိုပါ ထပ်မံ ရောက်ရှိလာစေချင်နေပါတယ်။

တားမြစ်ဆေး ပြဿနာကြောင့် ဂျုဗင်တပ်စ်နဲ့ လမ်းခွဲထားရတဲ့ ကွင်းလယ်လူ ပေါ့ဘာ၊ ဆီဗီလာနဲ့ လက်တွဲဖြုတ်ပြီး လအတန်ကြာ free agent ဖြစ်နေတဲ့ နောက်ခံလူ ရာမို့စ်အပြင် ဘရာဇီးလ် ဝါရင့် နောက်ခံကစားသမားတွေဖြစ်တဲ့ မာဆယ်လိုနဲ့ သီယာဂို ဆေးလ်ဗားတို့ကိုပါ ဆန်းတို့စ်အသင်းဆီ ပြောင်းလာစေချင်နေပြီး ပေါ့ဘာနဲ့ ရာမို့စ်တို့ကိုလည်း ခေါ်ယူသွားဖို့ ဆန်းတို့စ်ထံ တောင်းဆိုသွားဖွယ် ရှိနေပါတယ်။