ဖီနာဘာချီအသင်းနည်းပြ ဂျိုဆေး မော်ရင်ဟိုဟာ မနေ့က ဂါလာတာဆာရေးအသင်းနဲ့ ရင်ဆိုင်ခဲ့ရတဲ့ အစ္စတန်ဘူလ်ဒါဘီပွဲမှာ ဂါလာတာဆာရေးရဲ့ နည်းပြ အိုကန် ဘူရက်ခ်ရဲ့ နှာခေါင်းကို ညှစ်ခဲ့တဲ့အတွက် ပြင်းထန်တဲ့ ပြစ်ဒဏ်တစ်ခု ချမှတ်ခံရနိုင်ဖွယ် ရှိနေပါတယ်။
မော်ရင်ဟိုရဲ့ ဖီနာဘာချီအသင်းဟာ တူရကီဖလား ကွာတားဖိုင်နယ်မှာ သူတို့ရဲ့ အဓိက ပြိုင်ဘက် ဂါလာတာဆာရေးကို ၂-၁ နဲ့ ရှုံးနိမ့်ခဲ့ပြီး ပြိုင်ပွဲကနေ ထွက်ခဲ့ရပါတယ်။ ဒါပေမယ့် ပွဲအပြီးမှာ မော်ရင်ဟိုက နည်းပြဘူရက်ခ်ကို ကွင်းထဲမှာ သွားရင်ဆိုင်ခဲ့တာက ပွဲရဲ့ အဓိက အာရုံစိုက်စရာ ဖြစ်လာခဲ့ပါတယ်။ ချယ်လ်ဆီး၊ ရီးယဲလ်၊ အင်တာ၊ ရိုးမား၊ မန်ယူနိုက်တက်နဲ့ စပါးတို့ရဲ့ နည်းပြဟောင်း မော်ရင်ဟိုဟာ ဘူရက်ခ်ရဲ့ နှာခေါင်းကို ညှစ်ခဲ့ပြီး ဘူရက်ခ်က မျက်နှာကို အုပ်ကိုင်ရင်း လဲကျသွားခဲ့ပါတယ်။ဒီဖြစ်ရပ်ကြောင့် ကစားသမားတွေနဲ့ အသင်းသားတွေ အုပ်စုလိုက် ရန်ဖြစ်ပွဲ ဖြစ်သွားခဲ့ပြီး ဖီနာဘာချီရဲ့ မာ့တ် ယန်ဒတ်စ်အပြင် ဂါလာတာဆာရေးရဲ့ ကီရင်မ် ဒီမာဘေးနဲ့ ဘာရစ် ယီးမားဇ်တို့ အနီကတ် ထိခဲ့ရပါတယ်။
Photo Credit : CBS Sports
မော်ရင်ဟိုဟာ သူ့ရဲ့ အပြုအမူအတွက် ပြစ်ဒဏ်ခံရမလား ဆိုတာကို အခုချိန်မှာ စောင့်ကြည့်နေရပြီး တရားဝင် စည်းမျဉ်းတွေအရ သူ့ကို ပွဲပယ်ပြစ်ဒဏ် အချိန်အကြာကြီး ခံရနိုင်တယ်လို့ သိရပါတယ်။ ဘောလုံး စည်းကမ်း စည်းမျဉ်းတွေအရ နှာခေါင်းညှစ်တာကို အားကစားစိတ်ဓာတ်နဲ့ မကိုက်ညီတဲ့ အပြုအမူအဖြစ် သတ်မှတ်ရင် မော်ရင်ဟိုဟာ (၁)ပွဲကနေ (၃)ပွဲအထိ ပွဲပယ်ခံရနိုင်ပါတယ်။ ဒါပေမယ့် ဒီလုပ်ရပ်ကို အနိုင်ကျင့်မှုအဖြစ် အဓိပ္ပာယ်ဖွင့်ဆိုရင်တော့ ဘောလုံး စည်းကမ်း ဘုတ်အဖွဲ့က မော်ရင်ဟိုကို (၅)ပွဲကနေ (၁၀)ပွဲ ဒါမှမဟုတ် (၄၅)ရက်ကနေ ရက်(၉၀)အထိ ပွဲပယ်ပြစ်ဒဏ်ပေးဖို့ အကြံပြုထားပါတယ်။
ဖီနာဘာချီအသင်းဟာ ဒီရာသီရဲ့ လက်ကျန် လိဂ်ပွဲ(၉)ပွဲ ကျန်ရှိနေသေးတာကြောင့် မော်ရင်ဟိုသာ ပိုပြင်းထန်တဲ့ ပြစ်ဒဏ်ပေးခံရရင် ဒီရာသီ လက်ကျန်ပွဲ အားလုံးကိုပါ လွဲချော်သွားရနိုင်ပါတယ်။ ဒါဟာ လိဂ်အမှတ်ပေးဇယားမှာ ထိပ်ဆုံးက ဂါလာတာဆာရေးကို လိုက်မီဖို့ ကြိုးစားနေတဲ့ ဖီနာဘာချီအတွက် ထိခိုက်မှု ကြီးမားနိုင်ပါတယ်။ ဂါလာတာဆာရေးဟာ အမှတ်ပေးဇယားထိပ်မှာ (၆)မှတ် ဖြတ်ထားပြီး ဖီနာဘာချီထက်လည်း တစ်ပွဲ ပိုကစားထားပါတယ်။
Photo Credit : Nine
ဒီအသင်းနှစ်သင်းကြား ပြိုင်ဆိုင်မှုဟာ လတ်တလော လပိုင်းတွေမှာ ပိုပြီး ပြင်းထန်လာခဲ့ပြီး မော်ရင်ဟိုက ဒီအငြင်းပွားမှုတွေရဲ့ ဗဟိုချက်မှာ ရှိနေခဲ့ပါတယ်။ ပေါ်တူဂီလူမျိုး နည်းပြ မော်ရင်ဟိုဟာ ဖေဖော်ဝါရီလမှာ ဂါလာတာဆာရေးက သူ့ကို လူမျိုးရေး ခွဲခြားတဲ့ စကားတွေ ပြောတယ်လို့ စွပ်စွဲခဲ့ပြီးနောက် ဂါလာတာဆာရေးကို တရားစွဲခဲ့ပါတယ်။ အစ္စတန်ဘူလ် ဒါဘီပွဲမှာ ဂိုးမရှိ သရေကျခဲ့ပြီးနောက် မော်ရင်ဟိုက ဂါလာတာဆာရေးရဲ့ နည်းပြအဖွဲ့က ဒိုင်လူကြီးဆီ ဆုံးဖြတ်ချက်တွေ တောင်းခံရင်း မျောက်တွေလို ခုန်ပေါက်နေတယ်လို့ ပြောခဲ့ပါတယ်။
ဒီစွပ်စွဲချက်အပြီးမှာ မော်ရင်ဟိုကို ချယ်လ်ဆီးကြယ်ပွင့်ဟောင်း ဒရော့ဘာနဲ့ အက်ဆီယန် အပါအဝင် သူ ကိုင်တွယ်ခဲ့ဖူးတဲ့ လူမည်းကစားသမားတွေက ထောက်ခံခဲ့ကြပါတယ်။ မော်ရင်ဟို ကိုယ်တိုင်လည်း Sky Sports နဲ့ အင်တာဗျူးမှာ ဂါလာတာဆာရေးက သူ့စကားတွေကို လှည့်စားခဲ့တယ်လို့ ခုခံပြောဆိုခဲ့ပါတယ်။ ဗုဒ္ဓဟူးနေ့ ဖလားပွဲအပြီးမှာတော့ ဂါလာတာဆာရေးက မော်ရင်ဟိုကို လှောင်ပြောင်တဲ့ ဗီဒီယိုတစ်ခုကို လူမှုကွန်ရက်မှာ တင်ခဲ့ပါတယ်။ အဲဒီဗီဒီယိုမှာ မော်ရင်ဟိုရဲ့ ကာတွန်းဗားရှင်းက သူတို့ကို ရှုံးနိမ့်ခဲ့တာကို ညည်းညူနေပြီး နောက်ဆုံးမှာ စိတ်ရောဂါကုဌာနမှာ နိုးလာတဲ့ ပုံစံမျိုး ဖော်ပြထားပါတယ်။ ဒီလို ရန်ငြိုးဖွဲ့မှုတွေကြောင့် အသင်းနှစ်သင်းကြား တင်းမာမှုဟာ ပိုလို့တောင် ဆိုးလာခဲ့ပါတယ်။
