ပေါ်တူဂီအသင်းနည်းပြ ရောဘတ်တို မာတီနက်ဇ်က ဒိန်းမတ်အသင်းနဲ့ ရင်ဆိုင်ခဲ့တဲ့UEFA Nations Leauge ပြိုင်ပွဲရဲ့ ကွာတားဖိုင်နယ် ပထမအကျော့ပွဲမှာ ရှုံးပွဲတွေ့ခဲ့တဲ့အပေါ် ပေါ်တူဂီအသင်းရဲ့ ညံ့ဖျင်းတဲ့ ခြေစွမ်းကို ပြင်းပြင်းထန်ထန် ဝေဖန်ခဲ့ပါတယ်။
မနေ့ညက ဒိန်းမတ်နဲ့ ပွဲစဉ်မှာ ပေါ်တူဂီအသင်းဟာ အလွန်ညံ့ဖျင်းတဲ့ ခြေစွမ်းကို ပြသခဲ့ပါတယ်။ ပေါ်တူဂီ ဂိုးသမား ဒီယိုဂို ကော်စတာရဲ့ လက်စွမ်းပြ ကာကွယ်မှုတွေက ပေါ်တူဂီအသင်းကို ပွဲထဲမှာ ဆက်လက် ရှင်သန်စေခဲ့ပေမယ့် ဒိန်းမတ် လူစားဝင် တိုက်စစ်မှူး ဟွိုင်လန်းက အိုလ်ဆန်ရဲ့ ဖြတ်တင်ဘောကို ဂိုးအဖြစ် ပြောင်းလဲပြီးနောက် ဒိန်းမတ်အသင်းက အဲ့ဒီဂိုးနဲ့ပဲ အနိုင်ရသွားခဲ့ပါတယ်။
Photo Credit : Goal
ဒါက နည်းပြ မာတီနက်ဇ်လက်အောက်မှာ ပေါ်တူဂီအသင်းအတွက် နောက်ထပ် စိတ်ပျက်စရာရလဒ်တစ်ခုဖြစ်ခဲ့ပါတယ်။ ဘယ်လ်ဂျီယံနည်းပြဟောင်းဟာ ပြီးခဲ့တဲ့ နွေရာသီမှာ ယူရို ၂၀၂၄ ခြေစစ်ပွဲမှာလည်း ပေါ်တူဂီအသင်းကို စိတ်ပျက်စရာ ဖြစ်စေခဲ့ပါတယ်။ ဒါပေမယ့် မာတီနက်ဇ်က ဒိန်းမတ်အသင်းကို ၁-၀ နဲ့ ရှုံးနိမ့်ခဲ့တာဟာ ပေါ်တူဂီအသင်းရဲ့ (၂)နှစ်အတွင်း အဆိုးရွားဆုံး ခြေစွမ်းဖြစ်တယ်လို့ ပြောကြားခဲ့ပါတယ်။
မီဒီယာတွေကို ပြောကြားရာမှာ မာတီနက်ဇ်က “အစီအစဉ်က မအောင်မြင်ခဲ့ဘူးလား။ ဟုတ်တယ်။ ကျွန်တော် သဘောတူပါတယ်။ ဒါဟာ ပြီးခဲ့တဲ့ ၂ နှစ်အတွင်း ကျွန်တော်တို့ရဲ့ အဆိုးဆုံး စွမ်းဆောင်ရည်ပါ။ ဒါပေမယ့် ဒါက အစီအစဉ်ရဲ့ ပြဿနာတော့ မဟုတ်ပါဘူး။ ပွဲအတွင်းမှာ ကျွန်တော်တို့ဟာ ဒိန်းမတ်အသင်းရဲ့ ပရိသတ် အားပေးမှုနဲ့ ပြင်းထန်တဲ့ ကစားပုံကို ရင်ဆိုင်ဖို့ လိုအပ်တဲ့ အရာတွေကို မလုပ်ဆောင်ခဲ့ပါဘူး။ ဒီလိုပွဲမျိုးတွေ ကျွန်တော်တို့ လိုအပ်ခဲ့တာပါ။”
Photo Credit : Goal
“(၅)လကြာ အနားယူခဲ့ရပြီးနောက်၊ ကျွန်တော်တို့မှာ လိုအပ်တဲ့ အားထုတ်မှု ပြင်းအားမျိုး မပါလာခဲ့ပါဘူး။ ဒိန်းမတ်ရဲ့ ဖိအားပေးမှုက အရမ်းထိရောက်ခဲ့ပါတယ်။ ဘောလုံးကို အဝေးကန်ပြီး အသင်းအနေနဲ့ တိုးတက်ဖို့ မကြိုးစားတာက ပိုလွယ်ကူခဲ့မှာပါ။ ကျွန်တော်တို့ တချို့အချိန်တွေမှာ ဒုက္ခရောက်ခဲ့ရပြီး ဒီယိုဂို ကော်စတာက ကျွန်တော်တို့ကို ဒုတိယအကျော့ပွဲမှာ ယုံကြည်မှုနဲ့ ဝင်ရောက်နိုင်ဖို့ အခွင့်အရေးပေးခဲ့ပါတယ်။”
“အားထုတ်မှု ပြင်းအား မရှိခဲ့ဘူးလား။ ဟုတ်ပါတယ်။ ကျွန်တော်တို့ အနိုင်ရဖို့ လိုအပ်တဲ့ တစ်ဦးချင်း ယှဉ်ပြိုင်မှု (duels) တွေမှာ အနိုင်မရခဲ့ပါဘူး။ ဒိန်းမတ်က ကွင်းလယ်မှာ ကစားသမားဦးရေ သာလွန်မှု ဖန်တီးဖို့ နှစ်သက်တဲ့ နေရာတွေကို ကျွန်တော်တို့ ကြိုတင် မမျှော်လင့်နိုင်ခဲ့ပါဘူး။ ဘောလုံး ဆုံးရှုံးမှု အများကြီး ရှိခဲ့သလို မြန်ဆန်တဲ့ ဘောလုံးပေးပို့မှု လမ်းကြောင်းတွေလည်း မရှိခဲ့ပါဘူး။ ဒါမျိုးက ကလပ်အသင်းမှာ နေ့တိုင်း၊ ပွဲတိုင်းမှာ ဖြစ်တတ်ပြီး အဲဒီနောက်မှာ လေ့ကျင့်ပြီး တိုးတက်အောင် လုပ်ရပါတယ်။ ကျွန်တော်တို့မှာ ညှိနှိုင်းမှုတွေ ချို့တဲ့ခဲ့ပါတယ်။ ကစားသမားတွေရဲ့ စိတ်ဓာတ်ကတော့ အံ့သြဖွယ်ကောင်းခဲ့ပေမယ့် ကျွန်တော်တို့ရဲ့ စွမ်းဆောင်ရည်က မျှော်လင့်ထားတဲ့ အဆင့်မှာ မရှိခဲ့ပါဘူး။” လို့ ပြောဆိုသွားခဲ့ပါတယ်။
