ပီအက်စ်ဂျီအသင်းနည်းပြ လူးဝစ် အင်းနရစ်က ဒီနေ့ည ပီအက်စ်ဂျီနဲ့ လီဗာပူးလ်တို့ရဲ့ ချန်ပီယံလိဂ်ပွဲမတိုင်ခင် သတင်းစာ ရှင်းလင်းပွဲမှာ သူတို့အသင်းအနေနဲ့ ချန်ပီယံလိဂ် league phase ပွဲစဉ်ထဲ မန်စီးတီးကို အနိုင်ရလိုက်ခြင်းက အသင်းအတွက် တစ်စုံတစ်ခု ပြောင်းလဲသွားခဲ့ရတယ်လို့ ရှင်းလင်း ပြောဆိုလာခဲ့ပါတယ်။
ပီအက်စ်ဂျီဟာ ဒီရာသီ ချန်ပီယံလိဂ် league phase ပွဲစဉ်တွေမှာ အာဆင်နယ် အသက်လက်တီကို ဘိုင်ယန်တို့ကို ရှုံးနိမ့်ပြီး PSV ကိုပါ သရေကျခဲ့လို့ နောက်တစ်ဆင့်တက်ဖို့ ခက်ခဲခဲ့ရပေမယ့် league phase နောက်ဆုံးပွဲလောက်မှာ မန်စီးတီးနဲ့ ကစားခဲ့ရင်း နိုင်ပွဲရရှိခဲ့တာကြောင့် ရှုံးထွက် ပလေးအော့အဆင့်ဆီ တက်လှမ်းနိုင်ခဲ့ရပါတယ်။
Photo Credit : Paris Saint Germain
ပလေးအော့အဆင့်မှာလည်း ပီအက်စ်ဂျီက လီဂူးကလပ် ဘရက်စ်ကို နှစ်ကျော့လုံး ပြတ်ပြတ်သားသား အနိုင်ယူ ကျော်ဖြတ်ခဲ့ရင်း အခု (၁၆)သင်းအဆင့်မှာ လီဗာပူးလ်အသင်းနဲ့ ရင်ဆိုင်ရတော့မှာ ဖြစ်ပါတယ်။ ဒီပွဲမတိုင်ခင်မှာ နည်းပြအင်းနရစ်က “မန်ချက်စတာ စီးတီးနဲ့ ပွဲက ကျွန်တော်တို့ အသင်းအတွက် တစ်ခုခုကို ပြောင်းလဲခဲ့တယ်လို့ ထင်ပါတယ်။ အဲဒီပွဲကို အနိုင်ရခဲ့တဲ့ ပုံစံကြောင့်ပါ”
“အခု ဒါက မတူတဲ့ ပွဲတစ်ပွဲဖြစ်တယ်။ မတူတဲ့ ကွင်းမှာ ကစားရမှာ ဖြစ်တယ်။ ဒီရာသီမှာ ဥရောပရဲ့ အကောင်းဆုံး အသင်းတစ်သင်းနဲ့ ကျွန်တော်တို့ ရင်ဆိုင်ရမှာပါ။ ဒီပွဲက ကြည့်ရတာ အရမ်းကောင်းမယ့် ပွဲတစ်ပွဲ ဖြစ်မယ်လို့ ထင်ပါတယ်။ ကျွန်တော်တို့ ဒါကို မှန်ကန်တဲ့ နည်းလမ်းနဲ့ ထိန်းချုပ် ကစားသွားနိုင်မယ်လို့ မျှော်လင့်ပါတယ်။ ဒီပွဲကို ကစားဖို့ အရမ်းမျှော်လင့်နေပါတယ်။” လို့ ပြောဆိုခဲ့ပါတယ်။
Photo Credit : beIN SPORTS
ပီအက်စ်ဂျီဟာ ချန်ပီယံလိဂ်မှာ မန်စီးတီးကို (၄)ဂိုး (၂)ဂိုးနဲ့ အနိုင်ရခဲ့ပြီးနောက်ပိုင်းကတည်းက တောက်လျှောက်ဆိုသလို ရလဒ်တွေ ကောင်းမွန်လို့နေပြီး အဲ့ဒီပွဲနောက်ပိုင်း ကစားဖြစ်ခဲ့တဲ့ ပြိုင်ပွဲစုံ (၁၁)ပွဲမှာ လုံးဝ ရှုံးပွဲမရှိခဲ့ဘဲ (၁၀)ပွဲအထိတောင် အနိုင်ရခဲ့သလို တိုက်စစ်က သွင်းဂိုးစုစုပေါင်း (၄၁)ဂိုးအထိ သွင်းယူထားနိုင်ခဲ့ပါတယ်။
ဒီလို ပုံစံကောင်းမျိုး ပြသနေတဲ့ ပီအက်စ်ဂျီက ဒီရာသီထဲ ပရီးမီးယားလိဂ်မှာရော ချန်ပီယံလိဂ်မှာပါ ဦးဆောငင်သူ ဖြစ်နေတဲ့ လီဗာပူးလ်အသင်းနဲ့ ရင်ဆိုင်ရတော့မှာက ပီအက်စ်ဂျီအတွက် ကြီးမားတဲ့ စိန်ခေါ်မှုတစ်ခု စမ်းသပ်မှုတစ်ခု ဖြစ်လာနိုင်ပြီး ၂၀၁၈တုန်းက တွေ့ဆုံမှုလို Parc des Princes မှာ လီဗာပူးလ်ကို အနိုင်ယူသွားနိုင်မလားဆိုတာ စောင့်ကြည့်သွားရပါမယ်။
