ဘာစီလိုနာအသင်းရဲ့ လူငယ်ကြယ်ပွင့် စပိန် ကွင်းလယ်ကစားသမားလေး ဖားမင်း လိုပက်ဇ်က ဒီနှစ်ဘောလုံးရာသီမှာ သူတို့အသင်းအနေနဲ့ ဥရောပ ချန်ပီယံလိဂ်ပြိုင်ပွဲကြီးရဲ့ ဗိုလ်လုပွဲအဆင့်ထိ တက်လှမ်းရောက်ရှိနိုင်လိမ့်မယ်လို့ မျှော်လင့်ထားကြောင်း ဖွင့်ဟ ပြောဆိုသွားခဲ့ပါတယ်။

ဘာစီလိုနာဟာ ဒီရာသီ ပုံစံသစ်နဲ့ ပြောင်းလဲကျင်းပနေတဲ့ ချန်ပီယံလိဂ်ပြိုင်ပွဲရဲ့ league phase မှာ (၈)ပွဲကစား (၆)ပွဲနိုင် (၁)ပွဲသရေ (၁)ပွဲရှုံး ရမှတ်(၁၉)မှတ်နဲ့ ဒုတိယနေရာမှာ ရပ်တည်နိုင်ခဲ့ပြီး ရှုံးထွက် (၁၆)သင်းအဆင့်ကိုလည်း တိုက်ရိုက် ယှဉ်ပြိုင်ခွင့် ရရှိခဲ့သလို ချန်ပီယံလိဂ်မှာပါ အောင်မြင်မှုတွေ ပြန်လည် ရယူနိုင်ဖို့ပါ ရေပန်းစားနေရပါတယ်။

Photo Credit : FC Barcelona

ဘာစီလိုနာအသင်းဟာ ချန်ပီယံလိဂ်မှာ ချန်ပီယံတွေအဖြစ် အောင်ပွဲခံနိုင်ခဲ့တာ ၂၀၁၅ခုနှစ်က နောက်ဆုံးအကြိမ် ဖြစ်ခဲ့တာကြောင့် လက်ရှိမှာဆိုရင် အောင်မြင်မှု မရခဲ့တာက ဆယ်စုနှစ်တစ်ခုလောက်အထိကို ရှိနေပြီ ဖြစ်ပါတယ်။ ၂၀၁၅နောက်ပိုင်း ၂၀၁၈-၁၉ တစ်ရာသီတည်းသာ ဆီမီးဖိုင်နယ်အထိ တက်လှမ်းနိုင်ခဲ့ပြီး မနှစ်ကလည်း ကွာတားထိပဲ ရောက်ရှိခဲ့ပါတယ်။

တကယ်တော့ ဘာစီလိုနာအသင်းက ချန်ပီယံလိဂ်ပြိုင်ပွဲသမိုင်းမှာ ပဉ္စမမြောက် အအောင်မြင်ဆုံးအသင်း ဖြစ်နေတဲ့အပြင် ဆုဖလားကိုလညး် (၅)ကြိမ်အထိ ဆွတ်ခူးထားနိုင်ခဲ့ပါတယ်။ အခုတစ်ကြိမ်မှာလည်း ဘာစီလိုနာအနေနဲ့ ဥရောပ အောင်မြင်မှုတွေ ပြန်လည် ရယူနိုင်ဖို့ အလားအလာကောင်းတွေကိုပါ ပိုင်ဆိုင်ထားရပါတယ်။

Photo Credit : Goal

လက်ရှိအခြေအနေတွေအရ ဘာစီလိုနာက လာမယ့် ချန်ပီယံလိဂ် (၁၆)သင်းအဆင့်မှာ ပီအက်စ်ဂျီ ဘင်ဖီကာ မိုနာကိုတို့ထဲက တစ်သင်းသင်းနဲ့ တွေ့ဆုံရဖွယ် ရှိနေပြီး တစ်သင်းမှ ဘာစီလိုနာအတွက် လွယ်ကူဖွယ် မရှိနိုင်ပေမယ့် ဘာစီလိုနာ ကြယ်ပွင့်လေး လိုပက်ဇ်ကတော့ သူ့အသင်းက ဖိုင်နယ်အထိတောင် တက်လှမ်းနိုင်လိမ့်မယ်လို့ မျှော်လင့်နေပါတယ်။ “အဲ့ဒီတုန်း(ဘာစီလိုနာ ချန်ပီယံလိဂ်မှာ နောက်ဆုံးအကြိမ် ဗိုလ်စွဲခဲ့စဉ်တုန်း)က ကျွန်တော် အယ်လ်ကမ်ပီလိုမှာ အိမ်မှာ ရှိနေတာပါ။”

“ကျွန်တော့်အသက် (၁၂)နှစ်ပဲ ရှိသေးတယ်။ ကျွန်တော် ဘာစီလိုနာဆီ မရောက်ခင်နှစ်ကပါ။ ကျွန်တော် မိဘတွေနဲ့ ညီလေးနဲ့အတူ ပွဲကို ကြည့်နေတာပါ။ အရမ်းပျော်ရွှင်တဲ့အချိန်ပါ။ နောက်ဆုံးမှာ ကျွန်တော်ဟာ ငယ်ငယ်ကတည်းက ဘာစီလိုနာရဲ့ ပရိသတ်တစ်ယောက်ဖြစ်ခဲ့ပြီး ဒါကလည်း အရမ်းမယုံနိုင်စရာကောင်းတဲ့ ညတစ်ညပါ။ ဒီရာသီမှာလည်း ကျွန်တော်တို့က ချန်ပီယံလိဂ်ပြိုင်ပွဲရဲ့ ဖိုင်နယ်အထိ တက်လှမ်းနိုင်ပါလိမ့်မယ်မယ်။” လို့ လိုပက်ဇ်က ပြောဆိုသွားခဲ့ပါတယ်။