ဘိုင်ယန်မြူးနစ်အသင်းရဲ့ တိုက်စစ်ကစားသမား ဟယ်ရီကိန်းဟာ ဒီနွေရာသီမှာ ပရီးမီးယားလိဂ်ဆီကို ပြန်လာဖို့ အလေးအနက် စဉ်းစားနေတယ်လို့ သတင်းတွေ ထွက်ပေါ်လာခဲ့ပြီး သူ့ကို ခေါ်ယူဖို့ ရေပန်းစားနေတဲ့ အသင်းက အသင်းဟောင်း တော့တင်ဟမ် ဟော့စပါး မဟုတ်ဘဲ လီဗာပူးလ်အသင်း ဖြစ်နေပါတယ်။
El Nacional သတင်းမီဒီယာရဲ့ အဆိုအရ ဟယ်ရီကိန်းနဲ့ နီးစပ်တဲ့ သတင်းရင်းမြစ်တွေက အသက်(၃၁)နှစ်အရွယ် ကစားသမားဟာ ရာသီအကုန်မှာ ပရီးမီးယားလိဂ်ဆီ ပြန်လာဖို့ အလေးအနက် စဉ်းစားနေကြောင်းနဲ့ အင်္ဂလန်မှာပဲ သူ့ရဲ့ ကစားသမားဘဝကို အဆုံးသတ်ချင်နေတယ်လို့လည်း ဖော်ပြထားပါတယ်။ အဲ့ဒီသတင်းမှာပဲ လီဗာပူးအသင်းက ဟယ်ရီကိန်းကို ခေါ်ယူဖို့ ရေပန်းစားနေတယ်လို့ ထပ်လောင်းဖော်ပြထားပါတယ်။
Photo Credit : Goal
ကိန်းဟာ ၂၀၂၃ ခုနှစ် နွေမှာ စပါးကနေ ဘိုင်ယန်ကို ပြောင်းရွှေ့ပြီးကတည်းက ဂျာမန်ကလပ်အတွက် ဂိုးတွေ အမြောက်အများ သွင်းယူပေးနေသလို ဒီရာသီမှုလည်း ကစားသမားဘဝရဲ့ ပထမဆုံး အဓိက ဆုဖလားကို ရယူဖို့ နီးစပ်နေပါတယ်။ ဒါပေမယ့် ဆုဖလားတွေ ရရှိခဲ့ရင် အသင်းကနေ ပြန်လည် ထွက်ခွာခွင့် ပြုနိုင်မယ့် အချက်အလက်တွေ စာချုပ်ထဲမှာ ပါဝင်နေတယ်လို့ သတင်းထွက်ပေါ်ထားတာကြောင့် ကိန်းအနေနဲ့ အင်္ဂလန်မြေဆီ တစ်ကျော့ပြန် ရောက်လာနိုင်ပါတယ်။
ကိန်းက စပါးအသင်းနဲ့အတူ ပရီးမီးယားလိဂ်မှာ နှစ်ပေါင်းများစွာ ဖြတ်သန်းခဲ့စဉ်အတွင်း ပရီးမီးယားလိဂ်သွင်းဂိုး (၂၁၃)ဂိုးအထိ သွင်းယူနိုင်ခဲ့ရင်း ပြိုင်ပွဲတစ်လျှောက် ဒုတိယမြောက် ဂိုးသွင်းအများဆုံးနေရာ ရောက်ရှိခဲ့ပြီး ထိပ်ဆုံးနေရာမှာတော့ နယူးကာဆယ်နဲ့ ဘလက်ဘန်း ကစားသမားဟောင်းကြီး အလန် ရှီးယားက ဂိုးပေါင်း(၂၆၀)နဲ့ ရပ်တည်နေပါတယ်။
Photo Credit : Goal
ဒါကြောင့် ကိန်းအနေနဲ့ ဘိုင်ယန်ကနေ ပရီးမီးယားလိဂ် အသင်းတစ်သင်းသင်းဆီ ပြောင်းရွှေ့လာမယ်ဆိုရင် ရှီးယားရဲ့ စံချိန်ကို လိုက်မီဖို့ ဒါမှမဟုတ် ကျော်ဖြတ်ဖို့ အလားအလာကောင်းတွေ ပိုင်ဆိုင်နိုင်မှာ ဖြစ်ပေမယ့် ဒီလို ပြောင်းလာဖြစ်မယ်ဆိုရင်တောင် အသင်းဟောင်း စပါးထက် လီဗာပူးလ်ဆီ ရောက်ရှိဖို့က ပိုနီးစပ်နေပါတယ်။
ကိန်းအနေနဲ့ စပါး ကစားသမားဟောင်းဖြစ်လို့ အာဆင်နယ် ချယ်လ်ဆီးတို့လို စပါးရဲ့ လန်ဒန်မြို့ခံတွေဆီ ပြောင်းရွှေ့မှာ မဟုတ်သလို ယူနိုက်တက်ကလည်း ကိန်းအတွက် ငွေကြေးသုံးစွဲဖို့ မလွယ်ကူတဲ့အပြင် မန်စီးတီးကလည်း ကိန်းကို ခေါ်ယူဖို့ မလိုတာကြောင့် တိုက်စစ်အင်အားဖြည့်ဖို့ လိုအပ်နေတဲ့ လီဗာပူးလ်သာ ကိန်းကို ခေါ်ယူနိုင်ခြေ ပိုများနိုင်ပါတယ်။
