ဂျုဗင်တပ်စ်အသင်းဟာ အသင်းရဲ့ လက်ရှိနည်းပြ သီယာဂို မော့တာနဲ့ လာမယ့်နွေမှာ လက်တွဲဖြုတ်ဖွယ် ရှိနေပြီး သူ့နေရာမှာလည်း ဘာစီလိုနာအသင်း နည်းပြဟောင်း ဇာဗီ ဟာနန်ဒက်ဇ်နဲ့ အစားထိုးသွားဖို့ပါ စီစဉ်ထားတယ်လို့ ပြင်သစ် နာမည်ကြီး သတင်းစာ L’Equipe ကနေ ဖော်ပြလာခဲ့ပါတယ်။
ဂျုဗင်တပ်စ်ဟာ ဒီရာသီအစပိုင်းမှာပဲ အသင်းနည်းပြရာထူးအတွက် ပြီးခဲ့တဲ့ ရာသီက ဘိုလော့ဂ်နာနဲ့အတူ တောက်ပခဲ့တဲ့ နည်းပြ သီယာဂို မော့တာကို ခန့်အပ်ခဲ့ပြီး မော့တာကလည်း ဒီရာသီ စီးရီးအေမှာ ပွဲစဉ်(၂၁)ပွဲအထိ လုံးဝရှုံးပွဲမရှိအောင် စွမ်းဆောင်ပေးနိုင်ခဲ့ပေမယ့် သရေပွဲချည်းပဲ (၁၃)ပွဲအထိတောင် ရှိနေခဲ့ရပါတယ်။
Photo Credit : Football Italia
ဒါ့အပြင် ဂျုဗင်တပ်စ်က စီးရီးအေ အမှတ်ပေးဇယားမှာလည်း အဆင့်(၅)နေရာသာ ရပ်တည်လို့နေပြီး ပွဲစဉ်(၂၂)မှာဆိုရင်လည်း ဇယားထိပ်က နာပိုလီကို ရှုံးနိမ့်ထားခဲ့ရပါသေးတယ်။ ပွဲစဉ်(၂၂)ပွဲမှာ နိုင်ပွဲ(၈)ပွဲသာ ရရှိအောင် စွမ်းဆောင်ထားနိုင်တဲ့အပေါ် အသင်းတာဝန်ရှိသူတွေက မော့တာကို သိပ်သဘောမကျတော့ဘဲ နည်းပြအပြောင်းအလဲ လုပ်ဆောင်ဖို့ပါ စဉ်းစားလာခဲ့ပါတယ်။
ဂျုဗင်တပ်စ်အနေနဲ့က ဒီရာသီမှ ခန့်အပ်ထားတဲ့ နည်းပြမော့တာကို နည်းပြရာထူးကနေ ချက်ချင်းထုတ်ပယ်သွားဖို့ အစီအစဉ် မရှိသေးဘဲ ရာသီကုန်အထိ ဆက်လက် အချိန်ပေးသွားဖွယ် ရှိနေပြီး ရာသီကုန်မှာပါ မော့တာရဲ့ စွမ်းဆောင်မှုတွေက စိတ်ကျေနပ်စရာမျိုး ရှိမနေဘူးဆိုရင် နည်းပြအပြောင်းအလဲ သေချာပေါက် လုပ်ဆောင်လာနိုင်ပါတယ်။
Photo Credit : Goal
အဲ့ဒီအတွက်လည်း ဂျုဗင်တပ်စ်က ဘာစီလိုနာနည်းပြဟောင်း ဇာဗီကို ပစ်မှတ်ထားလာခဲ့ပြီး မော့တာကသာ ရာသီကုန်အထိ အကောင်းဆုံး မစွမ်းဆောင်နိုင်ရင် ဇာဗီနဲ့ အစားထိုး ခန့်အပ်သွားဖို့ ရှိနေပါတယ်။ ဘာစီလိုနာ ဂန္တဝင်ကစားသမားဟောင်းနဲ့ နည်းပြဟောင်း ဇာဗီဟာ ပြီးခဲ့တဲ့ ဘောလုံးရာသီ အဆုံးမှာပဲ ဘာစီလိုနာနဲ့ လက်တွဲဖြုတ်ထားတာ ဖြစ်ပါတယ်။
ဇာဗီဟာ ဘာစီလိုနာကို ကိုင်တွယ်ခဲ့တုန်းက လာလီဂါဖလား စပိန်စူပါဖလားတွေကိုပါ ရယူပေးခဲ့ပြီး ယာမားလ်လို အရည်အသွေးမြင့် လူငယ်ကစားသမားလေးကိုပါ စတင် စင်တင်ပေးခဲ့သူလည်း ဖြစ်ပါတယ်။ ဒီရာသီထဲမှာလည်း ယူနိုက်တက်နဲ့ သတင်းတွေ ထွက်ပေါ်ခဲ့သေးပြီး အခုလည်း ဂျုဗင်တပ်စ်နဲ့ပါ သတင်းထွက်နေသလို သူ့ကိုလည်း ကလပ်အသင်း အများစုက အလိုရှိနေပါတယ်။
