ဟယ်ရီကိန်းက ဘိုင်ယန်မြူးနစ်အသင်းနဲ့ သူ့ကစားသမားဘဝရဲ့ ပထမဆုံး အဓိက ဆုဖလားကို ရယူနိုင်ခဲ့ပြီးနောက် နောက်ထပ် အောင်မြင်မှုတွေအတွက် ဆာလောင်နေကြောင်း Sky Sports ကို ပြောကြားခဲ့ပါတယ်။
ကိန်းဟာ ပြီးခဲ့တဲ့အပတ်က ဘိုင်ယန်နဲ့အတူ ဘွန်ဒက်စ်လီဂါဖလား ရရှိမှုကို အောင်ပွဲခံနေခဲ့ပြီး စနေနေ့က ရာသီရဲ့ နောက်ဆုံးပွဲစဉ်မှာ ဂိုးသွင်းယူခဲ့ကာ ဂိုးသွင်းအများဆုံးဆုကိုလည်း သိမ်းပိုက်နိုင်ခဲ့ပါတယ်။ အင်္ဂလန်အသင်းခေါင်းဆောင်က ဆုဖလားကို ကိုင်တွယ်ရတဲ့ ခံစားချက်ဟာ အထူးခြားဆုံးပါပဲလို့ ပြောခဲ့ပြီး ဘိုင်ယန်အသင်း လက်ရွေးစင်အသင်းတို့အတွက် ကြီးမားတဲ့ ဆုဖလားတွေ ထပ်မံ ပစ်မှတ်ထားနေတယ်လို့ ဆိုပါတယ်။
Photo Credit : Bavarian Football Works
ဒီရာသီ အောင်မြင်မှုအကြောင်း ကိန်းက “မယုံနိုင်စရာပါပဲ။ အကြာကြီးစောင့်ခဲ့ရတာပါ။ နီးစပ်ခဲ့တဲ့ အခိုက်အတန့်တွေ ရှိခဲ့ပေမဲ့ တရားဝင် ဖြစ်သွားတဲ့အချိန်မှာ ခံစားရတဲ့ ခံစားချက်ဟာ ကျွန်တော် မျှော်လင့်ခဲ့သမျှ အားလုံးပါပဲ။ ကြိုးစားမှုတွေ အပ်နှံမှုတွေ အများကြီးရဲ့ ရလဒ်ပါ။ ပခုံးပေါ်က ဝန်ထုပ်ဝန်ပိုးတစ်ခု ပြေသွားသလိုပါပဲ။ ခက်ခဲတဲ့ရာသီတစ်ခုရဲ့ နောက်ဆက်တွဲ အောင်ပွဲခံမှုပါပဲ။ ကျွန်တော့် ကစားသမားဘဝရဲ့ အစောပိုင်းကာလတွေမှာ ဆုဖလားတစ်ခု ရခဲ့ရင် ပိုကောင်းမယ်လို့ ထင်ခဲ့ပါတယ်။ ဒါပေမဲ့ အခုအချိန်မှာ ကျွန်တော် ရခဲ့ပါပြီ။ ဒါက လူတော်တော်များများရဲ့ အမြင်ကို ပြောင်းလဲပေးနိုင်ပါတယ်။ ပျော်ရွှင်ပေမဲ့ ကျွန်တော်တို့ ဆက်သွားရဦးမယ်။ နောက်ထပ် ဘယ်နှလုံး ထပ်နိုင်မလဲဆိုတာ ကြည့်ကြတာပေါ့။
“ကျွန်တော်ဟာ ကြီးကျယ်ခမ်းနားတဲ့ ကလပ်အသင်းမှာ ရှိနေပါတယ်။ ကျွန်တော်ကိုယ်တိုင်လည်း ကောင်းကောင်းမွန်မွန် ခံစားရပါတယ်။ ဒါကြောင့် ဆက်လက်တိုးတက်အောင်ပဲ ကြိုးစားနေပါတယ်။ ဒါက ကျွန်တော့်ကို နှေးကွေးသွားစေမှာ မဟုတ်ပါဘူး။ ရယူဖို့ အောင်မြင်မှုတွေ အများကြီး ရှိပါသေးတယ်။ ဆွတ်ခူးဖို့ ဆုဖလားတွေ အများကြီး အဲဒီထဲမှာ အကြီးမားဆုံးတွေလည်း ပါပါတယ်။ လက်ရွေးစင်အသင်းအတွက်လည်း လာမယ့်နွေရာသီမှာ ပြိုင်ပွဲရှိပါတယ်။ ကျွန်တော်တို့ တအား နီးစပ်ခဲ့ပါတယ်။ ဒါက ကျွန်တော် တစ်ယောက်တည်း မဟုတ်ဘဲ အသင်းတစ်ခုလုံး ရယူနိုင်ဖို့ ဆာလောင်နေကြတဲ့ အရာတစ်ခုဆိုတာ ကျွန်တော် သိပါတယ်။” လို့ ပြောကြားခဲ့ပါတယ်။
Photo Credit : Goal
ကိန်းရဲ့ အသင်းဟောင်း တော့တင်ဟမ်အသင်းကလည်း ဗုဒ္ဓဟူးနေ့မှာ မန်ချက်စတာ ယူနိုက်တက်နဲ့ ယူရိုပါလိဂ်ဗိုလ်လုပွဲ ယှဉ်ပြိုင်ရမှာဖြစ်ပြီး ဆုဖလားမရတာ ကြာနေတာကို အဆုံးသတ်ဖို့ အခွင့်အရေးရှိနေပါတယ်။ စပါးအသင်းရဲ့ ဂိုးအများဆုံးသွင်းထားသူဖြစ်တဲ့ ကိန်းကတော့ ဘီလ်ဘာအိုမှာ သူတို့ကိုယ်တိုင်လည်း အထူးခြားဆုံးအချိန်အခါ ရရှိစေဖို့ မျှော်လင့်နေပါတယ်။ “လိဂ်မှာတော့ တော့တင်ဟမ်အတွက် ခက်ခဲတဲ့ရာသီ ဖြစ်ခဲ့ပါတယ်။ ဒါပေမဲ့ မကြာသေးခင် သမိုင်းတစ်လျှောက် အကောင်းဆုံးရာသီတစ်ခု ဖြစ်လာစေမယ့် အခွင့်အရေး သူတို့မှာ ရှိနေပါတယ်။”
“ကျွန်တော် သေချာပေါက် သူတို့ကို အကောင်းဆုံးဖြစ်ပါစေလို့ ဆုတောင်းပေးပါတယ်။ အဲဒီမှာ ကစားသမားတွေနဲ့ ဝန်ထမ်းတွေထဲမှာ ကျွန်တော့်သူငယ်ချင်းတွေ အများကြီး ရှိပါသေးတယ်။ သူတို့အတွက်၊ ပရိသတ်တွေအတွက် ဒါက ဘယ်လောက်အရေးကြီးလဲဆိုတာ ကျွန်တော် သိပါတယ်။ ဒါက ခက်ခဲပါလိမ့်မယ်။ ယူနိုက်တက်က ပွဲကြီးပွဲကောင်းတွေမှာ အတွေ့အကြုံရှိပါတယ်။ ဒါပေမဲ့ တော့တင်ဟမ်ကတော့ ဘယ်အဆင့်မှာမဆို ယှဉ်ပြိုင်နိုင်ကြောင်း ပြသခဲ့ပြီးပါပြီ။ ဗိုလ်လုပွဲတက်ဖို့ သူတို့ ထိုက်တန်ပါတယ်။ ကျွန်တော် သေချာပေါက် စောင့်ကြည့်နေမှာပါ။ သူတို့ကို အကောင်းဆုံးဖြစ်ပါစေလို့လည်း ဆုတောင်းပေးပါတယ်။” လို့ ကိန်းက ပြောကြားခဲ့ပါတယ်။
