မန်ချက်စတာယူနိုက်တက်အသင်းရဲ့ ကစားသမားဟောင်းကြီး ဒီမီတာဘာဘာတော့ဗ်က အသင်းရဲ့ တောင်ပံကစားသမား အန်တိုနီနဲ့ ပတ်သတ်ပြီး ပြိုင်ဘက်ကစားသမားတွေအပေါ် မလိုအပ်တဲ့ ခြေယောင်ပြမှုတွေ လှည့်ဖျား ကစားမှုတွေ မလုပ်ဆောင်ပဲ ကိုယ်ရဲ့ခြေစွမ်းပိုင်းကိုသာ အာရုံစိုက်ထားဖို့ အကြုံပြု ပြောဆိုသွားခဲ့ပါတယ်။

Photo Credit : Manchester Evening News

ဘရာဇီးလ် တောင်ပံကစားသမား အန်တိုနီဟာ ဒီရာသီမှ အေဂျက်စ်ကနေ ယူနိုက်တက်အသင်းဆီ ပေါင်(၈၂)သန်းနဲ့ ပြောင်းရွှေ့ရောက်ရှိလာခဲ့တာဖြစ်ပြီး လက်ရှိအချိန်ထိ အသင်းအတွက် (၇)ဂိုး သွင်းယူထားပြီး ဂိုးဖန်တီးမှုတော့ မလုပ်ဆောင်ထားနိုင်သေးပါဘူး။ အသက်(၂၃)နှစ်အရွယ် winger ဟာ သူနဲ့ ယှဥ်ကစားတဲ့ ပြိုင်ဘက် ကစားသမားတွေကို မလိုအပ်တဲ့ လှည့်ကွက်တွေ လုပ်ဆောင်တတ်သူဖြစ်ပြီး ဒါမျိုးတွေကို လျော့ချပစ်နိုင်မယ်ဆိုရင် အသင်းအတွက်ကိုလည်း ပိုပြီး အကျိုးရှိလာနိုင်မယ်လို့ ဘာဘာတော့ဗ်က ပြောဆိုသွားခဲ့ပါတယ်။

Photo Credit : Metro

အန်တိုနီနဲ့ ပတ်သတ်ပြီး ဘာဘာတော့ဗ်က “သူ့ကို ခေါ်ယူခဲ့တာက ကောင်းမွန်တဲ့ ခေါ်ယူမှုတစ်ခုလို့ ကျွန်တော် ထင်ပါတယ်။ ဒါပေမယ့်လည်း ကျွန်တော့်အမြင်အရတော့ သူက တစ်ခါတစ်လေ ထိုက်တန်တဲ့ ဝေဖန်မှုတွေ ခံရတတ်ပါတယ်။ ဘာကြောင့်လဲဆိုတော့ သူက ကွင်းထဲမှာ ဝင့်ကြွားတဲ့ ပုံစံတွေ ထုတ်ပြတတ်ပြီးတော့ ပြိုင်ဘက်တွေကို အဆိုးမြင်စိတ် ဖြစ်လာအောင် မိုက်မိုက်မဲမဲတွေ လုပ်ဆောင်တတ်လို့ပါပဲ။ တစ်ခါတစ်လေ သူရဲ့အလိမ်အခေါက်တွေက အသင်းအတွက် ဘာမှ အကျိုးမရှိနေတတ်ပါဘူး”

Photo Credit : ESPN

“တကယ်လို့ ဒီလိုဟာတွေကိုသာ ဖယ်ရှားနိုင်လိုက်မယ်ဆိုရင်တော့ အသင်းအပေါ် သူရဲ့အကျိုးသက်ရောက်မှုတွေက များစွာ တိုးတတ်လာမှာပါ။ တကယ်လို့ ပြိုင်ဘက် ကစားသမားတွေကို ဆွပြီး ကစားမယ်ဆိုရင် ဒါက အန္တရာယ်များပါတယ်။ ကိုယ်နဲ့ ယှဥ်ကစားမယ့် ပြိုင်ဘက်တိုင်းကလည်း ကိုယ့်ကို လေးစားမှု ကင်းမဲ့လာပါလိမ့်မယ်။ ဒီအချက်တွေကို ဖယ်လိုက်နိုင်ရင်တော့ သူ ဒီထက်မက တိုးတတ်လာလိမ့်မယ်။ ဘာလို့ဆိုတော့ သူ့မှာက ကောင်းမွန်တဲ့ အရည်အသွေးတွေ အရည်အချင်းတွေ ရှိတယ်။ ဂိုးတွေ ကောင်းကောင်းလည်း ကန်သွင်းယူနိုင်တတ်တယ်” လို့ မှတ်ချက်ပြု ပြောဆိုသွားခဲ့ပါတယ်။