လီဗာပူးလ်အသင်းဟာ နယူးကာဆယ်ရဲ့ အလက်ဇန်းဒါး အီဆက်ခ်ကို ခေါ်ယူဖို့ ကြိုးပမ်းမှုတွေကို အရှိန်မြှင့်တင်နေပါတယ်။ ဒီအပြောင်းအရွှေ့ဟာ ၂၀၂၅ ခုနှစ် နွေရာသီ အပြောင်းအရွှေ့ဈေးကွက်ရဲ့ ထင်ရှားတဲ့ ခေါ်မှုတွေထဲက တစ်ခုဖြစ်လာနိုင်ပါတယ်။ အန်ဖီးလ်အခြေစိုက်အသင်းဟာ ဆွီဒင်တိုက်စစ်မှူးကို ခေါ်ယူဖို့ တရားဝင် စိတ်ဝင်စားကြောင်း ထုတ်ဖော်ပြောကြားခဲ့ပြီး ပြောင်းရွှေ့ကြေးကိုလည်း ပေါင်သန်း(၁၂၀)ဝန်းကျင်အထိ သုံးစွဲဖို့ နယူးကာဆယ်နဲ့ ဆွေးနွေးထားတယ်လို့ သတင်းတွေက အတည်ပြုခဲ့ပါတယ်။

လီဗာပူးလ်ဟာ အပြောင်းအရွှေ့ဈေးကွက်မှာ အတက်ကြွဆုံး ပရီးမီးယားလိဂ်ကလပ်တွေထဲက တစ်ခုအဖြစ် ရှိနေပြီးသားပါ။ လီဗာပူးလ်ဟာ ဂျာမန်ကြယ်ပွင့် ဖလော်ရီယန် ဝါ့ဇ်၊ ဟန်ဂေရီဘယ်နောက်ခံလူ မီလော့စ် ကားကက်ဇ်နဲ့ ဘက်စုံသုံး တောင်ပံနောက်ခံလူ ဂျယ်ရမီ ဖရင်ပေါင် အပါအဝင် ထင်ရှားတဲ့ ကစားသမားသစ်များစွာကို ခေါ်ယူခဲ့ပါတယ်။ ဒီကစားသမားတွေအတွက် စုစုပေါင်း ခန့်မှန်းခြေ ပေါင်(၁၈၅)သန်း ကုန်ကျခဲ့ပြီး ဒါဟာ ပြိုင်ပွဲတိုင်းမှာ ယှဉ်ပြိုင်နိုင်တဲ့ အသင်းတစ်သင်း တည်ဆောက်လိုတဲ့ သူတို့ရဲ့ ရည်ရွယ်ချက်ကို မီးမောင်းထိုးပြနေပါတယ်။

Photo Credit : Goal

ဒီလိုများပြားတဲ့ အသုံးစရိတ်တွေ ရှိနေပေမဲ့လည်း လီဗာပူးလ်ဟာ ငွေကြေးအရ ခိုင်မာတဲ့ အနေအထားမှာ ရှိနေသေးပြီး အသုံးစရိတ် ကန့်သတ်ချက်တွေကို ချိုးဖောက်ခြင်းမရှိဘဲ အီဆက်ခ်လိုမျိုး နောက်ထပ် ကြီးမားတဲ့ ခေါ်ယူမှုတစ်ခု ပြုလုပ်နိုင်ဖို့ အခန်းလွတ်ရှိနေတယ်လို့ သတင်းတွေက ဖော်ပြပါတယ်။ နည်းပြ အာနေး ဆလော့က အီဆက်ခ်ကို သူတို့တိုက်စစ်ရဲ့ အဓိက ကစားသမားဖြစ်လာစေဖို့ ပြင်ဆင်နေပြီး နွေရာသီမှာ အပြင်းအထန် ပြန်လည်တည်ဆောက်မှုတွေကို ဆက်လုပ်နေပါတယ်။ ဒါ့အပြင် ဒါဝင် နူးညက်ဇ် ထွက်ခွာနိုင်ခြေရှိတာကလည်း ဆွီဒင်တိုက်စစ်မှူးအတွက် ရင်းနှီးမြှုပ်နှံမှုရဲ့ အစိတ်အပိုင်း အများအပြားကို ပြန်လည်ရရှိဖို့ ကူညီပေးပါလိမ့်မယ်။

ဘောလုံးဘဏ္ဍာရေးဆိုင်ရာ ကျွမ်းကျင်သူ ကီရန် မက်ဂွိုင်းယားက TBR Football ကို လီဗာပူးလ်ရဲ့ ငွေကြေးအခြေအနေနဲ့ ပတ်သက်ပြီး ရှင်းလင်းစွာ ရှင်းပြခဲ့ပါတယ်။ မက်ဂွိုင်းယားရဲ့ ပြောကြားချက်အရ လီဗာပူးလ်ဟာ အရင်က ချွေတာခဲ့မှု စမတ်ကျတဲ့ ကစားသမားရောင်းဝယ်မှုနဲ့ ကျန်းမာတဲ့ ငွေကြေးရလဒ်များ ပေါင်းစပ်မှုကြောင့် နောက်ထပ် ရင်းနှီးမြှုပ်နှံမှုတွေ ပြုလုပ်နိုင်မယ့် ခိုင်မာတဲ့ အနေအထားမှာ ရှိနေပါတယ်။

Photo Credit : Football Transfer

“လီဗာပူးလ်ဟာ ခိုင်မာတဲ့ အနေအထားမှာ ရှိနေပါတယ်။ သူတို့က ပြီးခဲ့တဲ့နှစ်က အပြောင်းအရွှေ့ဈေးကွက်မှာ တိတ်ဆိတ်ခဲ့ပြီး အရန်ကစားသမား တစ်ဦးစ နှစ်ဦးစ ရောင်းချခဲ့ပါတယ်။ တခြားသူတွေလည်း ထွက်ခွာနိုင်ခြေရှိပါတယ်။ လူးဝစ် ဒီယက်ဇ်လည်း ထွက်ခွာမယ်လို့ သတင်းတွေ ထွက်နေတော့ ဒါက ကစားသမားတစ်ဦး ထွက်ပြီး တစ်ဦးဝင်တဲ့ ပုံစံမျိုး ဖြစ်လာပါလိမ့်မယ်။ အီဆက်ခ်သာ ဝင်လာခဲ့ရင် အဆင့်မြှင့်တင်မှုတစ်ခုအဖြစ် လူအများစုက သတ်မှတ်ကြမှာပါ။ လီဗာပူးလ်ဟာ ထိပ်ဆုံးကနေ အောက်ခြေအထိ အလွန်ကောင်းမွန်စွာ စီမံခန့်ခွဲတဲ့ အဖွဲ့အစည်းတစ်ခုပါ။ သူတို့မှာ ငွေကြေးရော၊ PSR/အသင်းရဲ့ ကုန်ကျစရိတ် စည်းမျဉ်းတွေအရပါ ဒီနွေရာသီမှာ ငွေအများကြီး သုံးစွဲနိုင်တဲ့ စွမ်းဆောင်ရည်ရှိပါတယ်။ အီဆက်ခ်ကတော့ သူတို့ ဖြေရှင်းချင်တဲ့ နေရာတစ်ခု ဖြစ်နေတာ သေချာပါတယ်” လို့ မက်ဂွိုင်းယားက ရှင်းပြခဲ့ပါတယ်။

လီဗာပူးလ်ဟာ ပြီးခဲ့တဲ့ မေလ ၃၁ ရက်နေ့မှာ ကုန်ဆုံးခဲ့တဲ့ ဘဏ္ဍာရေးနှစ်အတွက် ပေါင်(၄၈)သန်း အမြတ်အစွန်းရှိခဲ့တယ်လို့ ဖော်ပြခဲ့ပါတယ်။ ဒီပမာဏကို သုံးနှစ်တာကာလအတွင်း ခွင့်ပြုထားတဲ့ စုစုပေါင်းအရှုံး ပေါင်(၁၀၅)သန်းနဲ့ ပေါင်းလိုက်တဲ့အခါ မာဆေးဆိုက်ဒ် အသင်းကြီးဟာ လိဂ်စည်းမျဉ်းတွေအရ ထိရောက်တဲ့ ပေါင်(၁၅၃)သန်း အပိုငွေ လိုအပ်ချက်ရှိပါတယ်။ ဒါ့အပြင် ကလပ်ရဲ့ ဝင်ငွေဟာ စီးပွားရေးဆိုင်ရာ ဝင်ငွေ တိုးမြင့်လာမှုနဲ့ ချန်ပီယံလိဂ်မှာ အဆင့်မြင့်အထိ တက်လှမ်းနိုင်ခဲ့မှုတွေကြောင့် တစ်နှစ်တာအတွက် ပေါင် သန်း(၇၀၀)ကျော်ရှိခဲ့တယ်လို့ သိရပါတယ်။ ဒီအချက်အလက်တွေက လီဗာပူးလ်ဟာ ဒီနွေရာသီမှာ သီအိုရီအရ ပေါင်သန်း(၂၀၀)အထိ ပိုမိုသုံးစွဲနိုင်ပြီး PSR လိုအပ်ချက်တွေနဲ့ ကိုက်ညီနေဦးမှာ ဖြစ်တယ်ဆိုတာကို ပြသနေပါတယ်။