ဒီဘောလုံးရာသီမှာ နော်တင်ဟမ် ဖောရက်စ်အသင်းအတွက် အထူးခြေစွမ်းပြနေတဲ့ တိုက်စစ်ကစားသမား ခရစ်ဝုဒ်ဟာ နယူးဇီလန်အသင်းနဲ့အတူ နိုင်ငံတကာပွဲစဉ်မှာ ထူးဆန်းတဲ့ အဝါကတ်ပြား ပြသခံခဲ့ရပါတယ်။
၂၀၂၄-၂၅ ဘောလုံးရာသီမှာ နော်တင်ဟမ်အတွက် ပရီးမီးယားလိဂ်ဂိုး (၁၈)ဂိုးအထိ သွင်းယူထားတဲ့ အသက်(၃၃)နှစ်အရွယ် တိုက်စစ်မှူးဟာ သူ့နိုင်ငံအတွက် အရေးပါတဲ့ ကစားသမားတစ်ဦးလည်း ဖြစ်သလို နယူးဇီလန်အသင်းအတွက် (၈၁)ပွဲကစားထားခဲ့ပြီး (၄၄)ဂိုးအထိတောင် ရှိလာခဲ့ပါတယ်။
Photo Credit : Goal
ခရစ်ဝုဒ်ဟာ ၂၀၂၆ ကမ္ဘာ့ဖလားခြေစစ်ပွဲမှာ ဖီဂျီအသင်းကို (၇)ဂိုးပြတ်နဲ့ အနိုင်ရရှိတဲ့ပွဲမှာ ဟက်ထရစ် သွင်းယူခဲ့ပြီး ဂိုးအားလုံးကို ခေါင်းတိုက် သွင်းယူခဲ့သလို ပွဲချိန်(၆၂)မိနစ်မှာပဲ လူစားလဲခဲ့ရပါတယ်။ ဝုဒ်ဟာ လူစားလဲခံရပြီးနောက် ပရိသတ်တွေအတွက် လက်မှတ်ထိုးပေးနေရင်း မမျှော်လင့်ဘဲ ကွင်းလယ်ဒိုင်က သူ့ကို အဝါကတ်ပြား ပြသသွားခဲ့ပါတယ်။
ဒီအခြေအနေနဲ့ ပတ်သက်ပြီး ဝါရင့် ကစားသမားကြီး ဝုဒ်က “စည်းမျဉ်းတွေက အဲဒီလိုဆိုလည်း အဲဒီလိုပါပဲ။ ကောင်းတဲ့အရာတစ်ခုကို လုပ်ပြီး ပရိသတ်တွေအတွက် လက်မှတ်ထိုးပေးဖို့ ကြိုးစားခဲ့တာပါ။” လို့ သတင်းထောက်တွေကို ပြောကြားခဲ့ပါတယ်။ ဝုဒ်ဟာ ပွဲပယ်ခံရမယ့် အခြေအနေမျိုး မရှိတာကြောင့် အဲဒီအဖြစ်အပျက်အပေါ် ရယ်ရယ်မောမောနဲ့သာ တုံ့ပြန်သွားခဲ့ပါတယ်။
Photo Credit : NZ Football
နယူးဇီလန်အနေနဲ့ လာမယ့် တနင်းလာနေ့ ဖီဖာအဆင့် (၁၅၂)မှာ ရှိနေတုဲ့ နယူးကယ်လီဒိုးနီးယားအသင်းနဲ့ ပွဲစဉ်မှာသာ အနိုင်ရရှိခဲ့ရင် လာမယ့်နှစ် နွေရာသီမှာ အမေရိကန်၊ ကနေဒါနဲ့ မက္ကဆီကို (၃)နိုင်ငံ ပူးတွဲကျင်းပသွားမယ့် ၂၀၂၆ ကမ္ဘာ့ဖလားပြိုင်ပွဲကြီးကို ပါဝင်ဆင်နွဲခွင့် ရရှ်ိသွားတော့မှာပဲ ဖြစ်ပါတယ်။
နယူးဇီလန်အသင်းဟာ ၁၉၈၂ ခုနှစ်နဲ့ ၂၀၁၀ ခုနှစ်တို့မှာ ကမ္ဘာ့ဖလားပြိုင်ပွဲကို တက်ရောက်ခဲ့ဖူးပြီး သူတို့ရဲ့ တတိယမြောက် ကမ္ဘာ့ဖလားခြေစစ်ပွဲကို အောင်မြင်အောင် လုပ်ဆောင်ဖို့လည်း ကြိုးစားနေပါတယ်။ သူတို့ဟာ ဖီဖာရဲ့ အဓိကပြိုင်ပွဲမှာ တစ်ပွဲမှ အနိုင်ရရှိခဲ့ခြင်း မရှိပါဘူး။ ဝုဒ်ဟာ အဲဒါကို ပြောင်းလဲပေးနိုင်ဖို့ ကူညီပေးနိုင်ပြီး ကလပ်အသင်းအဆင့်မှာ ဖောရက်စ်အသင်းနဲ့အတူ ချန်ပီယံလိဂ်ဝင်ခွင့်ကိုလည်း လိုက်လံရှာဖွေနေပါတယ်။
