ချယ်လ်ဆီးအသင်းဟာ စပို့တင်းလစ္စဘွန်းအသင်းက လူငယ်ကစားသမားလေးတွေဖြစ်တဲ့ ဂျီယိုဗန်နီ ကွင်ဒါနဲ့ ဒါရီယို အက်ဆူဂိုတို့ကို နှစ်ဦးပေါင်း ပြောင်းရွှေ့ကြေး ပေါင် (၆၂.၄)သန်းနဲ့ ခေါ်ယူဖို့ သဘောတူညီချက် ရရှိသွားခဲ့ကာ အပြောင်းအရွှေ့လည်း ပြီးမြောက်သွားခဲ့ပါတယ်။

ပေါ်တူဂီကလပ်အသင်းက ဒီပြောင်းရွှေ့မှုတွေကို အတည်ပြုခဲ့ပြီး ကွင်ဒါရဲ့ ပြောင်းရွှေ့ကြေးက ချယ်လ်ဆီးအသင်းအတွက် ပေါင် (၄၃.၇)သန်း ကုန်ကျမှာ ဖြစ်ပါတယ်။ စပို့တင်းအသင်းက အက်ဆူဂိုဟာ ဒီနွေရာသီမှာ ပရီးမီးယားလိဂ်အသင်းကို ပေါင် (၁၈.၇)သန်းနဲ့ ပြောင်းရွှေ့မှာဖြစ်ကြောင်းကိုလည်း ဖော်ပြခဲ့ပါတယ်။

Photo Credit : Stretty News

ပေါ်တူဂီ အသက်(၂၁)နှစ်အောက် လက်ရွေးစင် ကွင်ဒါဟာ ၂၀၂၆ ခုနှစ် နွေရာသီမှာ စတမ်းဖို့ဒ်ဘရစ်ချ်ကို မပြောင်းရွှေ့ခင် နောက်ရာသီအထိ စပို့တင်းအသင်းမှာ ဆက်လက် ကစားသွားမှာပဲ ဖြစ်ပါတယ်။ ပြီးခဲ့တဲ့ ဇန်နဝါရီလမှာ ယူနိုက်တက်အသင်းက ဧပြီမှာ အသက်(၁၈)နှစ်ပြည့်မယ့် ကွင်ဒါအတွက် သဘောတူညီချက်တစ်ခုကို စုံစမ်းခဲ့ပြီး ကွင်ဒါကလည်း ယခင်က နည်းပြ ရူဘင် အမော်ရင်နဲ့အတူ စပို့တင်းအသင်းမှာ လက်တွဲခဲ့ပါသေးတယ်။

အမော်ရမ်ကို နိုဝင်ဘာလမှာ အသင်းရဲ့ နည်းပြချုပ်အဖြစ် ခန့်အပ်ခြင်း မပြုလုပ်ခင်ကတည်းက ယူနိုက်တက်ဟာ ကွင်ဒါကို ခြေရာခံနေတယ်လို့ သိရပါတယ်။ ဘင်ဖီကာ လူငယ်အကယ်ဒမီထွက် ကွင်ဒါဟာ အသက်(၁၃)နှစ်အရွယ် ၂၀၁၉ ခုနှစ်မှာ စပို့တင်းအသင်းကို ရောက်ရှိခဲ့ပြီး အမော်ရင်က ကွင်ဒါရဲ့ ဖြစ်နိုင်ချေရှိမှုကို ချက်ချင်း သတ်မှတ်ခဲ့သလို ကွင်ဒါဟာ အသက်(၁၆)နှစ်အရွယ်မှာ စပို့တင်းရဲ့ အရံအသင်းကို ကိုယ်စားပြုတဲ့ သက်တမ်းအငယ်ဆုံး ကစားသမား ဖြစ်လာခဲ့ပါတယ်။

Photo Credit : Transfermarket

ပေါ်တူဂီ အသက်(၂၁)နှစ်အောက် လက်ရွေးစင်လည်းဖြစ်တဲ့ ကွင်းလယ်ကစားသမား အက်ဆူဂိုဟာ ဒီရာသီမှာ လာလီဂါကလပ် လပ်စ်ပါးလ်မားစ်အသင်းဆီ အငှားကစားခဲ့ပါတယ်။ ချယ်လ်ဆီးအသင်းဟာ ဘောလုံးကို ပြန်လည်ရယူတဲ့ ကွင်းလယ်လူကို အချိန်အတော်ကြာ ခြေရာခံခဲ့ပြီး ကလပ်ကမ္ဘာ့ဖလားအပြီး နောက်ထပ် အလုပ်များတဲ့ ရာသီတစ်ခုအတွက် အသင်းလူစာရင်းကို အားဖြည့်ပေးဖို့ မျှော်လင့်ထားပြီး မိုဆက်စ် ကိုင်စီဒိုလို ကစားသမားတွေအပေါ် ဖိအားတွေ သက်ရောက်စေမှာ သေချာပါတယ်။

အက်ဆူဂိုဟာ ကိုင်စီဒိုနဲ့ ကင်ဒရီ ပါအက်ဇ်တို့နဲ့အတူ တူညီတဲ့ အေဂျင်စီက ကစားသမားဖြစ်ပြီး အသက် ၁၇ နှစ်အရွယ် ပါအက်ဇ်ဟာလည်း ဒီနွေရာသီမှာ အင်ဒီပင်ဒင့် ဒယ်လ် ဗယ်လီကနေ ချယ်လ်ဆီးအသင်းကို ရောက်ရှိမှာ ဖြစ်ပါတယ်။ ကွင်ဒါနဲ့ အက်ဆူဂိုတို့ နှစ်ဦးပေါင်း သဘောတူညီချက်ဟာ ၂၀၂၂ ခုနှစ်မှာ ချယ်လ်ဆီးအသင်းကို သိမ်းပိုက်ပြီးကတည်းက ပေါင် ၁.၃ ဘီလီယံနီးပါး သုံးစွဲမှုနဲ့အတူ တော့ဒ် ဘိုလီနဲ့ ကလီယာလိတ်ခ် ကတ်ပီတယ်တို့ရဲ့ လက်အောက်မှာ ထိပ်တန်းလူငယ်ပါရမီရှင်တွေကို ခေါ်ယူဖို့ ချယ်လ်ဆီးအသင်းရဲ့ တွန်းအားကို ဆက်လက်လုပ်ဆောင်နေပါတယ်။