ချယ်လ်ဆီးအသင်းဟာ နည်းပြ အန်ဇို မာရက်စကာအတွက် နံပါတ်တစ် ဂိုးသမားသစ်တစ်ဦး ရှာဖွေနေပြီး အေစီမီလန်အသင်းရဲ့ ဂိုးသမား မိုက် မိုင်နန်အတွက် ဆက်သွယ်မှုတွေ ပြုလုပ်ခဲ့တယ်လို့ သတင်းတွေအရ သိရပါတယ်။
အပြောင်းအရွှေ့ကျွမ်းကျင်သူ ဖာဘရီဇီယို ရိုမာနိုရဲ့ ဖော်ပြချက်အရ မိုင်နန်ဟာ အေစီမီလန်အသင်းနဲ့ စာချုပ်သစ်ချုပ်ဆိုဖို့ သဘောတူညီမှု မရသေးတာကြောင့် ချယ်လ်ဆီးအသင်းအတွက် ခေါ်ယူနိုင်ခြေရှိနေတယ်ဆိုတဲ့ သတင်းတွေ ထွက်ပေါ်လာခဲ့တာ ဖြစ်ပါတယ်။ ပရီးမီးယားလိဂ်ကလပ် ချယ်လ်ဆီးဟာ ဒီအခြေအနေကို အနီးကပ် စောင့်ကြည့်နေပြီး ဖြစ်နိုင်ခြေရှိတဲ့ အပြောင်းအရွှေ့အတွက် မီလန်အသင်းနဲ့ ဆက်သွယ်မှုတွေ ပြုလုပ်ပြီးဖြစ်တယ်လို့လည်း ဆိုပါတယ်။
Photo Credit : Sempremilan
မိုင်နန်ဟာ စတမ်းဖို့ဒ်ဘရစ်ချ်က တာဝန်ရှိသူတွေ ကာလရှည်ကြာ သဘောကျနေခဲ့တဲ့ ဂိုးသမားဖြစ်ပြီး ချယ်လ်ဆီးရဲ့ ဦးစားပေးစာရင်းမှာ အချိန်အတော်ကြာ ပါဝင်နေခဲ့သူလည်း ဖြစ်ပါတယ်။ ဒါပေမဲ့ အခုအခါမှာတော့ ဆုံးဖြတ်ချက်ဟာ အေစီမီလန်အသင်းရဲ့ အုပ်ချုပ်ရေးပိုင်းကသာ ချမှတ်ရမှာဖြစ်ပြီး သူတို့ရဲ့ ထိပ်တန်းဂိုးသမားကို ဆက်ထိန်းထားမလား ဒါမှမဟုတ် ဈေးကွက်တန်ဖိုး မြင့်တက်နေချိန်မှာ ရောင်းထုတ်မလားဆိုတာကို ရွေးချယ်ရတော့မှာ ဖြစ်ပါတယ်။
မိုင်နန်ကို စတမ်းဖို့ဒ်ဘရစ်ချ်ဆီ ခေါ်ယူနိုင်ခဲ့မယ်ဆိုရင် ပါဝင်ပတ်သက်သူအားလုံးအတွက် အကျိုးရှိတဲ့ အခြေအနေတစ်ခု ဖြစ်လာနိုင်ပါတယ်။ ချယ်လ်ဆီးအသင်းအနေနဲ့ ကမ္ဘာ့အဆင့်မီ ထိပ်တန်းဂိုးသမားတစ်ဦးကို ရရှိမှာဖြစ်သလို ပြင်သစ်လက်ရွေးစင် ဂိုးသမားအတွက်လည်း ပရီးမီးယားလိဂ်မှာ စိန်ခေါ်မှုအသစ်တွေနဲ့ ချန်ပီယံလိဂ်ပြိုင်ပွဲ ဝင်ခွင့်ကိုပါ ရရှိမှာဖြစ်ပါတယ်။ အေစီမီလန်အသင်းကတော့ စီးရီးအေမှာ အဆင့်(၈)နဲ့သာ ရာသီသိမ်းခဲ့လို့ ချန်ပီယံလိဂ်ဝင်ခွင့်အပြင် ဥရောပပြိုင်ပွဲတွေနဲ့ပါ လွဲချော်ခဲ့ရပါတယ်။
Photo Credit : ESPN
ချယ်လ်ဆီးနည်းပြ မာရက်စကာဟာ ပြိုင်ပွဲစုံမှာ ဆုဖလားတွေအတွက် စိန်ခေါ်နိုင်မယ့် အသင်းတစ်သင်းကို တည်ဆောက်ဖို့ စိတ်ပိုင်းဖြတ်ထားပြီး ပြီးခဲ့တဲ့ရာသီက အသင်းရဲ့ဂိုးပေါက်မှာ အဓိက တာဝန်ယူထားရတဲ့ ရောဘတ် ဆန်းချက်ဇ်ရဲ့ ခြေစွမ်းမတည်ငြိမ်မှုတွေကြောင့် လန်ဒန်အနောက်ပိုင်းက ချယ်လ်ဆီးအသင်းအတွက် သတိပေး ခေါင်းလောင်းသံတွေ ထွက်ပေါ်လာခဲ့ပါတယ်။
အသင်းဟာ ၂၀၂၅-၂၆ ရာသီကစပြီး စတမ်းဖို့ဒ်ဘရစ်ချ်မှာ ချန်ပီယံလိဂ်ညတွေ ပြန်လည်ရောက်ရှိလာတော့မှာဖြစ်လို့ ထိပ်တန်းအဆင့်ကို ပြန်ရောက်ဖို့အတွက် အသင်းရဲ့စံနှုန်းတွေကို မြှင့်တင်လိုနေသလို အသင်းကနေ ရှင်းထုတ်သွားမယ့် ကစားသမား စာရင်းမှာလည်း ရောဘတ် ဆန်းချက်ဇ်အပြင် စထရာဘိုးအသင်းဆီ အငှားချထားတဲ့ ဂျော်ဂျီ ပီထရိုဗစ်ပါ ပါဝင်လို့နေပါတယ်။
