မနေ့ညက ကစားသွားခဲ့တဲ့ အီတလီနဲ့ ဂျာမနီအသင်းတို့ရဲ့ UEFA Nations League ကွာတားဖိုင်နယ်ပွဲစဉ်မှာ အီတလီအသင်းရဲ့ ခံစစ်ကစားသမား ရီကာဒို ကာလာဖီယိုရီ ဒဏ်ရာရရှိခဲ့ပြီးနောက် အာဆင်နယ်အသင်းအတွက်ပါ စိုးရိမ်စရာ အခြေအနေတစ်ခု ဖြစ်ပေါ်ခဲ့ပါတယ်။
ကာလာဖီယိုရီဟာ Nations League ကွာတားဖိုင်နယ် ပထမအကျော့ ဂျာမနီနဲ့ပွဲမှာ အီတလီအသင်းအတွက် ပွဲထွက်ကစားခဲ့ပြီး ဒီပွဲမှာ အီတလီအသင်းက ဦးဆောင်ဂိုး သွင်းယူနိုင်ခဲ့ပေမယ့် ဒုတိယပိုင်းမှာ ဂိုးတွေ ခွင့်ပြုခဲ့ရင်း ရှုံးနိမ့်ခဲ့ပါတယ်။ ဒီပွဲအတွင်းမှာ ဂျာမနီရဲ့ တိုက်စစ်ဆင်မှုအတွင်း ကာလာဖီယိုရီက ချော်လဲပြီး ဒူးကို မှားယွင်းစွာ ထိခိုက်မိရာမှ ဒဏ်ရာရရှိသွားခဲ့ပါတယ်။
Photo Credit : Football Italia
ကွင်းထဲမှာ ဆေးကုသမှုခံယူပြီးနောက် ကာလာဖီယိုရီဟာ ပွဲကို ဆက်လက် ကစားနိုင်ခဲ့ပြီး ပွဲချိန် ၉၀ မိနစ်အထိ ပါဝင်ကစားခဲ့ပါတယ်။ ဒါပေမယ့် အီတလီနည်းပြ လူချီယာနို စပါလက်တီက အာဆင်နယ်နောက်ခံလူဟာ ဒူးမှာ ထူးဆန်းတဲ့အရာတစ်ခုကို ခံစားခဲ့ရတယ်လို့ ထုတ်ဖော်ပြောကြားခဲ့ပြီး ဒါဟာ အာဆင်နယ်အသင်းအတွက် စိုးရိမ်ပူပန်မှုတွေ ဖြစ်ပေါ်စေခဲ့ပါတယ်။
နည်းပြ စပါလက်တီက မီဒီယာတွေကို ပြောကြားရာမှာ “သူ ဒဏ်ရာရသလားဆိုတာကို ကျွန်တော်တို့ မသိရသေးပါဘူး။ ရီကာဒိုက သူ့ဒူးမှာ ထူးဆန်းတဲ့အရာတစ်ခုကို ခံစားနေရတယ်လို့ ပြောပေမယ့် ကျွန်တော်တို့ သေချာ မသိရသေးပါဘူး” လို့ ရှင်းလင်း ပြောကြားခဲ့ပါတယ်။
Photo Credit : Goal
အာဆင်နယ်နောက်ခံလူဟာ အသက်(၁၆)နှစ်အရွယ်မှာပဲ ကြီးမားတဲ့ ဒူးဒဏ်ရာကို ခံစားခဲ့ရဖူးတာကြောင့် သူ့ရဲ့ ဒူးဒဏ်ရာကို သေချာဂရုစိုက်ဖို့ လိုအပ်ပါတယ်။ အခုလည်း ဒူးကိုပဲ ထပ်ပြီး ထိခိုက်သွားခဲ့တဲ့ ကာလာဖီယိုရီဟာ လန်ဒန်မြို့ခံကလပ် ဖူလ်ဟမ်အသင်းနဲ့ ယှဉ်ပြိုင်ရမယ့် လာမယ့် ပရီးမီးယားလိဂ်ပွဲစဉ်မှာ ပါဝင်နိုင်ဖို့ မသေချာတော့ပါဘူး။
ဒီနွေမှ ဘိုလော့ဂ်နာအသင်းကနေ အာဆင်နယ်အသင်းဆီ ပြောင်းရွှေ့လာခဲ့တဲ့ အီတလီ ခံစစ်ကစားသမား ကာလာဖီယိုရီဟာ ဒီဘောလုံးရာသီထဲမှာပဲ ဒူးဒဏ်ရာ ခြေသလုံးဒဏ်ရာနဲ့ ကြွက်သားဒဏ်ရာတွေကြောင့် အာဆင်နယ်နဲ့ အီတလီအသင်းတွေရဲ့ ပြိုင်ပွဲစုံ (၁၆)ပွဲအထိတောင် လွဲချော်ထားခဲ့ပါတယ်။
