ဗီလာနဲ့ အာဆင်နယ်ပွဲ အပါအဝင် ပွဲစဉ်(၁၆) အတွက် ဘာဘာတော့ဗ်ရဲ့ ခန့်မှန်းချက်များ

ကဲ အပတ်စဉ် တင်ဆက်ပေးနေကြ ဘာဘာတော့ဗ်ရဲ့ ပွဲကြို သုံးသပ်ချက်တွေကို တင်ဆက်ပေးရမယ့် အချိန်အခါ ကျရောက်လာပြန်ပါပြီ။ ဒီတပတ်မှာ ဗီလာနဲ့ အာဆင်နယ် ၊ စပါးနဲ့ နယူးကာဆယ် စတဲ့ ပွဲကြီးပွဲကောင်းတွေ ရှိနေတာကြောင့် ဘာဘာတော့ဗ် တယောက် ဘယ်လို ခန့်မှန်းချက်တွေ လုပ်ထားမလဲ ဆိုတာ ဖတ်ရှုကြည့်လိုက်ရအောင်ဗျာ…။

Photo Credit: Mix Fits

မန်ယူနဲ့ ဘုန်းမောက် (စနေနေ့ည ၉နာရီခွဲ)

ကျွန်တော်က ယူနိုက်တက်ရဲ့ ပွဲစဉ်တွေ အကြောင်း ပြောနေရင်းနဲ့ “မဖြစ်မနေ နိုင်ရမယ်” ဆိုတဲ့ စကားလုံးကို ဘယ်နှကြိမ် သုံးခဲ့လဲ ဆိုတာ မှတ်တောင် မမှတ်မိတော့ပါဘူး။ ဒီပွဲကလည်း ယူနိုက်တက် အတွက် မဖြစ်မနေ နိုင်ရမယ့်ပွဲပါ။ စီးတီးနဲ့ ၃မှတ်ပဲ ကွာတော့တဲ့အချိန် ၊ ချယ်လ်ဆီးကို အနိုင်ယူထားတဲ့ အချိန်မှာ နိုင်ပွဲတွေ စုဆောင်းနိုင်ဖို့ လိုအပ်ပါပြီ။

ဒီပွဲမှာ ပြိုင်ဘက်က ဘုန်းမောက် ဆိုတော့ ယူနိုက်တက်တို့ အလွယ်လေးနဲ့ အနိုင်ရအောင် ကစားလို့ ရပါတယ်။ သူတို့က ကျွန်တော် ပြောတာရဲ့ ဆန့်ကျင်ဘက်ကို လုပ်ပြီး ရှုံးအောင် ကစားလို့ မဖြစ်တော့ပါဘူး။ ယူနိုက်တက်က အရှိန်ရနေတဲ့ အသင်းပါ။ ဒါကြောင့် ဆိုးရွားတဲ့ ကစားပုံမျိုး ထပ်မလုပ်မိအောင် သတိထားဖို့ လိုအပ်ပါတယ်။ သူတို့က အပေါ်မှာ ရှိနေတဲ့ အသင်းတွေကို ဖိအားပေးရပါမယ်။ ဒီပွဲက ယူနိုက်တက် အတွက် နိုင်ပွဲ ရအောင် ကစားရမယ့် ပွဲမျိုးပါ။ ဒါကြောင့် ကျွန်တော်က ယူနိုက်တက်နဲ့ပဲ ရပ်တည်ပါမယ်။

ခန့်မှန်းရလဒ် – မန်ယူ ၂-၁ ဘုန်းမောက်

Photo Credit: Sky Sports

ဗီလာနဲ့ အာဆင်နယ် (တနင်္ဂနွေ မနက် ၁၂နာရီ)

ကျွန်တော်က ဗီလာကို နိုင်စေချင်ပါတယ်။ ဘာကြောင့်လဲ ဆိုတော့ ကျွန်တော်က သူတို့အသင်းကို ပိုပြီး စိတ်ဝင်စားဖို့ ကောင်းတဲ့ အသင်းမျိုး ဖြစ်စေချင်လို့ပါ။ ပြီးတော့ သူတို့ရဲ့ ကစားပုံနဲ့ အူနိုင်း အမ်မရီရဲ့ အံ့မခန်း စွမ်းဆောင်ရည်တွေကြောင့် သူတို့တွေဟာ နိုင်ပွဲနဲ့ ထိုက်တန်ပါတယ်။

ဗီလာရဲ့ အိမ်ကွင်း စွမ်းဆောင်ရည်က အထင်ကြီးစရာ ကောင်းပါတယ်။ ကစားသမားတွေကလည်း ကိုယ့်ကိုယ်ကိုယ် ယုံကြည်မှု မြင့်နေမယ် ဆိုတာ အသေအချာပါပဲ။ ကျွန်တော်က အာဆင်နယ်ဟာ ရှုံးပွဲနဲ့ ထိုက်တန်တဲ့ အသင်းလို့ မမြင်ပါဘူး။ သူတို့ကလည်း ပုံစံကောင်း တခုကို ရနေတဲ့ အသင်းပါ။ ကျွန်တော်က စိတ်ဝင်စားစရာ ကောင်းတဲ့ အရာတခုကို မြင်တွေ့ချင်ရုံပါပဲ။ ကျွန်တော်ကတော့ ဗီလာကို နိုင်စေချင်ပါတယ်။

ခန့်မှန်းရလဒ် – ဗီလာ ၂-၁ အာဆင်နယ်

Photo Credit: Sky Sports

စပါးနဲ့ နယူးကာဆယ် (တနင်္ဂနွေနေ့ ည ၁၁နာရီ)

ဒီပွဲကတော့ ပွဲကောင်း တပွဲ ဖြစ်လာပါလိမ့်မယ်။ နှစ်သင်းစလုံးက တိုက်စစ်အားပြုတဲ့ အသင်းတွေချည်းပါပဲ။ အက်ဒီဟောင်းက နယူးကာဆယ်မှာ အလုပ်ကောင်းကောင်း လုပ်နေတယ် ဆိုတာကို လူတိုင်း သိကြပါတယ်။ နှစ်သင်းစလုံးက နောက်ဆုံးပွဲတွေမှာ ရလဒ်တွေ မကောင်းထားလို့ ဒီပွဲမှာ ပြန်ရုန်းထနိုင်ဖို့ လိုအပ်နေပါပြီ။

စပါးက ရှုံးပွဲတွေ ၊ သရေပွဲတွေ ကြုံတွေ့ခဲ့ရတာကြောင့် သူတို့ရဲ့ အရှိန်အဟုန်ကို ဆုံးရှုံးထားတာမျိုး ဖြစ်နိုင်ပါတယ်။ ဒါပေမယ့် သူတို့က စုဖွဲ့မှု ကောင်းတဲ့ အသင်းအဖြစ် ရှိနေဆဲပါပဲ။ သူတို့မှာ ထူးခြားတဲ့ အရာတွေကို လုပ်နိုင်စွမ်း ရှိနေပါသေးတယ်။ စပါးက ဒီလိုပွဲမျိုးမှာ ရမှတ်တွေ စုဆောင်းနိုင်ဖို့ လိုအပ်ပါတယ်။ ဒါပေမယ့် သူတို့က နယူးကာဆယ်နဲ့ ယှဉ်ပြိုင်ရင် တပွဲလုံးကို အပြည့်အဝ အာရုံစိုက်ထားဖို့ လိုပါမယ်။ နယူးကာဆယ်မှာ အန္တရာယ် ပေးနိုင်တဲ့ ကစားသမားတွေ အများကြီး ရှိနေပါတယ်။

ကျွန်တော်က စပါး အနိုင်လို့ ခန့်မှန်းချင်ပေမယ့် သရေရလဒ်ပဲ ထွက်လာမယ်လို့ ထင်နေပါတယ်။ ကျွန်တော်တို့တွေက ဒီပွဲမှာ သွင်းဂိုးတွေ အများကြီး မြင်ရဖို့ မျှော်လင့်နေကြပေမယ့် ပျင်းစရာကောင်းတဲ့ သရေပွဲမျိုးလည်း ဖြစ်သွားနိုင်ပါတယ်။ ဒါပေမယ့် နှစ်သင်းစလုံးမှာ ကစားသမားကောင်းတွေ ရှိနေတာကြောင့် ကျွန်တော်ကတော့ သွင်းဂိုးတွေ မြင်ရမယ်လို့ပဲ ခန့်မှန်းချင်ပါတယ်။

ခန့်မှန်းရလဒ် – စပါး ၂-၂ နယူးကာဆယ်