ဘာစီလိုနာအသင်းဟာ သူတို့ရဲ့ လစာကန့်သတ်ချက် သိသိသာသာ လျှော့ချခံလိုက်ရပါတယ်။ ဒါက ပြန်လည်မွမ်းမံထားတဲ့ ကမ့်နူးကွင်းမှာ VIP ထိုင်ခုံတွေ ရောင်းချမှုကနေ ရတဲ့ ယူရိုသန်း(၁၀၀)ကို လာလီဂါရဲ့ တွက်ချက်မှုထဲ တရားဝင် ထည့်မပေးလိုက်တာကြောင့်ပါ။ လာလီဂါက ထုတ်ပြန်တဲ့ ကြေညာချက်ထဲမှာ ဘာစီလိုနာအသင်းက တင်ပြလာတဲ့ နောက်ဆုံး ဘဏ္ဍာရေးစာရင်းတွေမှာ ဒန်နီ အော်လ်မိုနဲ့ ပါအူ ဗစ်တာတို့ကို မှတ်ပုံတင်ဖို့ အစီအစဉ်တစ်စိတ်တစ်ပိုင်းအနေနဲ့ ထည့်သွင်းထားတဲ့ အဲဒီ VIP ထိုင်ခုံရောင်းချမှု ပါဝင်မလာတော့ဘူးလို့ ဖော်ပြထားပါတယ်။
Photo Credit : Marca
ဇန်နဝါရီလတုန်းက ဘာစီလိုနာက ပြန်လည်မွမ်းမံထားတဲ့ ကမ်နိုးကွင်းမှာ VIP ထိုင်ခုံ(၄၇၅)ခုံကို နှစ်(၃၀)ကြာ ငှားရမ်းမှုအနေနဲ့ ယူရိုသန်း(၁၀၀)နဲ့ ရောင်းချခဲ့တဲ့ အသေးစိတ် အချက်အလက်တွေကို ထုတ်ပြန်ခဲ့ပါတယ်။ ရင်းနှီးမြှုပ်နှံသူတွေဖြစ်တဲ့ Forta Advisors နဲ့ New Era Visionary Group တို့က အဲဒီစီမံကိန်းအတွက် ဘာစီလိုနာကို ယူရို(၅၇)သန်း ပေးချေပြီးသွားပြီဖြစ်ပေမယ့် လာလီဂါကတော့ ဒီသဘောတူညီမှုရဲ့ ယုံကြည်စိတ်ချရမှုကို သံသယ ရှိနေခဲ့ပါတယ်။
အခုတော့ လာလီဂါက အဲဒီ ယူရိုသန်း(၁၀၀) ရောင်းချမှုကို ဘာစီလိုနာရဲ့ လစာကန့်သတ်ချက် တွက်ချက်မှုထဲ ထည့်သွင်းမှာ မဟုတ်ဘူးလို့ ဆုံးဖြတ်လိုက်ပါတယ်။ ဒါကြောင့် အော်လ်မိုနဲ့ ဗစ်တာတို့ကို ဆက်လက် မှတ်ပုံတင်ထားနိုင်ဖို့ဆိုတာ အထက်တန်း အားကစားကော်မတီ (CSD) ရဲ့ ဆုံးဖြတ်ချက်ပေါ် မူတည်နေပါတယ်။ လာလီဂါက ပြောတာကတော့ ဒီဇင်ဘာလတုန်းက ဘာစီလိုနာရဲ့ စာရင်းတွေထဲမှာ ယူရိုသန်း(၁၀၀) ရောင်းချမှုကို စာရင်းအင်းနဲ့ စာရင်းစစ်ဌာန (ICAC) က ထည့်သွင်းထားခဲ့ပေမယ့် မတ်လကုန်မှာ လာလီဂါကို ဘဏ္ဍာရေးစာရင်းတွေ ထပ်မံတင်ပြတဲ့အခါ အဲဒီဌာနက ဘာစီလိုနာရဲ့ စာရင်းစစ်အဖြစ် မပါဝင်တော့ဘူးလို့ သိရပါတယ်။
Photo Credit : Goal
ဒီရာသီမှာ တတိယအကြိမ်မြောက် စာရင်းစစ်ကုမ္ပဏီ ပြောင်းလဲမှုဖြစ်ပြီး အစက Grant Thornton က စတင်စစ်ဆေးခဲ့ရာကနေ အခု Crowe ဆိုတဲ့ ကုမ္ပဏီကို ခန့်အပ်လိုက်ပါတယ်။ Crowe က ဘာစီလိုနာရဲ့ စာရင်းထဲမှာ ယူရိုသန်း(၁၀၀) ရောင်းချမှုကို ထည့်မထားတော့တာကြောင့် လာလီဂါက ဘာစီလိုနာရဲ့ လစာကန့်သတ်ချက်ကို လျှော့ချလိုက်တယ်လို့ ကြေညာလိုက်တာပါ။
ဒီလိုနဲ့ ဘာစီလိုနာအနေနဲ့ အော်လ်မိုနဲ့ ဗစ်တာတို့ကို မှတ်ပုံတင်ဖို့ ကြိုးစားနေပေမယ့် လစာကန့်သတ်ချက် လျှော့ချခံရတာကြောင့် အခက်အခဲတွေ ဆက်ရှိနေတုန်းပါပဲ။
