ပရီးမီးယားလိဂ်ရဲ့ ထိပ်သီးကလပ် အာဆင်နယ်အသင်းဟာ အီတလီစီးရီးအေကလပ် အတ္တလန်တာအသင်းရဲ့ တောင်ပံတိုက်စစ်မှူး အဒီမိုလာ လွတ်ခ်မန်းကို ခေါ်ယူဖို့အတွက် ဈေးကွက်ထဲကို ရုတ်တရက်ဝင်ရောက်လာခဲ့ပါတယ်။ အသက်(၂၇)နှစ်အရွယ် နိုင်ဂျီးရီးယားလက်ရွေးစင်ကစားသမားဟာ အသင်းနဲ့ အဆင်မပြေဖြစ်နေတာကြောင့် ဒီနွေရာသီမှာ အသင်းပြောင်းဖို့ သတင်းတွေ ထွက်ပေါ်နေပါတယ်။
လွတ်ခ်မန်းကို အင်တာမီလန်အသင်းကလည်း ခေါ်ယူဖို့ ကြိုးပမ်းနေပေမယ့် အတ္တလန်တာက တောင်းဆိုထားတဲ့ ယူရိုသန်း ၅၀ (ပေါင် ၄၃ သန်း)ကို မပေးချေနိုင်သေးတာကြောင့် အာဆင်နယ်အတွက် အခွင့်အရေး ပေါ်ပေါက်လာတာ ဖြစ်ပါတယ်။ အီတလီအားကစားသတင်းဝက်ဘ်ဆိုဒ် Calciomercato ရဲ့ ဖော်ပြချက်အရ အာဆင်နယ်ဟာ သူတို့ရဲ့ တိုက်စစ်ပိုင်းကို ပိုမိုအားကောင်းစေဖို့ လွတ်ခ်မန်းကို ခေါ်ယူလိုနေပြီး ကစားသမားအတွက် တရားဝင်ကမ်းလှမ်းမှု ပြုလုပ်သွားဖို့ ပြင်ဆင်နေတယ်လို့ သိရပါတယ်။ ဒါ့အပြင် အာဆင်နယ်ဟာ အသင်းရဲ့ ကစားသမား လီယန်ဒရို ထရော့ဆတ်ကို ရောင်းထုတ်ပြီး လူငယ်ကစားသမားသစ်တွေအတွက် နေရာဖယ်ပေးဖို့လည်း စီစဉ်နေပါတယ်။
Photo Credit : Goal
အာဆင်နယ်ဟာ တိုက်စစ်မှူးသစ် ဗစ်တာ ယိုကယ်ရက်စ်နဲ့ တွဲဖက်ကစားနိုင်ပြီး အသင်းကို မတူညီတဲ့ ကစားဟန်တွေ ယူဆောင်လာပေးနိုင်မယ့် ကစားသမားတစ်ဦးကို အလိုရှိနေပါတယ်။ လွတ်ခ်မန်းဟာ ပြီးခဲ့တဲ့ရာသီက အတ္တလန်တာအသင်းအတွက် ပြိုင်ပွဲစုံ ပွဲပေါင်း(၄၀)မှာ သွင်းဂိုး(၂၀)နဲ့ ဂိုးဖန်တီးမှု (၇)ကြိမ်အထိ ပြုလုပ်ထားနိုင်ခဲ့တဲ့ ထူးချွန်တဲ့ ကစားသမားတစ်ဦး ဖြစ်ပါတယ်။
လက်ရှိမှာတော့ အတ္တလန်တာအသင်းရဲ့ အမှုဆောင်အရာရှိချုပ် လုကာ ပါကာဆီဟာ လန်ဒန်မြို့မှာ ရောက်ရှိနေတာကြောင့် အာဆင်နယ်နဲ့ တိုက်ရိုက်ဆွေးနွေးမှုတွေ ပြုလုပ်နိုင်မယ့် အခွင့်အရေးလည်း ရှိနေပါတယ်။ ဒါပေမယ့် လွတ်ခ်မန်းကိုယ်တိုင်ကတော့ အီတလီမှာပဲ ဆက်ကစားချင်ပြီး အင်တာမီလန်ကို ပြောင်းရွှေ့ဖို့ ဆန္ဒရှိနေတယ်လို့ သတင်းတွေက ဆိုပါတယ်။
Photo Credit : Goal
အင်တာမီလန်ရဲ့ ကမ်းလှမ်းမှုဟာ ယူရို(၄၂)သန်းနဲ့ နောက်ထပ်ဆုကြေး ယူရို(၃)သန်းဖြစ်ပြီး လွတ်ခ်မန်းနဲ့ တစ်နှစ်လစာ ယူရို(၄.၅)သန်းနဲ့ (၅)နှစ်စာချုပ်အတွက် ပုဂ္ဂိုလ်ရေးအရ သဘောတူညီမှု ရရှိထားပြီး ဖြစ်ပါတယ်။ ဒါပေမယ့်လည်း အတ္တလန်တာအသင်းဟာ ပြည်တွင်းပြိုင်ဘက်တစ်သင်းဆီကို သူတို့ရဲ့ အဓိကကစားသမားကို လက်လွှတ်ရမှာဖြစ်တဲ့အတွက် အလျှော့ပေးဖို့ လုံးဝဆန္ဒမရှိပါဘူး။ အသင်းရဲ့ တောင်းဆိုချက်ကို လက်မခံတဲ့အတွက် လွတ်ခ်မန်းက လူသိရှင်ကြား ဝေဖန်ခဲ့ပြီးနောက်မှာတော့ အတ္တလန်တာဟာ လွတ်ခ်မန်းကို အီတလီကလပ်အသင်းတွေဆီ ရောင်းချမှာ မဟုတ်ဘူးလို့ ပါကာဆီက ပြောကြားထားပါတယ်။
လွတ်ခ်မန်းဟာ ဒီတစ်ပတ်အတွင်း အသင်းလေ့ကျင့်ရေးကို ပျက်ကွက်ခဲ့တဲ့အတွက် အတ္တလန်တာအသင်းက စည်းကမ်းပိုင်းဆိုင်ရာ အရေးယူမှုတွေ ပြုလုပ်သွားဖို့ ရှိနေပါတယ်။ အပြောင်းအရွှေ့ဈေးကွက် မပိတ်ခင်မှာ ကစားသမားသစ်တွေ ထပ်မံခေါ်ယူဖို့ စိတ်အားထက်သန်နေတဲ့ အာဆင်နယ်အတွက်တော့ ဒီအခြေအနေဟာ အခွင့်အရေးတစ်ခု ဖြစ်လာနိုင်မလားဆိုတာကို ဘောလုံးပရိသတ်တွေက စိတ်ဝင်တစား စောင့်ကြည့်နေကြပါတယ်။
