အာဆင်နယ်အသင်းဟာ ဒီနွေရာသီမှာ ဘီလ်ဘာအိုအသင်းရဲ့ စပိန်တောင်ပံကစားသမား နီကို ဝီလီယံစ်ကို ခေါ်ယူဖို့ ဘိုင်ယန်မြူးနစ်အသင်းထက် ပိုမို အခြေအနေကောင်းနေတယ်လို့ နာမည်ကျော် ဘောလုံးသတင်းထောက်ဖြစ်သူ ခရစ္စယန် ဖော့ခ်က အတည်ပြု ထုတ်ပြန်လိုက်ပါတယ်။

အာဆင်နယ်ဟာ ဒီနှစ်ဘောလုံးရာသီမှာ ဒဏ်ရာပြဿနာတွေနဲ့ ရင်ဆိုင်ခဲ့ရပြီး နည်းပြအာတီတာရဲ့ အသင်းဟာ လီဗာပူးနဲ့ ဂိုးသွင်းနှုန်းမှာ ကွာဟချက် ကြီးမားနေတာကြောင့် တိုက်စစ်ပိုင်းကို အသစ်တည်ဆောက်ဖို့ လိုအပ်နေပါတယ်။ လက်ရှိ ပရီးမီးယားလိဂ် အမှတ်ပေးဇယားမှာ အာဆင်နယ်ဟာ အဆင့်(၂)နေရာမှာ ရှိနေပြီး ဇယားထိပ်က လီဗာပူးနဲ့ (၁၂)မှတ် ဂိုးအရေအတွက်မှာ (၁၆)ဂိုးအထိ (အာဆင်နယ် ၅၃ ဂိုး၊ လီဗာပူး ၆၉ ဂိုး) အကွာအဝေးမှာ ရှိနေပါတယ်။

Photo Credit : TEAMtalk

ဒါကြောင့် နွေဈေးကွက် ဖွင့်လှစ်ချိန်မှာ အချိန်အကြာကြီး ပစ်မှတ်ထားခဲ့တဲ့ နီကို ဝီလီယံစ်ကို ခေါ်ယူဖို့ အဆင်သင့် ဖြစ်လို့နေပြီး ဘွန်ဒစ်လီဂါ အင်အားကြီးကလပ် ဘိုင်ယန်မြူးနစ်ဟာလည်း ဝီလီယံစ်ကို စိတ်ဝင်စားနေတဲ့အတွက် အပြိုင်ကမ်းလှမ်းရဖွယ် ရှိနေပါတယ်။ ဒါပေမယ့် လက်ရှိ အနေအထားတွေအရ ဘိုင်ယန်အနေနဲ့ နီကို ဝီလီယံစ်လို ထိပ်တန်း ကစားသမားမျိုးကို ခေါ်ယူဖို့ ကစားသမားတချို့ကို ရောင်းချဖို့ လိုအပ်နေပါတယ်။

ခရစ္စယန် ဖော့ခ်က CaughtOffside ရဲ့ နောက်ဆုံး Fact Files ကော်လံမှာ “ဘိုင်ယန်မြူးနစ်က နီကို ဝီလီယံစ်ကို ခေါ်ယူဖို့ ဦးဆောင်နေတယ်ဆိုတာ မမှန်ပါဘူး။ လောလောဆယ် ဝီလီယံစ်ဟာ ဘိုင်ယန်ထက် အာဆင်နယ်နဲ့ ပိုနီးစပ်တယ်လို့ ကျွန်တော် ထင်ပါတယ်။ ဘာလို့ဆို ဘွန်ဒစ်လီဂါကလပ်ဟာ လက်ရှိအနေအထားအရ သူတို့လိုချင်သလောက် ခိုင်မာတဲ့ အစီအစဉ်မရှိသေးလို့ပါ။ ဝီလီယံစ်ဟာ ဘိုင်ယန်ရဲ့ စာရင်းမှာ အရမ်းမြင့်မားနေဆဲပါ။ ဒါပေမယ့် အားကစားဌာနအကြီးအကဲ မက်စ် အီဘာလ်က အရင်ဆုံး ကစားသမားတွေကို ရောင်းချရမှာပါ။”

Photo Credit : Goal

“သူတို့က ကင်းစလေ ကိုးမန်းကို ရောင်းဖို့ ကြည့်နေတယ်။သူ့ကိုလည်း တော့တင်ဟမ်၊ နယူးကာဆယ်နဲ့ ဆော်ဒီအာရေဗျနဲ့ ချိတ်ဆက်နေပါတယ်။ ဒါကို လုပ်နိုင်ရင် အဲဒီငွေကို ဝီလီယံစ်ကို ခေါ်ယူဖို့ အသုံးပြုနိုင်ပါတယ်။ ဆာ့ဂ် ဂနာဘရီလည်း ရောင်းမယ့်စာရင်းမှာ ပါပေမယ့် လောလောဆယ် စိတ်ဝင်စားတဲ့ အသင်းမရှိသေးပါဘူး။ ဒါကြောင့် ဘိုင်ယန်အနေနဲ့ ကစားသမားရောင်းချနိုင်မလား စောင့်ကြည့်ရဦးမှာပါ။” လို့ ပြောခဲ့ပါတယ်။

ဒီရာသီမှာ အာဆင်နယ်ရဲ့ တိုက်စစ်ပိုင်းက ပရီးမီးယားလိဂ် ချန်ပီယံဆုအတွက် မျှော်လင့်ချက်ကို အားနည်းစေခဲ့တာဟာ တိုက်စစ်မှာ ဂါဘရီယယ် ဂျေဇူးဟာ ဒဏ်ရာ ခဏခဏရလွန်းပြီး ကိုင်း ဟာဗက်ဇ်ကလည်း တစိုက်မတ်မတ် ဂိုးသွင်းနိုင်တဲ့ သူ မဟုတ်လို့ တိုက်စစ်မှာ အားဖြည့်ဖို့အတွင်လိုအပ်ချက်ရှိနေတာက သိသာပါတယ်။ ဒါ့အပြင် ဘူကာယို ဆာကာနဲ့ ဂါဘရီယယ် မာတင်နယ်လီတို့ပါ ဒဏ်ရာတွေ ရသွားခဲ့တာလည်း အာဆင်နယ်အတွက် နစ်နာစေခဲ့ပါသေးတယ်။