ဘရာဇီးလ် တောင်ပံကစားသမား အန်တိုနီက မန်ချက်စတာ ယူနိုက်တက်ကနေ ရီးရဲလ် ဘက်တစ်အသင်းဆီ အငှားနဲ့ ပြောင်းလာတာဟာ သူ့ဘဝရဲ့ အကောင်းဆုံး ဆုံးဖြတ်ချက်လို့ ဆိုပေမယ့် ဒီရာသီကုန်ရင် ဘက်တစ်မှာ ဆက်နေမလား ဆိုတာကိုတော့ သူကိုယ်တိုင် အသေအချာ မပြောနိုင်သေးဘူးလို့ ဆိုလိုက်ပါတယ်။
အသက်(၂၅)နှစ်အရွယ် အေဂျက်စ် ကစားသမားဟောင်းဟာ ဇန်နဝါရီလ ဆောင်းဈေးကွက်မှာပဲစပိန်ကို ရောက်လာပြီးကတည်းက ဘက်တစ်အသင်းအတွက် တော်တော်လေး ခြေစွမ်းပြ ကစားထားခဲ့ရင်း ပြိုင်ပွဲစုံ (၁၂)ပွဲကစား (၄)ဂိုးသွင်းပြီး (၄)ဂိုး ဖန်တီးပေးထားခဲ့ပါတယ်။
Photo Credit : Goal
ဒီလိုကောင်းမွန်တဲ့ စွမ်းဆောင်ရည်တွေကြောင်း ဘက်တစ် အသင်းဖော် အစ္စကိုက အန်တိုနီကို နောက်ရာသီအတွက် ပြန်ခေါ်ဖို့ ပရိသတ်တွေဆီက ရန်ပုံငွေ စုဆောင်းဖို့ တောင်းဆိုလိုက်သလို ဘက်တစ်နည်းပြကြီး မန်နူရယ် ပယ်လီဂရီနီကလည်း ဆီဗီလာနဲ့ ဒါဘီပွဲ အနိုင်ရပြီးနောက် အန်တိုနီကို ချီးကျူးစကား ပြောခဲ့ပါတယ်။
အန်တိုနီဟာ ၂၀၂၂ မှာ အေဂျက်ကနေ မန်ချက်စတာ ယူနိုက်တက်ဆီ မြင့်မားတဲ့ ပြောင်းရွှေ့ကြေးမျိုးနဲ့ ပြောင်းလာခဲ့ပေမယ့် အဲဒီမှာ မျှော်လင့်သလောက် လုပ်ဆောင်မပြနိုင်ခဲ့သလို ဒီရာသီမှာလည်း ပရီးမီးယားလိဂ်မှာ (၈)ပွဲသာ ကစားခွင့်ရပြီး အငှားနဲ့ ထွက်လာခဲ့ရပါတယ်။ အခု စပိန်မှာတော့ သူ့ကိုယ်သူ ပြန်တွေ့ခဲ့ပြီလို့ ဆိုထားပေမယ့် ဘက်တစ်မှာ အမြဲတမ်း ဆက်နေဖို့ဆိုတာ မသေချာသေးဘူးလို့ အန်တိုနီက ဆိုထားပါတယ်။
Photo Credit : Goal
DAZN နဲ့ အင်တာဗျူးမှာ အန်တိုနီက “ဒီမှာ ကျွန်တော် အရမ်းပျော်တယ်။ ဒါပေမယ့် ဆုံးဖြတ်ဖို့က နည်းနည်းစောသေးတယ်။ ကျွန်တော် ကိုယ့်ကိုယ်ကို ပြန်ရှာတွေ့ခဲ့တယ်။ ပျော်ရွှင်မှု လိုတယ်၊။ မိသားစုလည်း ပျော်ဖို့ လိုတယ်။ နေ့တိုင်း ဒီဆုံးဖြတ်ချက်က အကောင်းဆုံးပဲလို့ ခံစားရတယ်။ မြို့တော် ကလပ် နေ့စဉ်ဘဝကို ကျွန်တော် သဘောကျတယ်။”
“ဆီးဗီလ်က ဘရာဇီးလိုပဲ နေပူထွက်တာ အစားအသောက် အားလုံးက ရင်းနှီးနေတယ်။ ဒီက လူတွေကလည်း နွေးထွေးတယ်။ ဒါက ဘရာဇီးလူမျိုးတွေအတွက် အရေးကြီးတယ်။” လို့ ဆိုပါတယ်။ လာမယ့် စနေနေ့မှာတော့ ဘက်တစ်က ဘာစီလိုနာနဲ့ ကစားရဖို့ ရှိနေပြီး ဒီပွဲမှာ အန်တိုနီက ဘက်တစ်အတွက် ဘယ်လောက်အထိ စွမ်းဆောင်ပြနိုင်မလဲဆိုတာ စောင့်ကြည့်သွားရပါမယ်။
