မန်ချက်စတာ ယူနိုက်တက်အသင်းမန်နေဂျာ ရူဘင် အမိုရင်က မဖြစ်မနေ အနိုင်ရရမယ့်ပွဲဖြစ်တဲ့ ဘန်လေနဲ့ပွဲစဉ်မှာ ဒရာမာဆန်ဆန် ၃-၂ ဂိုးနဲ့ အနိုင်ရရှိခဲ့ပြီးနောက် သူ့ကစားသမားတွေရဲ့ ကြိုးစားအားထုတ်မှုကို ချီးကျူးပြောကြားလိုက်ပြီး ကြိုးစားနေသရွေ့ သူတို့ကို အမြဲချစ်နေမှာဖြစ်ကြောင်း ပြောဆိုခဲ့ပါတယ်။

စနေနေ့ကကစားခဲ့တဲ့ပွဲစဉ်မှာ ယူနိုက်တက်တို့ နှစ်ကြိမ်တိုင်တိုင် ဦးဆောင်နိုင်ခဲ့ပေမယ့် ဘန်လေက ချေပဂိုးတွေနဲ့ ပြန်လည်လိုက်ကပ်နိုင်ခဲ့ပါတယ်။ ဒါပေမယ့်လည်း နာကျင်အချိန်ပိုမှာ အာမတ် ဒီယယ်လိုအပေါ် အင်္ကျီဆွဲခဲ့တာကို VAR ကထောက်ပြခဲ့လို့ ပင်နယ်တီကန်ခွင့်ရခဲ့ပြီး အသင်းခေါင်းဆောင် ဘရူနို ဖာနန်ဒက်စ်က အဖိုးတန်အနိုင်ဂိုးကို သွင်းယူပေးခဲ့ပါတယ်။

Photo Credit : The Guardian

ပြီးခဲ့တဲ့ ရက်ပိုင်းက လိဂ်တူးကလပ် ဂရင်းစဘီကို အရှက်ရဖွယ်ရှုံးနိမ့်ခဲ့ပြီးနောက် အမိုရင်က တစ်ခုခုတော့ ပြောင်းလဲရတော့မယ်လို့ ပြောကြားခဲ့တာကြောင့် သူ့ရဲ့အနာဂတ်အပေါ် ထင်ကြေးပေးမှုတွေ မြင့်တက်ခဲ့ပါတယ်။ ဒါပေမဲ့ ဒီနိုင်ပွဲအပြီးမှာတော့ သူက “သူတို့ (ကစားသမားတွေ) ကြိုးစားအားထုတ်မှုရှိနေရင် ကျွန်တော်သူတို့ကို အမြဲချစ်နေမှာပါ။ အာမတ် ဂိုးလွဲချော်ခဲ့ရင်တောင် သူအစွမ်းကုန်ပေးဆပ်နေသရွေ့ ကျွန်တော် သူ့ကိုချစ်ပါတယ်။ ကျွန်တော်တို့ ဒီလိုကြိုးစားအားထုတ်မှုအဆင့်မှာ အမြဲရှိနေဖို့ လိုအပ်တယ်ဆိုတာကို နားလည်ရပါမယ်။” လို့ ကစားသမားတွေဘက်က ကာကွယ်ပြောဆိုခဲ့ပါတယ်။

ဒီနိုင်ပွဲကြားက စိတ်ပျက်စရာအဖြစ် ယူနိုက်တက်တို့ဟာ အဓိကကစားသမားနှစ်ဦးဖြစ်တဲ့ မားသီးယပ်စ် ကွန်ညာနဲ့ မေဆင်မောင့်တို့ ဒဏ်ရာရရှိသွားခဲ့ပါတယ်။ ကွန်ညာဟာ ပထမပိုင်းမှာ တံကောက်ကြောကို ကိုင်ပြီး ကွင်းထဲက တန်းထွက်သွားခဲ့ရပြီး မောင့်ကတော့ ဒုတိယပိုင်းမှာ ပြန်လည်ဝင်ရောက်လာနိုင်ခြင်း မရှိခဲ့ပါဘူး။ အမိုရင်က “သူတို့ကို ကျွန်တော်တို့ အရမ်းလိုအပ်ပါတယ်။ တကယ်ကို ပြိုင်ဆိုင်မှုပြင်းထန်တဲ့အသင်းဖြစ်ဖို့ သူတို့ရှိနေမှ ဖြစ်မှာပါ။” လို့ စိုးရိမ်စွာ ပြောကြားခဲ့ပါတယ်။

Photo Credit : The Times

ဒါ့အပြင် ယူနိုက်တက်ရဲ့ ဂိုးသမားပြဿနာကလည်း ဆက်လက်ရှိနေပါတယ်။ ဂိုးသမား အယ်လ်တေး ဘာယင်ဒီယာဟာ ဘန်လေရဲ့ ဂိုးကန်သွင်းမှု (၆)ကြိမ်မှာ (၂)ဂိုးအထိ ပေးခဲ့ရပြီး ဂျေဒန် အန်သိုနီရဲ့ဂိုးမှာဆိုရင် ကန်ချက်ကို ဖမ်းစဉ် လွတ်ကျသွားခဲ့တာကြောင့် အမှားကျူးလွန်ခဲ့ပါတယ်။ အမိုရင်ကတော့ သူ့ရဲ့ဂိုးသမားတွေကို ကာကွယ်ခဲ့ပြီး “သူတို့လည်း လူသားတွေပါပဲ။ မန်ချက်စတာ ယူနိုက်တက်မှာဆို အရာအားလုံးက သတင်းဖြစ်နေတာပါ။ လူတိုင်းက ဂိုးသမားအကြောင်းပြောကြတယ်။ ကျွန်တော်ဂိုးသမားပြောင်းလိုက်ရင်တောင် ဒီလိုအခြေအနေတွေက ဖြစ်နေတုန်းပါပဲ။ ဒီအချိန်မှာ မန်ယူဂိုးသမားတစ်ယောက်ဖြစ်ရတာ ခက်ခဲပါတယ်။ ကလပ်ပတ်ဝန်းကျင်မှာ ဖြစ်ပျက်နေတာတွေကြောင့် ကစားသမားတွေ ရုန်းကန်နေရတာက သဘာဝပါပဲ။ ဂိုးသမားတင်မဟုတ်ပါဘူး၊ လူတိုင်းတိုးတက်ဖို့ လိုအပ်ပါတယ်။” လို့ ဆိုပါတယ်။

ပြီးခဲ့တဲ့ ဖူလ်ဟမ်နဲ့ပွဲမှာ ပင်နယ်တီလွဲချော်ခဲ့တဲ့ ဘရူနိုက ဒီတစ်ကြိမ်မှာ အရေးကြီးတဲ့ အနိုင်ဂိုးကို သွင်းယူပေးနိုင်ခဲ့တဲ့အပေါ် အမိုရင်က “ဘရူနိုက ပင်နယ်တီနှစ်လုံးဆက်တိုက် လွဲချော်လိမ့်မယ်လို့ ကျွန်တော်မမျှော်လင့်ခဲ့ပါဘူး။ ဒါကြောင့် ကျွန်တော် တကယ်ကို ယုံကြည်မှုရှိခဲ့ပါတယ်။” လို့ ပြောကြားခဲ့ပါတယ်။