မန်ချက်စတာ ယူနိုက်တက်အသင်းရဲ့ နည်းပြ ရူဘင် အမော်ရင်က လိုင်ယွန်နဲ့ ယူရိုပါလိဂ်ပွဲစဉ်အတွင်း ဂိုးသမား အန်ဒရေ အိုနာနာရဲ့ အမှားတွေဟာ သူ့ရဲ့ အမှားတွေဖြစ်သလို အသင်းရဲ့ အမှားတွေလည်း ဖြစ်တယ်လို့ သတ်မှတ် ပြောကြားသွားခဲ့ပါတယ်။

အိုနာနာဟာ ကြာသပတေးနေ့က ယူရိုပါလိဂ် ကွာတားဖိုင်နယ် ပထမအကျော့ လိုင်ယွန်နဲ့ (၂)ဂိုးစီ သရေကျခဲ့တဲ့ပွဲမှာ သိသာထင်ရှားတဲ့ အမှားတွေကို ပြုလုပ်ခဲ့ပါတယ်။ ဒါ့အပြင် ပွဲမတိုင်ခင်မှာလည်း ယူနိုက်တက်အသင်းဟာ လိုင်ယွန်အသင်းထက် အများကြီး ပိုကောင်းတယ်လို့ ရဲရဲတင်းတင်း ပြောကြားခဲ့တဲ့ ဂိုးသမားဟာ လိုင်ယွန်ရဲ့ ဂိုး(၂)ဂိုးစလုံးအတွက် တာဝန်ရှိသူ ဖြစ်ခဲ့ရပါတယ်။

Photo Credit : beIN SPORTS

အိုနာနာဟာ (၂၅)မိနစ်မှာ လိုင်ယွန်ကစားသမား သီယာဂို အယ်လ်မာဒါရဲ့ ဖရီးကစ်ကန်ချက်ကို သူ့ခေါင်းပေါ်ကနေ ကျော်သွားခွင့်ပြုခဲ့ပြီး လိုင်ယွန်ကို ဦးဆောင်ဂိုး ရရှိစေခဲ့သလို နောက်ဆုံးမိနစ်မှာလည်း ရေယန် ချာကီရဲ့ ချေပဂိုးကိုပါ သွင်းယူခွင့်ပေးခဲ့ကာ (၈၈)မိနစ်မှာ သွင်းယူခဲ့တဲ့ ဂျော်ရှူအာ ဇက်ခ်ဇီးရဲ့ ဦးဆောင်သွင်းဂိုးကိုလည်း ပျက်ပြယ်စေခဲ့ပါတယ်။

အိုနာနာဟာ ပြီးခဲ့တဲ့ရာသီကစလို့ ဂိုးပေးရတဲ့ အမှား (၈)ကြိမ်အထိ ပြုလုပ်ထားပြီး ဒါဟာ ပြိုင်ပွဲအရပ်ရပ်မှာ ပရီးမီးယားလိဂ် ဂိုးသမားတွေထဲမှာ အများဆုံးဖြစ်ပါတယ်။ ဒါပေမယ့် အမော်ရင်က TNT Sports ကို “ကစားသမားတစ်ယောက် အမှားလုပ်မိရင် အသင်းတစ်ခုလုံး အမှားလုပ်မိတာပါပဲ၊ ဒါကြောင့် ကျွန်တော်တို့ အဲဒီလိုပဲ ဆက်သွားမှာပါ။”

Photo Credit : The Independent

“နောက်ကျမှ ဂိုးပေးလိုက်ရတာ ကျွန်တော်တို့ တကယ် စိတ်ပျက်မိပါတယ်။ နောက်ပွဲကို တစ်ဂိုးအသာနဲ့ သွားသင့်ပေမယ့် နောက်ပွဲကို အိမ်ကွင်းမှာ ကစားရမှာဖြစ်လို့ အဲဒီပွဲကို အနိုင်ရအောင် ကြိုးစားသွားပါမယ်” လို့ ပြောကြားခဲ့ပါတယ်။ အိုနာနာအပေါ် သူ့ရဲ့ ယုံကြည်မှုနဲ့ပတ်သက်ပြီး မေးမြန်းတဲ့အခါ အမော်ရင်က “ကျွန်တော်တို့ အရင်အတိုင်းပဲ ဆက်လုပ်သွားမှာပါ။ လေ့ကျင့်ရေးလုပ်မယ်၊ ပွဲတွေကို ကြည့်မယ်၊ ပွဲကို အနိုင်ရဖို့ အကောင်းဆုံး ၁၁ ဦးကို ရွေးချယ်ဖို့ ကြိုးစားမယ်” လို့ ပြန်လည် ဖြေကြားခဲ့ပါတယ်။

ယူနိုက်တက်အတွက် သတင်းကောင်းတစ်ခုအနေနဲ့ အသက်(၁၉)နှစ်အရွယ် ဗဟိုနောက်ခံလူ ယိုရိုဟာ ပထမပိုင်းပြီးခါနီးမှာ အသင်းအတွက် ပထမဆုံးဂိုးကို ခေါင်းတိုက်သွင်းယူနိုင်ခဲ့ပါတယ်။ သူ ဂိုးသွင်းယူခဲ့ပေမယ့် ဂိုးသွင်းအပြီး ပျော်ရွှင်ဖို့ အချိန်မရခဲ့တဲ့အတွက် မပျော်ရွှင်ခဲ့ပေမယ့် အသင်းဟာ နောက်တစ်ပတ် ဒုတိယအကျော့မတိုင်ခင်မှာ စိတ်ဓာတ်မကျသင့်ဘူးလို့ အခိုင်အမာ ပြောကြားခဲ့ပါတယ်။ “ကျွန်တော်တို့ ၂-၁ နဲ့ အနိုင်ရခဲ့ရင် နောက်တစ်ဆင့် တက်ရောက်ဖို့ ပိုယုံကြည်မှုရှိမယ်လို့ ထင်ပါတယ်။ ခက်ခဲပေမယ့် ကျွန်တော်တို့ စိတ်ဓာတ်ကို မြှင့်တင်ထားဖို့ လိုပါတယ်။ ကျွန်တော်တို့ မရှုံးခဲ့ပါဘူး၊ အိုးလ်ထရက်ဖို့ဒ်မှာ အနိုင်ရနိုင်ပါတယ်” လို့ သူက ဆိုပါတယ်။