မန်ချက်စတာ ယူနိုက်တက်အသင်းရဲ့နည်းပြ ရူဘင် အမော်ရင်က ဝုလ်ဗာဟမ်တန်အသင်းကို အိမ်ကွင်း အိုးထရက်ဖို့ဒ်မှာ (၁)ဂိုး ဂိုးရှိနဲ့ ရှုံးနိမ့်ခဲ့တဲ့ပွဲအပြီး အခွင့်အရေးတွေကို အဆုံးသတ်ပိုင်းမှာ အသုံးမချနိုင်ခြင်းက အသင်းရဲ့ အကြီးမားဆုံး ပြဿနာဖြစ်တယ်လို့ ဝန်ခံပြောကြားလိုက်ပါတယ်။
မနေ့က ပွဲစဉ်မှာ ဧည့်သည် ဝုလ်ဗ်အသင်းဟာ ပွဲချိန်(၇၇)မိနစ်မှာ ပေါ်လို ဆာရာဘီးယား သွင်းယူခဲ့တဲ့ ဖရီးကစ်ဂိုးနဲ့ အနိုင်(၃)မှတ် ရယူသွားခဲ့တာပါ။ ဒီပွဲမှာ ယူနိုက်တက်က ဂိုးသွင်းခွင့်တချို့ ဖန်တီးနိုင်ခဲ့ပေမယ့် Expected Goals – xG က (၁.၁) ရှိခဲ့ပေမယ့် ဝုလ်ဗ်ဂိုးသမား ဒန် ဘန့်လေကို (၂)ကြိမ်သာ အခက်တွေ့အောင် လုပ်နိုင်ခဲ့ပါတယ်။
Photo Credit : Football365
ပွဲအပြီးမှာတော့ အမော်ရင်က “ဂိုးမသွင်းနိုင်ရင် ပွဲက အနိုင်ရမှာ မဟုတ်ပါဘူး။ ကျွန်တော်တို့ ဂိုးသွင်းဖို့ လိုပါတယ်။ တချိန်တုန်းက ကျွန်တော်တို့ ဂိုးမသွင်းနိုင်ခဲ့ပေမယ့် အခွင့်အရေးလည်း မဖန်တီးနိုင်ခဲ့ဘူး။ အခုတော့ ဂိုးသွင်းခွင့်တွေ အများကြီး ရခဲ့ပေမယ့် ဂိုးမသွင်းနိုင်ခဲ့ဘူး။ အဲဒါက ကျွန်တော်တို့ အသင်းအတွက် အကြီးမားဆုံး ပြဿနာပဲ” လို့ သူက ဆိုပါတယ်။ ကျွန်တော်တို့ ဆက်ပြီး လေ့ကျင့်ကြဖို့ လိုပါတယ်၊ ဒါပေမယ့် ဒါက ရက်စ်မတ်စ် တစ်ယောက်တည်းအတွက် မဟုတ်ပါဘူး။ အသင်းတစ်ခုလုံး အခွင့်အရေးကောင်းတွေ အများကြီး လွဲချော်ခဲ့တာပါ။ ဒီရာသီကတော့ ဒီလိုပဲ ပြီးဆုံးတော့မှာပါ။ ဒါကြောင့် အကောင်းဘက်က မြင်ပြီး တိုးတက်အောင် လုပ်ဖို့ လိုအပ်တဲ့အရာတွေကို ကြိုးစားသွားရပါမယ်။” လို့ ပြောဆိုခဲ့ပါတယ်။
အမော်ရင်ဟာ ယူနိုက်တက်နည်းပြဘဝ ပရီးမီးယားလိဂ် (၂၂)ပွဲ ကိုင်တွယ်ပြီးနောက်မှာ (၁၁)ပွဲ ရှုံးနိမ့်ထားပြီး ဖြစ်တာကြောင့် ဒါဟာ အမော်ရင်အနေနဲ့ စပို့တင်း လစ္စဘွန်းမှာ နည်းပြအဖြစ် နောက်ဆုံး (၁၁၄)ပွဲ ကိုင်တွယ်ပြီးချိန် ရှုံးနိမ့်ခဲ့တဲ့ အရေအတွက်နဲ့တောင် တူညီနေပါတယ်။
Photo Credit : BBC
ဝုလ်ဗ်ကို ရှုံးနိမ့်ခဲ့တဲ့ပွဲဟာ ၂၀၀၃-၀၄ ရာသီနောက်ပိုင်း မှတ်တမ်းတွေအရ ယူနိုက်တက်ရဲ့ ပထမပိုင်းအတွင်း ဘောက်စ်ထဲကနေ ဂိုးပေါက်ခြိမ်းခြောက်မှု လုံးဝမရှိခဲ့တဲ့ ပရီးမီးယားလိဂ်ပွဲစဉ် (၉)ပွဲမြောက်လည်း ဖြစ်ပါတယ်။ တိုက်စစ်မှူး ဟွိုင်လန်းဟာလည်း ဒီပွဲမှာ မိနစ်(၇၀)ထိ ပါဝင်ကစားခဲ့ပေမယ့် ဂိုးပေါက်ခြိမ်းခြောက်မှု (၁)ကြိမ်သာ ပြုလုပ်နိုင်ခဲ့ပြီး ပြိုင်ပွဲစုံ (၆)ပွဲဆက်တိုက် ဂိုးသွင်းယူနိုင်ခြင်း မရှိသေးပါဘူး။
ဒီပွဲမှာ အမော်ရင်က အသက်(၂၀)အရွယ် တိုင်လာ ဖရက်ဒရစ်ဆင်ကို ပွဲထွက်ခွင့်ပေးခဲ့သလို လူငယ်ကစားသမား ဟယ်ရီ အမတ်စ်ကိုလည်း ပွဲထွက်လူစာရင်းမှာ ထည့်သွင်းခဲ့ပါတယ်။ ဒါပေမယ့် အိမ်ရှင်အသင်းအတွက်တော့ မေ့မရတဲ့နေ့တစ်နေ့ ဖြစ်ခဲ့ရပါတယ်။ ယူနိုက်တက်ဟာ အမှတ်ပေးဇယားရဲ့ အဆင့်(၁၄)နေရာမှာ ရပ်တည်နေပြီး တန်းဆင်းဇုန်နဲ့ အနီးဆုံး ဝက်စ်ဟမ်းထက် (၂)မှတ်သာ ကွာဟနေပါတော့တယ်။
