ဆော်ဒီပရိုလိဂ်ပြိုင်ပွဲရဲ့ လက်ရှိချန်ပီယံ အယ်လ်ဟီလာအသင်းဟာ အသင်းရဲ့ စူပါစတား ကစားသမားဖြစ်သူ နေမာကို လက်လွတ်လိုက်ရပြီ ဖြစ်တာကြောင့် နေမာနေရာမှာ ပြန်လည် အစားထိုးဖို့အတွက် ထိပ်တန်းအဆင့် ကြယ်ပွင့်ကစားသမားတစ်ဦးကို လိုက်ရှာနေရာ နေမာနဲ့ တစ်နိုင်ငံတည်းသားဖြစ်တဲ့ ရိုဒရီဂိုကို မျက်စိကျလာခဲ့ပါတယ်။
အသက်(၂၄)နှစ်အရွယ် ဘရာဇီးလ် လက်ရွေးစင် တိုက်စစ်ကစားသမား ရိုဒရီဂိုဟာ ရီးယဲလ်မက်ဒရစ်အသင်းရဲ့ အဓိကအကျဆုံး ကစားသမားတွေထဲက တစ်ဦးဖြစ်သလို အသင်းနဲ့ ၂၀၂၈ခုနှစ်အထိ စာချုပ်သက်တမ်း ရှိနေတဲ့အပြင် တစ်ဘီလီယံအထိ တန်ကြေးရှိတဲ့ စာချုပ်ဖျက်သိမ်းကြေးလည်း ရှိနေပါတယ်။
Photo Credit : Goal
၂၀၁၉ခုနှစ်ကတည်းက ရီးယဲလ်အသင်းဆီ ရောက်ရှိနေတဲ့ ဆမ်ဘာကြယ်ပွင့် ရိုဒရီဂိုဟာ ရီးယဲလ်နဲ့အတူ ဆုဖလား အောင်မြင်မှုပေါင်းများစွာ ပိုင်ဆိုင်ခဲ့သူ ဖြစ်ပေမယ် ရီးယဲလ်အသင်းဆီ ကီလီယန် အမ်ဘာပေ ရောက်ရှိလာပြီးနောက်ပိုင်း သူရဲ့ အနာဂတ် အခြေအနေတွေက လှုပ်ခတ်လာခဲ့ရသလို လီဗာပူးလ် ပီအက်စ်ဂျီအသင်းတွေနဲ့ သတင်းတွေ မကြာခဏ ထွက်ပေါ်နေတက်ပါတယ်။
ရိုဒရီဂိုကို မန်စီးတီး လီဗာပူးလ် ပီအက်စ်ဂျီတို့လို ဥရောပထိပ်သီး အသင်းကြီးတွေသာမကဘဲ အယ်လ်ဟီလာလို ဆော်ဒီကလပ်အသင်းကြီးကလည်း သူတို့အသင်းဆီ ခေါ်ဆောင်ချင်နေပြီး အသင်းဟောင်း ဆန်းတို့စ်ဆီ ပြန်သွားတဲ့ နေမာနေရာအတွက် ရိုဒရီဂိုနဲ့ အစားထိုးသွားချင်နေပါတယ်။
Photo Credit : Reuters
အယ်လ်ဟီလာက ဆန်းတို့စ်ကစားသမားဟောင်း ရိုဒရီဂိုအတွက် တစ်နှစ်လုပ်ခအဖြစ် ယူရိုသန်း(၁၄၀)အထိပါ ပေးချေသွားဖို့ ရှိနေပြီး ရိုဒရီဂိုအနေနဲ့ ဒီပမာဏသာ ရရှိမယ်ဆိုရင် အယ်လ်နာဆာ အသင်းခေါင်းဆောင် ခရစ္စတီယာနို ရော်နယ်လ်ဒိုရဲ့နောက် ကမ္ဘာပေါ်မှာ ဒုတိယမြောက် တစ်နှစ်လုပ်ခ အများဆုံး ဘောလုံးသမားပါ ဖြစ်လာနိုင်ပါတယ်။
ဒါ့အပြင် အယ်လ်ဟီလာက ရိုဒရီဂိုကို ပြောင်းရွှေ့ကြေး ယူရိုသန်း(၃၀၀)နဲ့ပါ ကမ်းလှမ်းသွားမှာဖြစ်လို့ ဒီကမ်းလှမ်းမှုကိုသာ ရီးယဲလ်က လက်ခံခဲ့မယ်ဆိုရင် နေမာ ဘာစီလိုနာကနေ ပီအက်စ်ဂျီဆီ ပြောင်းရွှေ့တုန်းက ကမ္ဘာ့စံချိန်တင် ပြောင်းရွှေ့ကြေး ယူရို(၂၂၂)သန်းကို ကျော်ဖြတ်ပြီး နောက်ထပ် ကမ္ဘာ့စံချိန်တင် မှတ်တမ်းသစ်ကိုပါ ရေးထိုးနိုင်မှာ ဖြစ်ပါတယ်။
