မန်ချက်စတာ ယူနိုက်တက်အသင်းရဲ့ ပူးတွဲပိုင်ရှင် ဆာ ဂျင် ရတ်ကလစ်ဖ်ဟာ နည်းပြ ရူဘင် အာမိုရင်အပေါ် ဖိအားတွေ တိုးများနေချိန်မှာ မနေ့က (ကြာသပတေးနေ့) ကာရင်တန်လေ့ကျင့်ရေးကွင်းဆီကို ကိုယ်တိုင်သွားရောက်ပြီး နည်းပြနဲ့ မျက်နှာချင်းဆိုင် တွေ့ဆုံဆွေးနွေးမှုတွေ ပြုလုပ်ခဲ့တယ်လို့ သတင်းများထွက်ပေါ်လာပါတယ်။

ဒီတွေ့ဆုံမှုဟာ ကြိုတင်စီစဉ်ထားပြီးသားလို့ ဆိုပေမယ့် အသင်းရဲ့ ဆိုးရွားလှတဲ့ ခြေစွမ်းကြောင့် ဆွေးနွေးမှုတွေရဲ့ အဓိကအကြောင်းအရာဟာ ရလဒ်ပိုင်းဆိုင်ရာတွေပဲ ဖြစ်ခဲ့မှာ သေချာပါတယ်။ ယူနိုက်တက်အသင်းဟာ လက်ရှိမှာ ပရီးမီးယားလိဂ်အဆင့် (၁၄)နေရာမှာ ရပ်တည်နေပြီး ကာရာဘောင်းဖလားကနေလည်း အရှက်တကွဲ ထွက်ခဲ့ရပြီးဖြစ်ပါတယ်။

Photo Credit : The Sun

The Athletic သတင်းဌာနရဲ့ ဖော်ပြချက်အရ ရတ်ကလစ်ဖ်ဟာ ကြာသပတေးနေ့က ကာရင်တန်လေ့ကျင့်ရေးကွင်းကို ရဟတ်ယာဉ်နဲ့ ဆိုက်ရောက်လာခဲ့ပြီး နည်းပြ အာမိုရင်အပြင် အသင်းရဲ့ တခြားအကြီးတန်းအရာရှိတွေနဲ့ပါ တွေ့ဆုံခဲ့တယ်လို့ သိရပါတယ်။ အစည်းအဝေးဟာ ကြိုတင်စီစဉ်ထားခဲ့ပေမယ့် အသင်းရဲ့ ကြောက်စရာကောင်းတဲ့ ရာသီအဖွင့်ရလဒ်တွေကြောင့် ဒီကိစ္စဟာ အဓိက ဆွေးနွေးစရာဖြစ်ခဲ့တယ်လို့ ဆိုပါတယ်။

အာမိုရင်ဟာ ပရီးမီးယားလိဂ် (၄)ပွဲမှာ (၁)ပွဲသာ အနိုင်ရထားသေးပြီး လိဂ်တူးကလပ် ဂရင်းမ်စဘီကို ရှုံးနိမ့်ပြီး ကာရာဘောင်းဖလားပြိုင်ပွဲကနေပါ ထွက်ခဲ့ရတာဖြစ်ပါတယ်။ နွေရာသီမှာ ငွေကြေးသုံးစွဲမှုကြီးကြီးမားမား ပြုလုပ်ခဲ့ပေမယ့် အသင်းက အဆင့် (၁၄)မှာ ရုန်းကန်နေရဆဲဖြစ်ပါတယ်။ အာမိုရင်ရဲ့ ၃-၄-၃ ကစားကွက်ဟာ အကြီးအကျယ် မေးခွန်းထုတ်ခံနေရပေမယ့် နည်းပြကိုယ်တိုင်က လွန်ခဲ့တဲ့ရက်ပိုင်းတွေအတွင်းမှာ သူ့ရဲ့ကစားဟန်ကို ပြောင်းလဲမှာမဟုတ်ကြောင်းနဲ့ နည်းစနစ်ပြောင်းချင်ရင် သူ့ကိုအလုပ်ထုတ်မှသာ ဖြစ်နိုင်မယ်လို့ ခေါင်းမာစွာ တုံ့ပြန်ထားပါတယ်။

Photo Credit : The New York Times

နောက်ဆုံးရသတင်းတွေအရ ကစားသမားတွေကိုယ်တိုင်ကလည်း အဆိုပါ ၃-၄-၃ ကစားကွက်အပေါ်မှာ မပျော်မရွှင်ဖြစ်နေကြပြီး နည်းပြနဲ့ ရင်းနှီးတဲ့ဆက်ဆံရေးရှိတယ်လို့ဆိုတဲ့ အသင်းခေါင်းဆောင် ဘရူနို ဖာနန်ဒက်စ်ကိုယ်တိုင်ကလည်း အသင်းရဲ့ နည်းစနစ်ပိုင်းဆိုင်ရာ တည်ဆောက်ပုံကို မကျေနပ်ဖြစ်နေတယ်လို့ သိရပါတယ်။

မန်ချက်စတာ ယူနိုက်တက်အသင်းဟာ မနက်ဖြန် (စနေနေ့) မှာ ချယ်လ်ဆီးအသင်းကို အိုးလ်ထရက်ဖို့ဒ်ကွင်းမှာ လက်ခံကစားရမှာဖြစ်ပြီး ဒီပွဲစဉ်ဟာ အာမိုရင်အတွက် မဖြစ်မနေ အနိုင်ရရမယ့်ပွဲလို့ သတ်မှတ်ခံထားရပါတယ်။ ဒီပွဲမှာ အနိုင်ရခဲ့ရင် တင်းမာမှုအချို့ကို လျော့ကျသွားစေနိုင်ပေမယ့် နောက်ထပ်ရှုံးပွဲတစ်ပွဲကတော့ ရတ်ကလစ်ဖ်ကို အဆုံးအဖြတ်တစ်ခုချဖို့ ပိုမိုနီးစပ်သွားစေနိုင်ပါတယ်။ လောလောဆယ်မှာတော့ နည်းပြက သူ့နေရာမှာ ဆက်ရှိနေသေးပေမယ့် သူ့အတွက် အမှားခံနိုင်တဲ့ အခြေအနေကတော့ အလွန်ကျဉ်းမြောင်းလာနေပြီ ဖြစ်ပါတယ်။