တော့တင်ဟမ် ဟော့စပါးအသင်းဟာ မန်စီးတီးက တောင်ပံကစားသမား ဆာဗင်ဟိုကို ခေါ်ယူဖို့ ကြိုးပမ်းနေစဉ်မှာပဲ ကလပ်ရဲ့ အဓိက ကစားသမားတွေဖြစ်တဲ့ ဂျိမ်းစ် မက်ဒီဆင်ရဲ့ ဒဏ်ရာအခြေအနေနဲ့ အသင်းခေါင်းဆောင် ဆွန်ဟောင်မင် ထွက်ခွာသွားမှုတို့ကြောင့် ခရစ္စတယ် ပဲလေ့စ်အသင်းရဲ့ ကွင်းလယ်တိုက်စစ်ကစားသမား အီဘယ်ရီချီ အက်ဇေးကို ခေါ်ယူဖို့အတွက် ဆွေးနွေးမှုတွေ ပြန်လည်စတင်လိုက်ပြီ ဖြစ်ပါတယ်။
စပါးအသင်းဟာ သူတို့ရဲ့ တိုက်စစ်ပိုင်းကို အင်အားဖြည့်တင်းဖို့အတွက် ဘရာဇီးလ်တောင်ပံကစားသမား ဆာဗင်ဟိုကို ခေါ်ယူနိုင်ဖို့ အသည်းအသန် ကြိုးပမ်းနေချိန်မှာပဲ အသင်းရဲ့ ကွင်းလယ်တိုက်စစ်ပိုင်းအတွက် အရေးပါသူ ဂျိမ်းစ် မက်ဒီဆင် ဒဏ်ရာပြဿနာနဲ့ ရင်ဆိုင်နေရပြီး အသင်းရဲ့ အထင်ကရ ကစားသမားဖြစ်သူ ဆွန်ဟောင်မင်ကလည်း အသင်းကနေ ထွက်ခွာသွားခဲ့တာကြောင့် တိုက်စစ်ပိုင်းမှာ ကြီးမားတဲ့ လစ်ဟာမှု ဖြစ်ပေါ်ခဲ့ပါတယ်။
Photo Credit : Youtube
ဒီအခြေအနေတွေကြောင့် စပါးအသင်းဟာ သူတို့ အစောပိုင်းကတည်းက ပစ်မှတ်ထားခဲ့တဲ့ အင်္ဂလန်ကွင်းလယ်လူ အက်ဇေးကို ခေါ်ယူဖို့အတွက် ပြန်လည်လှုပ်ရှားလာခဲ့တာဖြစ်ပြီး ဒီအပြောင်းအရွှေ့ဟာ ဆာဗင်ဟိုရဲ့ အပြောင်းအရွှေ့နဲ့ သီးခြားစီ ဖြစ်တယ်လို့ သိရပါတယ်။
ကစားသမားဖြစ်သူ အက်ဇေးဘက်က စပါးအသင်းကို ပြောင်းရွှေ့ဖို့ စိတ်အားထက်သန်နေပေမယ့် ဒီအပြောင်းအရွှေ့ ဖြစ်မြောက်ရေးကတော့ ခရစ္စတယ်ပဲလေ့စ်အသင်းရဲ့ ဆုံးဖြတ်ချက်အပေါ်မှာပဲ မူတည်နေပါတယ်။ အကြောင်းရင်းကတော့ အက်ဇေးရဲ့ စာချုပ်ပါ သတ်မှတ်ပြောင်းရွှေ့ကြေးဖြင့် ခေါ်ယူခွင့် (release clause) ဟာ သက်တမ်းကုန်ဆုံးသွားပြီ ဖြစ်တာကြောင့် ပဲလေ့စ်အသင်းဟာ စပါးအသင်းရဲ့ ကမ်းလှမ်းမှုကို ညှိနှိုင်းရာမှာ အသာစီးရနေပြီး သူတို့ သတ်မှတ်တဲ့ ဈေးနှုန်းကို တောင်းဆိုခွင့် အပြည့်အဝ ရှိနေတာကြောင့် ဖြစ်ပါတယ်။
Photo Credit : Football365
လက်ရှိမှာတော့ စပါးအသင်းဟာ တိုက်စစ်ပိုင်း လစ်ဟာမှုကို ဖြေရှင်းဖို့အတွက် ဆာဗင်ဟိုနဲ့ အက်ဇေးတို့ နှစ်ဦးလုံးကို တစ်ပြိုင်နက်တည်း ခေါ်ယူနိုင်ဖို့ ကြိုးပမ်းနေပြီး အက်ဇေးရဲ့ အပြောင်းအရွှေ့ကတော့ ခက်ခဲတဲ့ ညှိနှိုင်းမှုတွေ ပြုလုပ်ရဖွယ် ရှိနေပါတယ်။
စပါးအသင်းရဲ့ အခါးသီးဆုံး မြောက်လန်ဒန် မြို့ခံကလပ် အာဆင်နယ်အသင်းဟာလည်း ယိုကယ်ရက်စ် မာဒူအက်ကေးတို့လို တိုက်စစ်ကစားသမားတွေ ခေါ်ယူဖြည့်တင်းထားပေမယ့် အက်ဇေးကိုလည်း အသင်းရဲ့ အဓိကပစ်မှတ်အဖြစ် သတ်မှတ်ထားပြီး ကြိုးပမ်းမှုတွေ ရှိနေတာကြောင့် စပါးနဲ့ အာဆင်နယ်တို့က အက်ဇေးအပြောင်းအရွှေ့နဲ့ ပတ်သက်ပြီး အကြိတ်အနယ် ယှဉ်ပြိုင်ရဖွယ်လည်း ရှိနေပါတယ်။
