ဥရုဂွေးတိုက်စစ်မှူး ဒါဝင် နူနက်ဇ်ဟာ ဆော်ဒီကလပ် အယ်လ်ဟီလာလ်အသင်းဆီ ပြောင်းရွှေ့မှု အပြီးသတ်သွားပြီးနောက် လီဗာပူးလ်အသင်းနဲ့ အသင်းပရိသတ်တွေကို ရင်နင့်ဖွယ် နှုတ်ဆက်စကားတစ်ရပ် ဆိုရှယ်မီဒီယာကနေတစ်ဆင့် ပြောကြားခဲ့ပါတယ်။
နူနက်ဇ်ရဲ့ အပြောင်းအရွှေ့ကို ပြီးခဲ့တဲ့ သီတင်းပတ်က အပြီးသတ်ခဲ့တာဖြစ်ပြီး ကနဦးပြောင်းရွှေ့ကြေး ပေါင်(၄၆.၂)သန်းနဲ့ အပိုဆုကြေးများ အပါအဝင် ပေါင်(၅၆.၆)သန်းအထိ တက်နိုင်တဲ့ တန်ဖိုးနဲ့ အယ်လ်ဟီလာလ်အသင်းထံ ရောက်ရှိခဲ့တာပါ။ ဥရုဂွေးတိုက်စစ်မှူးဟာ အန်ဖီးလ်ကွင်းမှာ အတက်အကျများခဲ့တဲ့ သုံးနှစ်တာကာလကို ဖြတ်သန်းခဲ့ပြီး သူ့အပေါ်ထားရှိခဲ့တဲ့ ကနဦးမျှော်လင့်ချက်တွေကို အပြည့်အဝ မဖြည့်ဆည်းနိုင်ခဲ့တဲ့အတွက် ဝမ်းနည်းမှုအနည်းငယ်နဲ့ ထွက်ခွာခဲ့ရပါတယ်။
Photo Credit : Goal
ဘယ်လိုပဲဖြစ်ဖြစ် သူဟာ ပြီးခဲ့တဲ့ရာသီက လီဗာပူးလ်အသင်း ပရီးမီးယားလိဂ်ချန်ပီယံဖြစ်ရာမှာ အရေးပါတဲ့ အခန်းကဏ္ဍကနေ ပါဝင်ခဲ့ပြီး အရှေ့အလယ်ပိုင်းဒေသကို ပရီးမီးယားလိဂ်ချန်ပီယံတစ်ဦးအဖြစ် ရောက်ရှိသွားခဲ့ပါတယ်။ သူ့ရဲ့ နှုတ်ဆက်စာမှာ နူနက်ဇ်က “ကျေးဇူးပါပဲ လီဗာပူးလ်။ သုံးနှစ်ကြာပြီးတဲ့နောက်မှာတော့ နှုတ်ဆက်ရမယ့်အချိန် ရောက်လာပါပြီ။ ကျွန်တော့်ဘဝမှာ ထာဝရရှင်သန်နေမယ့် မရေမတွက်နိုင်တဲ့ အမှတ်တရတွေကို သယ်ဆောင်သွားမှာပါ။”
“ကျွန်တော့်ကို ဘယ်တော့မှ လက်မလျှော့ဘဲ အကောင်းအဆိုး အခြေအနေတိုင်းမှာ အမြဲတမ်း ကျောထောက်နောက်ခံပေးခဲ့တဲ့ ပရိသတ်တွေရဲ့ ချစ်ခြင်းမေတ္တာကြောင့် ပြည့်စုံတဲ့နှလုံးသားနဲ့ ကျွန်တော်ထွက်ခွာပါတယ်။ လီဗာပူးလ်ဆိုတာ ကျွန်တော်ဘယ်သူလဲဆိုတဲ့ အစိတ်အပိုင်းတစ်ခုအဖြစ် အမြဲရှိနေမှာပါ။ စကားလုံးတွေနဲ့ ဖော်ပြလို့မရနိုင်အောင် ခင်ဗျားတို့ကို လွမ်းနေမှာပါ။ ဝန်ထမ်းတွေနဲ့ အသင်းဖော်အားလုံးကိုလည်း ကျေးဇူးတင်ပါတယ်။ အနာဂတ်အတွက် အကောင်းဆုံးဖြစ်ပါစေလို့ ဆုတောင်းပေးပါတယ်။” လို့ ရေးသား ဖော်ပြသွားပါတယ်။
Photo Credit : Goal
နူနက်ဇ် ထွက်ခွာသွားပြီဖြစ်တာကြောင့် လီဗာပူးလ်အသင်းဟာ နယူးကာဆယ်တိုက်စစ်မှူး အလက်ဇန်းဒါး အီဆက်ခ်ကို ခေါ်ယူဖို့ ကြိုးပမ်းမှုတွေကို အရှိန်မြှင့်လာဖွယ်ရှိနေပါတယ်။ ဆွီဒင်တိုက်စစ်မှူးကိုယ်တိုင်ကလည်း အန်ဖီးလ်ကို ပြောင်းရွှေ့လိုကြောင်း ရှင်းရှင်းလင်းလင်း ပြောကြားထားပြီး ဒုတိယအကြိမ် ကမ်းလှမ်းမှု ပြင်ဆင်နေပြီဆိုတဲ့ သတင်းတွေကြောင့် ဒီအပြောင်းအရွှေ့ဟာ အချိန်အတိုင်းအတာတစ်ခုအတွင်း ဖြစ်လာနိုင်ပါတယ်။ ဒါပေမဲ့ နယူးကာဆယ်အသင်းကတော့ သူတို့ရဲ့အဓိကကစားသမားကို အစားထိုးမယ့်သူမရသေးဘဲ လက်လွှတ်ဖို့ ဆန္ဒမရှိသေးဘဲ မတန်တဆများပြားတဲ့ ပြောင်းရွှေ့ကြေးကို တောင်းဆိုသွားမှာ ဖြစ်ပါတယ်။ ဒါကြောင့် ဒီအပြောင်းအရွှေ့ဇာတ်လမ်းကတော့ ဈေးကွက်အတွင်း အချိန်အတော်ကြာ ဆက်လက်ဖြစ်ပေါ်နေဦးမှာပါ။
လီဗာပူးလ်အသင်းခေါင်းဆောင် ဗာဂျေးလ် ဗန်ဒိုက်ခ်ကလည်း အသင်းအနေနဲ့ ဒီနွေရာသီမှာ ငွေကြေးအများအပြား သုံးစွဲထားပြီးဖြစ်ပေမယ့် နောက်ထပ်တိုက်စစ်အင်အား ဖြည့်တင်းဖို့ လိုအပ်နေသေးကြောင်း အခိုင်အမာ ပြောကြားထားပါတယ်။ နူနက်ဇ်ကို လက်လွှတ်လိုက်ရခြင်းဟာ ကစားသမားသစ်တွေ ဘာကြောင့်ထပ်လိုနေလဲဆိုတဲ့ အဓိကအကြောင်းရင်းတွေထဲက တစ်ခုဖြစ်ကြောင်း နယ်သာလန်နောက်ခံလူက ထောက်ပြခဲ့ပါတယ်။ အီဆက်က နောက်တစ်ယောက်ဖြစ်လာမလား ဆိုတာကိုတော့ ဆက်လက်စောင့်ကြည့်ရမှာ ဖြစ်ပါတယ်။
