လီယွန်နယ် မက်ဆီ ဦးဆောင်တဲ့ အင်တာ မိုင်ယာမီအသင်းဟာ ဒီနေ့ မနက်အစောပိုင်းကပဲ လော့အိန်ဂျယ်လိစ်က ဘီအမ်အို အားကစားကွင်းမှာ အယ်လ်အေ အက်စ်စီအသင်းနဲ့ CONCACAF ချန်ပီယံလိဂ်ပြိုင်ပွဲ ကွာတားဖိုင်နယ် ပထမအကျော့ပွဲစဉ်ကို ယှဉ်ပြိုင်ကစားခဲ့ရာ (၁)ဂိုး ဂိုးမရှိနဲ့ ရှုံးနိမ့်သွားခဲ့ရပြီး ဒါဟာ အင်တာ မိုင်ယာမီအတွက်တော့ ဒီရာသီရဲ့ ပထမဆုံး ရှုံးပွဲလည်း ဖြစ်သွားခဲ့ရပါတယ်။
ဒီပွဲစဉ်ကို အားကစားနဲ့ အနုပညာနယ်ပယ်က နာမည်ကျော် ပုဂ္ဂိုလ်တွေဖြစ်တဲ့ စတီဖင် ကာရီ၊ ဂျင်မီ ဘတ်တလာ၊ ဘက်ကီ ဂျီနဲ့ လီယွန်နယ် ရစ်ချီတို့ လာရောက် အားပေးခဲ့ကြပေမယ့် အယ်လ်အေ အက်စီအတွက် တစ်လုံးတည်းသော အနိုင်ဂိုး သွင်းယူပေးခဲ့တဲ့ တိုက်စစ်ကစားသမား နေသန် အော်ဒတ်ဇ်က ဒီပွဲအတွက် အဓိကကျသူ ဖြစ်သွားခဲ့ပါတယ်။
Photo Credit : Los Angeles Football Club
ဒီပွဲမှာ ဧည့်သည် အင်တာ မိုင်ယာမီက ဘောလုံးကို ပိုင်နိုင်စွာ ကစားနိုင်ခဲ့ပေမယ့်လည်း ဂိုးသွင်းခွင့်တွေ အသုံးမချနိုင်ခဲ့တာကြောင့် ဒုတိယပိုင်း ပြန်စပြီး သိပ်မကြာခင်မှာပဲ အော်ဇတ်ဒ်ရဲ့ ဂိုးနဲ့ အရှုံးပေးခဲ့ရပါတယ်။ ဒါပေမယ့် အနိုင်ဂိုးရှင် အော်ဇတ်ဒ်ဟာ ပထမပိုင်း ပွဲချိန်မှာ မိုင်ယာမီ နောက်ခံလူအပေါ် တံတောင်နဲ့ ထိုးခဲ့တဲ့အပေါ် အဝါကတ်သာ ပြသခဲ့တာက အငြင်းပွားစရာ ဖြစ်ခဲ့ပါတယ်။
မိုင်ယာမီရဲ့ အသင်းခေါင်းဆောင် မက်ဆီနဲ့ အယ်လ်အေရဲ့ ဝါရင့် ဂိုးသမား ဟူဂို လိုရစ်တို့ဟာ ၂၀၂၂ ကာတာ ကမ္ဘာ့ဖလားဖိုင်နယ်ပွဲကြီးနောက်ပိုင်း ပထမဆုံးအကြိမ်အဖြစ် ပြန်လည် ရင်ဆိုင်ခဲ့ရတာ ဖြစ်သလို လိုရစ်က မက်ဆီရဲ့ ဖရီးကစ်ကန်ချက်ကိုလည်း ကာကွယ်မှု ပြုလုပ်သွားခဲ့ပါတယ်။
Photo Credit : USA Today
ဒီရှုံးပွဲဟာ အင်တာ မိုင်ယာမီအသင်းအတွက်တော့ ပြီးခဲ့တဲ့ ၂၀၂၄ နိုဝင်ဘာတုန်းက MLS ပလေးအော့ဖ် ပထမအဆင့်မှာ အက်တလန်တာအသင်းကို ရှုံးနိမ့်ပြီးနောက်ပိုင်း ပထမဆုံးအကြိမ် ရှုံးပွဲတွေ့ခဲ့ရတာလည်း ဖြစ်ပါတယ်။ ဒါပေမယ့် ကျဉ်းမြောင်းတဲ့ ရလဒ်နဲ့သာ ရှုံးခဲ့တာဖြစ်လို့ ဒုတိယအကျော့မှာ ပြန်လည် အနိုင်ယူနိုင်မယ့် အခွင့်အရေးတွေ ရှိနေပါသေးတယ်။
အင်တာ မိုင်ယာမီဟာ အယ်လ်အေ အက်စ်စီနဲ့ ဒုတိယအကျော့ပွဲစဉ် မကစားခင် လာမယ့်(၇)ရက်နေ့မှာပဲ မေဂျာလိဂ် အမှတ်ပေးပွဲစဉ်အဖြစ် တိုရန်တို အက်စ်စီအသင်းနဲ့ ကစားသွားရဦးမှာဖြစ်ပြီး တိုရန်တိုက (၆)ပွဲကစားထားပြီးချိန် နိုင်ပွဲလုံးဝမရသေးတဲ့ အသင်းဖြစ်လို့ မိုင်ယာမီအတွက် သက်တောင့်သက်သာနဲ့ ကစားရနိုင်ဖွယ်လည်း ရှိပါတယ်။
