အယ်လ်နာဆာအသင်းက ပေါ်တူဂီ စူပါစတားကြီး အသင်းခေါင်းဆောင် တိုက်စစ်မှူး ခရစ္စတီယာနို ရော်နယ်လ်ဒိုရဲ့ သားဖြစ်သူ မက်တီအိုကတော့ ပြင်သစ်တိုက်စစ်ကစားသမား ကီလီယန် အမ်ဘာပေကို ကြိုက်နှစ်သက်သူ ဖြစ်တဲ့အပြင် ဘာပေက သူ့အဖေထက်တောင် ပိုကောင်းသေးတယ်ဆိုပြီး ပြောဆိုခဲ့သေးတယ်လို့ ရော်နယ်လ်ဒိုကိုယ်တိုင် ဖွင့်ဟခဲ့ပါတယ်။
GOAT ကြီး ရော်နယ်လ်ဒိုဟာ သားသမီး(၆)ယောက်အထိ ပိုင်ဆိုင်ထားသူဖြစ်ပြီး သားကြီး ခရစ္စတီယာနို ဂျူနီယာကို မွေးဖွားအပြီးမှာ မက်တီအိုနဲ့ အီဗာဆိုတဲ့ အမြွာ မောင်နှစ်မနှစ်ဦးကိုလည်း ထပ်မံ ပိုင်ဆိုင်ခဲ့ပါတယ်။ မက်တီအိုကတော့ လက်ရှိမှာ အသက်(၇)နှစ်အရွယ် ရှိနေပြီ ဖြစ်သလို ဘာပေရဲ့ အမာခံ ပရိသတ်လည်း ဖြစ်ပါတယ်။
Photo Credit : Bleacher Report
(၇)နှစ်သားလေး မက်တီအိုဟာ သူရဲ့ဖခင်ကို လေးစားအတုယူပြီး ပြင်သစ်စူပါစတားတစ်ဦးပါ ဖြစ်လာခဲ့တဲ့ တိုက်စစ်ကစားသမား ဘာပေကို အတော်လေး သဘောကျသူ ဖြစ်တဲ့အပြင် ဘာပေဟာ သူ့အဖေ ရော်နယ်လ်ဒိုနဲ့ ဖခင်ဖြစ်သူရဲ့ မဟာပြိုင်ဘက်ကြီး မက်ဆီထက်ပါ ပိုကောင်းတဲ့ ကစားသမားတစ်ဦးအဖြစ်ပါ ယုံကြည်နေပါတယ်။
ဒီအကြောင်းအရာနဲ့ ပတ်သက်ပြီး ရော်နယ်လ်ဒိုက “ကျွန်တော့်သား မက်တီအိုက ကီလီယန် အမ်ဘာပေကို တော်တော်လေး သဘောကျတာ။ တစ်ခါတစ်လေဆိုရင်တောင် ဒယ်ဒီရေ ဘာပေက ဒယ်ဒီထက်တောင် ပိုကောင်းသေးတယ်ဆိုပြီး လာပြောသေးတယ်။ အဲ့ဒီအခါကျရင် ကျွန်တော်ကလည်း မဟုတ်ဘူး ငါက သူ့ထက် ပိုကောင်းတာ။ သူ့ထက်လည်း ဂိုးတွေအများကြီး သွင်းထားတယ်လို့ ပြန်ပြောရသေးတယ်။” လို့ ပြောဆိုခဲ့ပါတယ်။
Photo Credit : News18
ရော်နယ်လ်ဒိုဟာ လက်ရှိမှာ အယ်လ်နာဆာအသင်းနဲ့အတူ တတိယမြောက် ဘောလုံးရာသီကို ဖြတ်သန်းလို့နေပြီး ကစားသမားဘဝအတွင်း ဂိုးပေါင်း (၁၀၀၀)ပြည့်မြောက်အောင် သွင်းယူသွားဖို့ပါ စိတ်အားထက်သန်သလို လက်ရှိမှာ သူရဲ့ စုစုပေါင်းသွင်းဂိုးအရေအတွက်က (၉၂၁)ဂိုးအထိတောင် ရှိနေရပါတယ်။
ဘာပေကလည်း ဒီနွေမှာပဲ ရော်နယ်လ်ဒိုရဲ့ ကလပ်အသင်းဖြစ်တဲ့ ရီးယဲလ်မက်ဒရစ်အသင်းဆီ အလွတ်နဲ့ ပြောင်းရွှေ့ ရောက်ရှိထားပြီး ရာသီအစပိုင်းမှာ ဝေဖန်မှုတွေနဲ့ ရုန်းကန်နေခဲ့ရပေမယ့် လက်ရှိမှာတော့ ရီးယဲလ်အတွက် ပြိုင်ပွဲစုံ (၂၁)ဂိုးအထိ သွင်းယူပေးထားနိုင်သလို အသင်းရဲ့ အထောင်တိုက်စစ်နေရာမှာလည်း အထူး ခြေစွမ်းပြနေပါတယ်။
