ဆော်ဒီပရိုလိဂ် ထိပ်သီးကလပ် အယ်လ်နာဆာအသင်းဟာ လက်ရှိမှာ အသင်းရဲ့ တိုက်စစ်ပိုင်းအတွက် အက်စတွန် ဗီလာအသင်းရဲ့ ကိုလံဘီယာ တိုက်စစ်ကစားသမားလေး ဂျွန်ဒူရန်ကို ပြောင်းရွှေ့ကြေး ယူရို(၇၇)သန်းနဲ့ ခေါ်ယူဖို့ သဘောတူညီမှု ရရှိသွားခဲ့ပြီး အပြောင်းအရွှေ့က here we go သွားပြီပဲ ဖြစ်ပါတယ်။
အယ်လ်နာဆာဟာ အသင်းအတွက် အားထားရတဲ့ တိုက်စစ်ကစားသမား တာလီစကာကို နည်းပြမော်ရင်ဟိုရဲ့ ဖီနာဘာချီအသင်းဆီ လက်လွတ်လိုက်ရပြီးနောက် သူ့နေရာမှာ အစားထိုးဖို့အတွက် ကစားသမားတွေတစ်ဦးကို ရှာဖွေခဲ့ပြီး လေဗာကူဆင်ရဲ့ နိုင်ဂျီးရီးယား တိုက်စစ်မှူး ဗစ်တာ ဘိုနီဖေ့စ်ကို ကြိုးပမ်းခဲ့ပါသေးတယ်။
Photo Credit : The Independent
အယ်လ်နာဆာအသင်းနဲ့ ဘိုနီဖေ့စ်တို့ကြားမှာ သဘောတူညီမှု ရရှိသွားခဲ့ပေမယ့်လည်း အယ်လ်နာဆာနဲ့ လေဗာကူဆင်တို့ကြားမှာတော့ ဘိုနီဖေ့စ်ရဲ့ ပြောင်းရွှေ့ကြေးနဲ့ ပတ်သက်ပြီး သဘောတူညီမှု မရနိုင်ခဲ့တဲ့အတွက် အယ်လ်နာဆာက ဘိုနီဖေ့စ်အစား အသက်(၂၁)အရွယ် တိုက်စစ်ကစားသမားလေး ဒူရန်ကိုသာ ပြောင်းလဲ ပစ်မှတ်ထားလာခဲ့ပါတော့တယ်။
ဒူရန်က ဒီရာသီမှာ ဗီလာနဲ့ စာချုပ်သက်တမ်း တိုးမြှင့်ထားသလို အသင်းအတွက်ကိုလည်း ပြိုင်ပွဲစုံ (၁၂)ဂိုးအထိ သွင်းယူပေးနိုင်ခဲ့ပြီး ဘာစီလိုနာ ပီအက်စ်ဂျီ ရီးယဲလ်နဲ့ ချယ်လ်ဆီးအသင်းတို့ရဲ့ စိတ်ဝင်စားခြင်းကိုပါ ခံနေရသူလည်း ဖြစ်ပါတယ်။ ဒါ့အပြင် အယ်လ်နာဆာကလည်း ဒူရန်ကို သူတို့အသင်းဆီ ခေါ်ဆောင်ဖို့ ပစ်မှတ်ထားလာခဲ့ရင်း တရားဝင် ကမ်းလှမ်းမှုပါ လုပ်ဆောင်လာခဲ့ပါတယ်။
Photo Credit : Transfermarket
အယ်လ်နာဆာက ဒူရန်အတွက် ပြောင်းရွှေ့ကြေးအဖြစ် ယူရို(၇၇)သန်း + အပိုဆုကြေးတို့နဲ့ ကမ်းလှမ်းခဲ့ရာ ဒီကမ်းလှမ်းချက်ကို ဗီလာဘက်က လက်ခံသွားခဲ့တာကြောင့် အပြောင်းအရွှေ့က here we go ဖြစ်သွားခဲ့ရပြီ ဖြစ်ပါတယ်။ မနက်ဖြန်မှာပဲ ဆေးစစ်မှုတွေ လုပ်သွားတော့မှာဖြစ်ပြီး ဒူရန်လည်း ဆော်ဒီဆီကို ခရီးနှင်ရပါတော့မယ်။
ဒီအပြောင်းအရွှေ့ကြောင့် ဂျွန်ဒူရန်ဟာ ဆော်ဒီလိဂ်မှာ အယ်လ်ဟီလာ ကစားသမားဟောင်း နေမာပြီးရင် လိဂ်ပြိုင်ပွဲရဲ့ ဒုတိယမြောက် ပြောင်းရွှေ့ကြေး အမြင့်မားဆုံး ကစားသမားတစ်ဦး ဖြစ်လာတော့မှာ ဖြစ်သလို ရော်နယ်လ်ဒို မာနေးတို့လို ထိပ်တန်း တိုက်စစ်ကစားသမားတွေနဲ့ပါ တွဲဖက် ကစားခွင့်ရသွားတော့မှာလည်း ဖြစ်ပါတယ်။
