နော်တင်ဟမ် ဖောရက်စ်အသင်းနည်းပြ နူနို အက်စ်ပီရီတို ဆန်းတို့က လက်ရှိ ပရီးမီးယားလိဂ် အမှတ်ပေးဇယားမှာ ဦးဆောင်နေတဲ့ လီဗာပူးလ်အသင်းရဲ့ နည်းပြ အာနေး စလော့ထက် တစ်ရာသီ အကောင်းဆုံး နည်းပြဆုကို ဆွတ်ခူးနိုင်သင့်တယ်လို့ မန်စီးတီးနဲ့ ချယ်လ်ဆီးကစားသမားဟောင်း ရှောင် ရိုက် ဖီးလစ်က သုံးသပ်ပြောဆိုလိုက်ပါတယ်။
စပါး ဝုလ်ဗ်နဲ့ အယ်လ်အစ်တီဟတ် နည်းပြဟောင်းကြီး နူနို ဆန်းတို့ဟာ နော်တင်ဟမ်ကို ကိုင်တွယ်နေစဉ်အတွင်း အကောင်းဆုံး စွမ်းဆောင်ပေးထားနိုင်ခဲ့ပြီး ပရီးမီးယားလိဂ် အမှတ်ပေးဇယားမှာ အဆင့်(၃)နေရာ ရပ်တည်ထားနိုင်သလို အက်ဖ်အေဖလားမှာလည်း ဆီမီးဖိုင်နယ်ထိ တက်လှမ်းထားနိုင်ပါတယ်။
Photo Credit : The Independent
ဆန်းတို့ရဲ့ နော်တင်ဟမ်အသင်းဟာ လက်ရှိ ပရီးမီးယားလိဂ်မှာ အဆင့်(၄)နေရာက ချယ်လ်ဆီးကို (၅)မှတ် အဆင့်(၆)နေရာက မန်စီးတီးကိုလည်း (၆)မှတ်အထိ ဖြတ်တောက်ထားနိုင်ခဲ့တာဖြစ်ပြီး အသင်းနဲ့ နှစ်ပေါင်းများစွာ ဝေးကွာနေတဲ့ ချန်ပီယံလိဂ်ဝင်ခွင့်ကို ပြန်လည် ရယူနိုင်ဖို့ပါ အခြေအနေကောင်းလျက် ရှိနေပါတယ်။
ဒီလို စွမ်းဆောင်ရည်တွေကြောင့် နူနို ဆန်းတို့ကို ဒီရာသီမှ လီဗာပူးလ်ကို ကိုင်တွယ်ပြီး ပရီးမီးယားလိဂ် ချန်ပီယံဆု ရယူပေးနိုင်ဖို့ အခြေအနေကောင်းနေတဲ့ နည်းပြစလော့ထက် အကောင်းဆုံးနည်းပြဆု ရသင့်တယ်လို့ ပရီးမီးယားလိဂ် ကစားသမားဟောင်း ရိုက် ဖီးလစ်က မှတ်ချက်ပြုလိုက်ပါတယ်။ “ကျွန်တော့်အတွက်ဆိုရင် နူနိုက ရာသီအကောင်းဆုံး နည်းပြဖြစ်ရမယ်။”
Photo Credit : Optus Sports
“လူတိုင်းက ကျွန်တော့်ကို အာနေး စလော့ရော ဘယ်လိုလဲလို့ မေးကြတယ်။ ကျွန်တော်က သူ့ အံ့သြစရာကောင်းတဲ့ အလုပ်လုပ်ခဲ့တယ်လို့ ထင်ပါတယ်။ ဒါပေမယ့် သူ လီဗာပူးမှာ ရထားတဲ့ ကစားသမားတွေနဲ့ ယှဉ်ရင် နူနိုမှာ ရှိတဲ့ ကစားသမားတွေနဲ့ နူနို လုပ်ခဲ့သလို လုပ်နိုင်မယ်လို့ မထင်ဘူး။ ဒါပေမယ့် နူနိုကတော့ အန်ဖီးလ်မှာတောင် အနိုင်ရခဲ့တယ်။”
“ဘယ်သူမှ သူ အနိုင်ရလိမ့်မယ်လို့ မထင်ထားတဲ့ အသင်းတွေကို အနိုင်ယူခဲ့တယ်။ သူတို့ ကစားပုံက ကောင်းမွန်တယ်။ ဒါက ကံကောင်းလို့ ဒါမှမဟုတ် အလစ်အငိုက်ဖမ်းလို့ ရတာ မဟုတ်ဘူး။ သူတို့မှာ အစီအစဉ်ရှိတယ်။ အဲဒီအစီအစဉ်က အလုပ်ဖြစ်တယ်။ စိတ်ဝင်စားစရာက လူတွေက သူတို့ ဒီလို ဘယ်လောက်ကြာကြာ ဆက်လုပ်နိုင်မလဲလို့ ပြောကြတယ်။ ဘာလို့လဲဆိုတော့ သူတို့ဟာ ပရီးမီးယားလိဂ်မှာ ဘောလုံးပိုင်ဆိုင်မှု အနည်းဆုံးနဲ့ ဒီလို အောင်မြင်နေတာပါ။” လို့ သုံးသပ်လိုက်ပါတယ်။
