မနေ့ညက အိုးထရက်ဖို့ဒ်ကွင်းမှာ ယှဉ်ပြိုင်ခဲ့တဲ့ မန်ချက်စတာ ယူနိုက်တက်အသင်းနဲ့ လီဗာပူးလ်အသင်းတို့ရဲ့ အင်္ဂလန်ဒါဘီ ပရီးမီးယားလိဂ်ပွဲစဉ်မှာ ဧည့်သည် လီဗာပူးလ်က မိုဆာလာ ဒီးယက်ဇ်တို့ သွင်းဂိုးတွေနဲ့ အိမ်ရှင် ယူနိုက်တက်ကို (၃)ဂိုးပြတ်နဲ့ အပြတ်အသတ်ကို အနိုင်ယူခဲ့ပါတယ်။
ဒီပွဲဟာ နယ်သာလန်လိဂ်က နည်းပြဟောင်းနှစ်ဦး ပရီးမီးယားလိဂ်မှာ ထိပ်တိုက် ပြန်ဆုံရတဲ့ ပွဲစဉ်တစ်ပွဲ ဖြစ်ပေမယ့်လည်း အခုမှ ပရီးမီးယားလိဂ်ဆီ ရောက်လာခဲ့တဲ့ အာနယ် ဆလော့က သူ့ထက် စီနီယာကျတဲ့ အဲရစ် တန်ဟက်ဂ်ကို နေရာစုံမှာ အသာရအောင် ကစားပြနိုင်ခဲ့သလို တန်ဟက်ဂ်ရဲ့ ယူနိုက်တက်ကတော့ ရုပ်ပျက်ဆင်းပျက်နဲ့ ရှုံးနိမ့်ခဲ့ရပါတယ်။
Photo Credit : Caught Offside
တန်ဟက်ဂ်က ဒီပွဲမှာ ကစားသမားသစ်တွေဖြစ်တဲ့ ဒီလစ်နဲ့ ဇက်ခ်ဇီတို့ကို ပွဲထွက်လူစာရင်းမှာ ပထမဆုံးအကြိမ်အဖြစ် အသုံးပြုခဲ့ပြီး ခံစစ်မှာဆိုရင်တော့ အေဂျက်စ် ကစားသမားဟောင်းတွေဖြစ်တဲ့ အိုနာနာ ဒီလစ် မာတီနက်ဇ် မာဇာရာဝီတို့ကို အသုံးပြုသွားခဲ့ပေမယ့် ဒီခံစစ်ကနေ သွင်းဂိုး (၃)ဂိုးအထိကို ခွင့်ပြုခဲ့ရပါတယ်။
ဒီရှုံးပွဲနဲ့ ပတ်သက်ပြီး တန်ဟက်ဂ်က “ကျွန်တော်တို့ ပွဲအစပိုင်းက အဆင်ပြေခဲ့တယ်လို့ ထင်ပါတယ်။ ကျွန်တော်တို့ဘက်က အမှားတစ်ခု လုပ်ခဲ့ပြီးတော့ သူတို့ကလည်း အဆုံးသတ်ပိုင်း ကောင်းလွန်းခဲ့တယ်။ တကယ်ကို ကောင်းမွန်တဲ့ အဆုံးသတ်တွေပါ။ လီဗာပူးလ်ရဲ့ ဂိုး(၃)ဂိုးလုံးက ကောင်းမွန်လှတဲ့ အဆုံးသတ်တွေချည်းပါပဲ။”
Photo Credit : Sky Sports
“လီဗာပူးလ်လို အသင်းမျိုးနဲ့ ရင်ဆိုင်ရချိန်မှာ ပထမ ဂိုး(၂)ဂိုး ပေးလိုက်ရသလို အမှားမျိုးတွေ သွားလုပ်လို့ မရပါဘူး။ အဲ့လိုသာ ဖြစ်ခဲ့ရင် ကောင်းကောင်းကြီး အပြစ်ပေးခံရပါမှာ။ လီဗာပူးလ်က နိုင်ပွဲနဲ့ သိသိသာသာကို ထိုက်တန်မှု ရှိခဲ့ပါတယ်။ ကျွန်တော်တို့ ကိုယ့်ကိုကိုယ် နှိမ့်ချပြီး ခံယူရပါမယ်။ နောက်ပြီး ကစားပုံ တိုးတက်လာအောင် လုပ်ရပါမယ်။”
“ပြီးခဲ့တဲ့ ဘောလုံးရာသီကလိုမျိုး ပုံစံတူ ဖြစ်နေတာလားဆိုရင်တော့ ကျွန်တော် အဲ့ဒီလို လုံးဝ မထင်ပါဘူး။ ဒီပွဲမှာလည်း တစ်ဖက်အသင်းရဲ့ xG များနေတာတောင် ကျွန်တော်တို့ ပေးဂိုးတွေ များများစားစား မပေးခဲ့ရဘူး။ နောက်ပြီး ရာသီအကုန်မှာ ကျွန်တော်တို့အသင်း ဘယ်နေရာမှာ ရပ်တည်နေမလဲဆိုတာ ကျွန်တော် သိပါတယ်။ ကျွန်တော်တို့ ဆုဖလားတွေအတွက်လည်း ဆက်သွားပါမယ်။” လို့ ပြောဆိုလိုက်ပါတယ်။
