တော့တင်ဟမ် ဟော့စပါးအသင်း အသင်းခေါင်းဆောင် တောင်ကိုရီးယား တိုက်စစ်ကစားသမား ဆွန်ဟောင်မင်က သူ့အသင်းဖော် ဟယ်ရီကိန်းဟာ ကမ္ဘာ့အကောင်းဆုံး တိုက်စစ်မှူးတစ်ဦးလို့ ချီးကျူးသွားခဲ့တဲ့အပြင် ဘာကြောင့် ကိန်းကို ခုလို ချီးကျူးရတသလဲ ဆိုတာကိုပါ ရှင်းပြသွားခဲ့ပါတယ်။
အသက်(၃၁)နှစ်အရွယ်ရှိ အင်္ဂလန် လက်ရွေးစင် တိုက်စစ်မှူး ဟယ်ရီကိန်းဟာ စပါးနဲ့ အင်္ဂလန်အသင်းအတွက် သမိုင်းတစ်လျှောက် ဂိုးအများဆုံးသွင်းထားသူဖြစ်ပြီး လန်ဒန်မြောက်ပိုင်းကနေ ဘိုင်ယန်မြူးနစ်အသင်းမှာ ကစားသမားဘဝကို အသစ်စတင်ခဲ့ပြီးနောက်မှာလည်း သူ့ရဲ့ ထူးခြားတဲ့ ဂိုးသွင်းစွမ်းရည်ကို ဆက်လက်ထိန်းထားနိုင်ခဲ့တယ်။
Photo Credit : Hotspur HQ
ပရီးမီးယားလိဂ်မှာ ကိန်းနဲ့အတူ ဂိုးပါဝင်ပတ်သက်မှုနဲ့ မှတ်တမ်းတင်ခဲ့တဲ့ ဆွန်က ဂျာမနီမှာ ကစားနေတဲ့ သူ့ အသင်းဖော်ဟောင်းရဲ့ ခြေစွမ်းကို အခုထိ စိတ်ဝင်တစားနဲ့ စာင့်ကြည့်နေပါတယ်။ သူ့အမြင်မှာ ဟယ်ရီကိန်းဟာ ကမ္ဘာ့ဘောလုံးလောကရဲ့ အထောင်တိုက်စစ် နံပါတ် ၉ နေရာအတွက် စံပြတစ်ယောက် ဖြစ်တယ်လို့ပါ မြင်နေပါတယ်။
အခု စပါး အသင်းခေါင်းဆောင်ဖြစ်နေတဲ့ တောင်ကိုရီးယားကစားသမား ဆွန်က Sky Sports နဲ့ ပြောဆိုရာမှာ “ကျွန်တော့်အတွက် ကိန်းက အကောင်းဆုံး တိုက်စစ်မှူးပါ။ ဘာလို့လဲဆိုတော့ ဂိုးသွင်းတာတစ်ခုတည်းကို ကြည့်တာမဟုတ်ဘူး။ ဟုတ်ပါတယ် ဂိုးသွင်းတာက အရေးကြီးတယ်။ ဒါပေမယ့် သူက အသင်းဖော်တွေကို ဘယ်လိုဆက်သွယ်ပြီး ပါဝင်လှုပ်ရှားပေးလဲ ပွဲထဲမှာ ဘယ်လိုပါဝင်အားဖြည့်ပေးလဲ တောင်ပံကစားသမားတွေကို ဘယ်လို ပိုကောင်းလာအောင် ကူညီပေးလဲဆိုတာတွေကပါ ပါတယ်။” လို့ ပြောဆိုခဲ့ပါတယ်။
Photo Credit : Goal
ဆွန်က ကိန်းနဲ့ ထပ်ပြီး အတူကစားခွင့်ရဖို့ မျှော်လင့်ထားပြီး အနာဂတ်မှာ သူတို့နှစ်ယောက် ကွင်းတစ်ခုထဲ ပြန်ဆုံဖြစ်မယ်လို့ ဆန္ဒရှိနေတယ်။ “ကျွန်တော်တို့ အခုထိ အဆက်အသွယ်ရှိတယ်။ သူ့ကို လွမ်းတာတော့ အမှန်ပဲ။ သူက အရမ်းကောင်းတဲ့ ကစားသမားတစ်ယောက်ဖြစ်ပြီး တောင်ပံကစားသမားတွေကို ပိုပြီးတောက်ပလာအောင် လုပ်ပေးနိုင်တယ်။ တစ်နေ့ကျရင် ပရဟိတပွဲ တစ်ခုမှာပဲဖြစ်ဖြစ် သူနဲ့ အတူတူပြန်ကစားခွင့်ရဖို့ မျှော်လင့်တယ်။” လို့ ဆွန်က ဖွင့်ဟခဲ့ပါတယ်။
ကိန်းက အင်္ဂလိပ်ဘောလုံးလောကထဲ ပြန်လာဖို့ သတင်းတွေ ထွက်ပေါ်နေပြီး စပါးအသင်းမှာ သူတို့ကစားသမားဟောင်းအတွက် ကမ်းလှမ်းမှုတွေကို ညှိနှိုင်းခွင့်ရှိပေမယ့် ကိန်းဟာ ဘိုင်ယန်မြူးနစ်မှာ ဆုဖလားတွေရဖို့ အနည်းဆုံး နောက်ထပ်တစ်ရာသီ ဆက်ကစားဖွယ်ရှိနေပါတယ်။ အခုရာသီမှာလည်း ကိန်းက သူ့ရဲ့ ဆုဖလားမရသေးတဲ့ မှတ်တမ်းဆိုးကို ချိုးဖျက်နိုင်ဖို့လည်း အခွင့်အလမ်းရှိနေတယ်လို့ ယူဆရပါတယ်။
