လီဗာပူးလ်အသင်းရဲ့ ထွန်းတောက်လာတဲ့ လူငယ်ကြယ်ပွင့်လေး ရီယို အန်ဂူမိုဟာ လာမယ့်တနင်္ဂနွေမှာကစားမယ့် အာဆင်နယ်နဲ့ ပွဲကြီးပွဲကောင်းမှာ ထပ်မံပါဝင်ကစားခွင့် ရရှိနိုင်ဖွယ်ရှိတယ်လို့ နည်းပြအာနေး စလော့က ပြောကြားလိုက်ပါတယ်။
အန်ဂူမိုဟာဟာ တနင်္လာနေ့က စိန့်ဂျိမ်းစ်ပါ့ခ်မှာ ကစားခဲ့တဲ့ နယူးကာဆယ်အသင်းနဲ့ပွဲစဉ်မှာ လီဗာပူးလ်အတွက် သူရဲကောင်းဖြစ်ခဲ့ပြီး ပွဲချိန် မိနစ် (၁၀၀)မှာ အနိုင်ဂိုးကို သွင်းယူပေးခဲ့တာကြောင့် တစ်ယောက်လျော့ နယူးကာဆယ်ကို ၂-၃ ဂိုးနဲ့ အနိုင်ရရှိခဲ့ပါတယ်။ အဆိုပါပွဲစဉ်ဟာ အကြိတ်အနယ်ရှိခဲ့ပြီး အန်ဂူမိုဟာ ဒိုမီနစ် ဆိုဘော့စလိုင်းရဲ့ ပါးနပ်တဲ့ လှည့်စားမှုကနေတစ်ဆင့် ရရှိလာတဲ့ဘောလုံးကို တစ်ချက်ထိကန်သွင်းမှုနဲ့ ဂိုးသွင်းယူခဲ့ကာ ဆူညံနေတဲ့ အိမ်ရှင်ပရိသတ်တွေကို တိတ်ဆိတ်သွားစေခဲ့ပါတယ်။
Photo Credit : Liverpool FC
သောကြာနေ့ (ယနေ့) မှာ အသက် (၁၇)နှစ်ပြည့်ခဲ့တဲ့ တောင်ပံကစားသမားလေးဟာ နယူးကာဆယ်နဲ့ပွဲက သူ့ရဲ့သွင်းဂိုးကြောင့် ပရီးမီးယားလိဂ်သမိုင်းမှာ စတုတ္ထမြောက် အသက်အငယ်ဆုံး ဂိုးသွင်းရှင်ဖြစ်လာခဲ့သလို လီဗာပူးလ်အသင်းသမိုင်းတစ်လျှောက်မှာတော့ အသက်အငယ်ဆုံး ဂိုးသွင်းရှင်အဖြစ် စံချိန်သစ်တင်နိုင်ခဲ့ပါတယ်။ သူ့ထက် အသက်ငယ်ငယ်နဲ့ ဂိုးသွင်းနိုင်ခဲ့သူတွေကတော့ ဂျိမ်းစ် ဗောက်ဂန် (၁၆ နှစ်၊ ၂၇၀ ရက်)၊ ဂျိမ်းစ် မီလ်နာ (၁၆ နှစ်၊ ၃၅၆ ရက်) နဲ့ ဝိန်း ရွန်နီ (၁၆ နှစ်၊ ၃၆၀ ရက်) တို့သာ ရှိခဲ့ပါတယ်။
နည်းပြ စလော့က သူ့ရဲ့ ပွဲကြိုသတင်းစာရှင်းလင်းပွဲမှာ “ကျွန်တော်တို့ ငွေအများကြီး သုံးစွဲခဲ့ပေမယ့် အန်ဂူမိုလို ကစားသမားလေးအတွက် နေရာရှိနေသေးပြီး သူက သူ့ရဲ့အရည်အသွေးကို ပြသနိုင်ခဲ့တာဟာ ဘောလုံးရဲ့အလှတရားပါပဲ။ လက်ရှိအခြေအနေအရ လာမယ့်ပွဲမှာလည်း သူ ခြေစွမ်းပြဖို့အတွက် နေရာရှိနေပါသေးတယ်။ ဒါကြောင့် သူ အရံခုံမှာ ရှိနေမှာဖြစ်ပြီး လိုအပ်လာရင် ကွင်းထဲဝင်ကစားခွင့်ရဖို့ အခွင့်အရေးကောင်း ရှိပါတယ်။” လို့ ပြောကြားခဲ့ပါတယ်။
Photo Credit : beIN SPORTS
ဒါ့အပြင် စလော့က ဇူလိုင်လက ပေါင် (၆၉)သန်းနဲ့ ဖရန့်ဖတ်ကနေ ခေါ်ယူခဲ့တဲ့ တိုက်စစ်ကစားသမားသစ် ဟူဂို အီကီတီကေးရဲ့ ခြေစွမ်းကိုလည်း ချီးကျူးခဲ့ပါတယ်။ အီကီတီကေးဟာ လီဗာပူးလ်အတွက် ပထမဆုံး ကစားခဲ့တဲ့ ပွဲစဉ် (၃)ပွဲလုံးမှာ ဂိုးသွင်းယူထားနိုင်ခဲ့သူ ဖြစ်ပါတယ်။
“အီကီတီကေးက ကျွန်တော်တို့ရဲ့တိုက်စစ်ပိုင်းကို အများကြီး အကျိုးပြုခဲ့ပါတယ်။ ဂိုးတွေသွင်းတာ မဟုတ်ဘဲ တိုက်စစ်စတင်ပုံတွေမှာပါ ပါဝင်လာနိုင်ခဲ့တယ်။ သူ တိုးတက်အောင်လုပ်ရမယ့်အရာကတော့ ပွဲကစားနိုင်တဲ့ ကြံ့ခိုင်မှု (match fitness) ပါပဲ။ ဘောလုံးမရှိချိန်မှာ သူ့ဆီကနေ ဒီထက်ပိုတဲ့ အားထုတ်မှုကို မျှော်လင့်ပါတယ်။ ဒါပေမဲ့ သူက လိဂ်အသစ် ကစားဟန်အသစ်နဲ့ အသားကျအောင် ကြိုးစားနေရတာဖြစ်လို့ ဒါက ပုံမှန်ပါပဲ။” လို့ စလော့က ဆိုခဲ့ပါတယ်။
