ခရစ္စတီယာနို ရော်နယ်လ်ဒိုသာ အမေရိကန် မေဂျာလိဂ်ပြိုင်ပွဲမှာ ကစားဖြစ်ခဲ့မယ်ဆိုရင် သူ့ပြိုင်ဘက်ဖြစ်သူ အင်တာ မိုင်ယာမီအသင်းရဲ့ တိုက်စစ်ကစားသမားကြီး လီယွန်နယ် မက်ဆီထက် ဂိုးတွေ ပိုမို သွင်းယူနိုင်လိမ့်မယ်လို့ ပြင်သစ်ကစားသမားဟောင်း လူးဝစ် ဆာဟာက သုံးသပ် ပြောဆိုလိုက်ပါတယ်။
ဘောလုံးလောကမှာ ဆယ်စုနှစ်ခွဲကြာအထိ အကောင်းဆုံး ဖြတ်သန်းခဲ့ပြီး ဘောလုံးလောက တစ်ခုလုံး လွှမ်းမိုးနိုင်ခဲ့ ရော်နယ်လ်ဒိုနဲ့ မက်ဆီတို့ဟာ ၂၀၂၃ခုနှစ်ကနေ စတင်ကာ ဥရောပ ဘောလုံးနယ်ပယ်ကို စွန့်ခွာရင်း ရော်နယ်လ်ဒိုက ဆော်ဒီလိဂ်ဆီ အရင် ပြောင်းခဲ့သလို မက်ဆီကလည်း မေဂျာလိဂ်ဆီ ပြောင်းရွှေ့ခဲ့ပါသေးတယ်။
Photo Credit : Goal
လက်ရှိမှာ မက်ဆီရော ရော်နယ်လ်ဒိုပါ မေဂျာလိဂ် ဆော်ဒီလိဂ်တွေမှာ အတော်လေး ဖြတ်သန်းထားပြီး သူတို့ရဲ့ စွမ်းဆောင်ရည်တွေကို ဆက်လက် ပြသထားသလို မက်ဆီဆိုရင်လည်း ၂၀၂၄ မေဂျာလိဂ်ပြိုင်ပွဲရဲ့ အကောင်းဆုံး ကစားသမားဆုကိုပါ ဆွတ်ခူးထားနိုင်ခဲ့ပါသေးတယ်။
ဒါပေမယ့် ရော်နယ်လ်ဒိုရဲ့ ကလပ်အသင်းဖော်ဟောင်းဖြစ်သူ ဆာဟာကတော့ ရော်နယ်လ်ဒိုနဲ့ ပတ်သက်ပြီး “ခရစ္စတီယာနို ရော်နယ်လ်ဒိုသာ မေဂျာလိဂ်မှာ ကစားမယ်ဆိုရင် အခု မက်ဆီ သွင်းနေတဲ့ ဂိုးပမာဏထက် ပိုသွင်းနိုင်ပါလိမ့်မယ်။ ဘာဖြစ်လို့လဲဆိုတော့ မက်ဆီက သူ့အသင်းမှာ အရည်အသွေးရှိတဲ့ ကစားသမားတွေနဲ့ ကစားနေရပြီး ဂိုး(၂၀)လောက် သွင်းယူနိုင်လို့ပါပဲ။”
Photo Credit : Goal
“ကျွန်တော် အရင်က ပြောခဲ့သလို ရော်နယ်လ်ဒိုက ဂိုးတွေ အများကြီး သွင်းယူဖို့အတွက် သူ့ပတ်ဝန်းကျင်မှာ အရည်အသွေးကောင်းတွေ ရှိနေတဲ့ ကစားသမားတွေ ရှိနေဖို့ လိုမယ် မထင်ပါဘူး။ သူက ဘယ်မှာပဲ ကစားရ ကစားရ တစ်ရာသီ ဂိုး(၃၀) သွင်းရင်တောင် သူ့အတွက်က မလုံလောက်ပါဘူး။ သူက လိဂ်ဂိုး (၂၀)လောက်နဲ့ ကျေနပ်နေမှာ မဟုတ်ပါဘူး။”
“ပြီးခဲ့တဲ့နှစ်ကလည်း သူက လိဂ်ဂိုး (၃၅)ဂိုးသွင်းပြီးတော့ ပြိုင်ပွဲစုံမှာဆိုရင်လည်း စုစုပေါင်း ဂိုး(၅၀)အထိ သွင်းတာကို မြင်နိုင်ပါတယ်။ မက်ဆီက ခုဆိုရင် မတူညီတဲ့ ကစားသမားတစ်ဦး ဖြစ်နေပါပြီ။ သူက အဲ့ဒီမှာ စံချိန်တွေ ထပ်တင်ဖို့ ဂိုးတွေထပ်သွင်းဖို့ မရှိတော့ဘဲ စိတ်အေးလက်အေး ဖြစ်နေပါတယ်။ ရော်နယ်လ်ဒိုကျတော့ စံချိန်တွေကို ချိုးဖျက်နိုင်ဖို့ ကြိုးစားနေဆဲပါပဲ။”လို့ သုံးသပ် ပြောဆိုလိုက်ပါတယ်။
