မန်ချက်စတာ ယူနိုက်တက်အသင်း ဂိုးသမား အန်ဒရေ အိုနာနာရဲ့ ဇနီးဖြစ်သူ မယ်လနီ ကာမာယိုဟာ အီတလီနိုင်ငံက စားသောက်ဆိုင်တစ်ခုရဲ့ ကားပါကင်မှာ တန်ဖိုးကြီး ပစ္စည်းနှစ်ခု ဓားပြတိုက်ခံလိုက်ရတယ်လို့ သတင်းထွက်ပေါ်လာခဲ့ပါတယ်။

ကာမာယိုဟာ မြောက်ပိုင်းရဲ့ နိုက်စ်ဘရစ်ချ်လို့ တင်စားခေါ်ဝေါ်တဲ့ အယ်လ်ဒါလေ အက်ဂျ် (Alderley Edge) မှာ ရှိနေတုန်း သူ့ရဲ့ ဟာမက်စ် ဘာကင် (Hermes Birkin) လက်ကိုင်အိတ်နဲ့ ရိုလက်စ် (Rolex) နာရီတို့ကို ဓားပြတိုက်ခံခဲ့ရတာပါ။

Photo Credit : Betimate

ခန့်မှန်းခြေ ပေါင် ၆၂၀၀၀ (ယူရို ၇၃၀၀၀/ဒေါ်လာ ၈၀၀၀၀) ကျော် တန်ဖိုးရှိတဲ့ အဆိုပါပစ္စည်းတွေကို မတ်လ ၂၉ ရက်နေ့က ဒေသတွင်း စားသောက်ဆိုင်တစ်ခုရဲ့ နောက်ဘက် ကားပါကင်မှာ ယူဆောင်သွားခဲ့ရင်းနဲ့ အခုလို ဓားပြတိုက်ခံခဲ့ရတာ ဖြစ်ပါတယ်။

အသက်(၂၅)နှစ်အရွယ် လီယမ် ရော့စ်ဆိုသူကို တန်ဖိုးကြီး ပစ္စည်းလုယက်မှုနဲ့ စွဲချက်တင်ထားပါတယ်။ သူ့ကို လာမယ့်လမှာ ချက်စတာ တရားရုံးမှာ ရုံးတင်စစ်ဆေးခံရဖို့ ရှိပါတယ်။ ကာမာယိုဟာ ဇိမ်ခံပစ္စည်းတွေကို နှစ်သက်သူတစ်ဦးဖြစ်ပြီး သူမရဲ့ ဆိုရှယ်မီဒီယာမှာ ကင်မရွန်းလက်ရွေးစင် ဂိုးသမား အိုနာနာနဲ့အတူ တံဆိပ်ပါ လက်ကိုင်အိတ်တွေနဲ့ ဓာတ်ပုံတွေ မကြာခဏ တင်လေ့ရှိပါတယ်။

Photo Credit : The Sun

ကာမာယိုနဲ့ အိုနာနာတို့ဟာ ၂၀၂၃ ခုနှစ်မှာ လက်ထပ်ခဲ့ကြပြီး အိုနာနာဟာ အင်တာမီလန်ကနေ မန်ချက်စတာ ယူနိုက်တက်ကို ပြောင်းရွှေ့လာချိန်မှာ ကာမာယိုလည်း သူ့နောက်လိုက်ပါလာခဲ့ပါတယ်။ သူမရဲ့ အင်စတာဂရမ်စာမျက်နှာမှာတော့ သူမကိုယ်သူမ မိခင်တစ်ဦး စီးပွားရေး လုပ်ငန်းရှင်တစ်ဦးနဲ့ ပရဟိတသမား တစ်ဦးလို့ ဖော်ပြထားပါတယ်။

သူတို့ဇနီးမောင်နှံဟာ အယ်လ်ဒါလေ အက်ဂျ်မှာ အခြေချနေထိုင်ကြပေမဲ့ အိုနာနာရဲ့ ယူနိုက်တက် ကစားသမားဘဝ အနာဂတ်ကတော့ မသေချာသေးပါဘူး။ နည်းပြ ရူဘင် အမော်ရင်က သူ့ကို အသုံးမလိုတော့ဘူးလို့ ဆုံးဖြတ်ခဲ့မယ်ဆိုရင်တော့ အိုနာနာ အပါဝင် သူတို့မိသားစုဟာ နွေရာသီမှာပဲ အသင်းပြောင်းရွှေ့ရဖို့လည်း ဖြစ်နိုင်ပါတယ်။